1 Yiring banet e na ba sot bafi inabak ice sak na bágwɔm nɛ bafi kukyem, na ba foos ifɛ̀, na ba ka na nye nek ira ngma ikyɛng fi i yet itek, 2 ba bi bɔ akak abɔɔs awo, na ba sot kyang na banet, na ba sot bafi kuyiring kutek, na ba tonong nhwyɛ bà sak na banet ngma kusum.

3 Nek iyit ace yit, in kin yet yit ishɔp ni izen ikak, vit ifok ifɛ̀, ba kin ki wɔrɔk yit, ndiri-ndiri ikɔk ni nta azatse kin ki rosom yit. In kin nye yit kusot ifup ni imak, banet ki rayit, iyit rayit bakak. 4 Awɛt ni izen fi itek ni ishim Adakunom Anet-Isheshek yit bɛ́, 5 a ki sheshek yit, da nek ikyɛng kak itek fi in ra yit awo, tit nek angmishish wu. A ki sheshek yit ni irèn ikanang ites ifas ni kusot irèn ifas fɛ́ Kabik aJɛrɛ ki nye yit e, 6 fi iwu ki korok yit ne sherek ni irèn aYeso Kristi Anet-Isheshek yit, 7 nɔng ama fi wu mi ki nɔɔk yit kusot kutabat nek itek wu, in da sot yit bafi iya itekari nek ite iyɛ kutset vit igang. 8 Ifɛ̀ deng yet atsak. In shim ni bang ka ba tak nkyɔrɔk nang, nɔng bayɔng fɛ́ ba mi te iyɛ na Adakunom, na nye hwyɛ inabak ace bà ni inye ikyɛng itek. Nkyɔrɔk e yet ntek makiyi, in bɛ awɛng na akaangan.

9 Awɛt rangɔn ncɛɛt ni ikuus ayerek badakop, nɛ nanan, nɛ kanu naton ntsi, nek ina bi itek nɛ awɛng awo. 10 Gyɔng anet idoro nhwyɛ kazining, ti ku gyɔng ite kafa, ama anɔng, ikyikak bi ti i da moon ni wu awo. 11 Ngɔn rēn fok kuri anet yɔng mi wey yɔng, iwu mi ya ice wu ni ishɔt, nek inɛn wu.

12 Ni izen fi in bi tom Artemas ke aTikikus sak ni ngɔn, ni te nyɛk ni bi di sɛ na aNikopolis, nek in mi won fok in da ya ikos azɔng. 13 Nye ikyɛng fi i da kyem i nye i di sɛ aZenas anet icɛɛt nɛ Apolos ni izen fi i da ka ba te ni irèn, won na ba sɛ ikyɛng fɛ́ ba shim. 14 I se gbing banet yit na ba mɛɛs iras ikyɛng fi i yet itek, nɔng ba di tarang ndaam bá nfi nninom, da na ba sot vit ikyɛng ira awo.

15 Ngma banet fɛ́ ba se azeng ni mi da te show. Te show bayɔng fɛ́ ba ki shim yit fɛ́ ba yet bafi inɔɔk atsak e.

Won itek ni sot gung ni iyin.