1 Wat akyɛ de fi i yet itek e yɛ, ke anet sot afɛ́ aYahuda me yɛ? Kɛ akyɛ de fi i yet kugyat katse me yɛ? 2 Ey, na akaakyɛ irèn, ni imɛsɛng e, baYahuda ba Adakunom kin kaba nɔɔk ifɛ̀ atsak ni bɔk bá. 3 Awɛt, ke bakak ayɛt bá raba dang bereng ifɛ̀ me anɛ? Avit ibereng ifɛ̀ me, da sak Adakunom da won ikyɛng fɛ́ a mi tsang sak fok, a da nye yɛ? 4 Koba! Won Adakunom na a sot afɛ́ atsak, won kaangan na a sot afi mbɔɔs, ti i di se ni ijɛk, <<Nek ba di di katsak ngɔn ni icɛɛt, nɔng i di waat akaangan na atsak ni izen ishɔt.>>

5 Awɛt ke avit atsak yit, tonoso kusot kutabat Adakunom wɛshɛk, akyɛ fi in da fɛ̀ yit ɛ? In da fɛ̀ yit fok Adakunom dun, ke a ki tabak yit ɛ? (In tsin cɛɛt tɛ anet awe.) 6 Koba! Ki ifi se anɔng, na anɛ wu fɛ́ Adakunom di ki ra kazatse ishɔt ɛ? 7 Akak da kyem a fɛ̀ ane, <<Ki mbɔɔs hom da tun atsak Adakunom wɛshɛk, ni i ku barasa iratek wu, akyɛ sak fɛ́ ba rēn di ras ishɔt, tɛ anet inɛn ɛ?>> 8 Bakak ki tsɛk yit mbɔɔs fok iyit fɛ̀ yit ane, <<In da ya yit kashon na anyas, mok itek di ki bɛ́ yɛ?>> Ki i se anɔng, akyɛ ki rone ni in ya yit kashon ni iras anyas nɔng itek e di ki bɛ́s ɛ? Bayɔng fɛ́ ba nye ncɛɛt ibeseng yɔng, kyem na ba wey ni ba.

9 In da gang yit ifɛ̀ me deng anɛ? Ke iyit baYahuda in wat yit ishɛrɛp banet ɛ? Koba! Iyit mi tsɛɛt yit ifɛ̀ fok, iyit baYahuda nɛ Ícɛn-iduk, ngma yit in se yit nawop inɛn. 10 I se ni ijɛk fok, <<Vit azining fɛ́ a yet afɛ́ kusot kutabat, vit kitsarang e. 11 Vit akak fɛ́ a bi irēn, vit ayɔng fɛ́ a tsɛt Adakunom. 12 Ngma ba ba mi nɔɔk Adakunom kama, ngma ba ba mi sot ahwye me. Vit azining ba fɛ̀ a nye ikyɛng itek, vit itsarang e.>>

13 <<Agbɔgbɔrɔ bá, se ti kurɛk fi ku se piyot, ba wɔrɔsɔ banet na alem bá.>> Alem bá turung nadɔm tɛ na fɛ ámazɛrɛ. 14 <<Ánu bá shining ni itok nɛ amaan ifɛ̀.>> 15 <<Atak bá se ziri ziri ni noos nasok; 16 bà bɛ́ atak akan; 17 ba rēn irèn kusonong kukyang awo.

18 <<Ba bi nnyim Adakunom na ayɛ bá awo.>>

19 Yɔkɔnɔng in rēn yit fok ngma ikyɛng fi Ntsi fɛ̀, cɛɛt naton bayɔng fɛ́ ba se nawop ntsi, nɔng vit ayɔng fɛ́ a bi sɛ ikyɛng ifɛ̀, nɔng ngma kazatse bi nyeseng nanu ashon Adakunom nek ishɔt. 20 Nek vit anet fɛ́ a da kyem a sɛ ihwyet anu ashon Adakunom nek ntomong ntsi, i yet ntsi na fi in tonoso anet inɛn wu.

21 Awɛt yɔkɔnɔng, ba mi tun irèn ikak fɛ́ banet di ki sɛs ishashang ashon Adakunom, da ni irèn ntsi awo, kpaf tɛ ba kin di fɛ̀ ni ijɛk aMusa, ni ifɛ̀ batan ayame awo. 22 Kusot kutabat nes na Adakunom, ni irèn inɔɔk atsak na aYeso Kristi sak na bayɔng fɛ́ ba nɔɔk atsak. Nek iwu tonoso ishim ice awo, 23 nek kaangan mi ra inɛn, a mi gaat itsa sak ni imara ízɔk fɛ́ Adakunom nesek. 24 Wat Adakunom mi tonong itek kunang wu, in mi sot yit tabat anu ashon Adakunom, nek ibisik fɛ́ aYeso ki nye yit e. 25 Adakunom nabak aYeso na a sot kunang inabak ifuut anɛn, nek mok nasok wu, banet di sɛ ifuut anɛn bá nek inɔɔk atsak bá. Adakunom nye anɔng nek a di tonong kusot kutabat wu, nek ayɛt akabɔk wu a di wosong anɛn fɛ́ ba ki mang ra. 26 Adakunom kin nye anɔng ni izen e yɔng, nek a di tonong kusot kutabat wu, ama anɔng, a di tees bayɔng fɛ́ ba nesek atsak na aYeso ba di sot bafɛ́ kusot kutabat.

27 Awɛt naton akyɛ fi in di ki tsot yit kugwɔm ɛ? Vit ikikak! Ke ayet nek kutomong ntsi wu in di ki tsot yit kugwɔm ɛ? Awey! A yet nek atsak fi in nɔɔk yit na aYeso wu. 28 Nek iyit mi di yit, anet sɛs kusot kutabat ashon Adakunom nek inɔɔk atsak da nek iras ntomong ntsi awo. 29 Ke Adakunom yet Adakunom baYahuda kyɛk ɛ? A yet Adakunom Ícɛn-iduk bà awɛ? Ey, A yet afuba bà. 30 Nek Adakunom yet azining, iwu wu a bi kusu bayɔng fɛ́ bamang ka ba ya katse, ni irèn inɔɔk atsak, ngma nɛ bayɔng fɛ́ ba se vit iya katse, ni irèn inɔɔk atsak bá. 31 I sot in da barak yit ntsi me, nek inesek atsak ɛ? Koba! In da bang te tsik yit ina ningya.