1 Lelo, mleche wihe weng'ha na uhadi na kidita kunoga na fihi na maligo. 2 Kota vila vyali viwele na ng'halu ya itombo, namwe kahi mwanguganigwa muwe na ng'halu ya itombo liwele ndo ulonzi wa Nguluwi, leka kwa ludali lwake muweze kikala kuli kugomboligwa. 3 Maandiko Matakatifu vyogalingulonga, "Lelo mvizela kota Mkulu kana isungu."

4 Lelo, mumlutile Mkulu! Heye ndo iganga liwele na ukomu lyowalilemile wanhu, ila nalihaguligwa na Nguluwi na lina lutogo ng'hatu. 5 Namwe kota maganga gawele makomu, mzengwa muwe ng'handa ya chimuhe, amo mowa mdita mijito kota watambika welile, kulavya nhambiko za chimuhe zilingumnojeza Nguluwi kwa kukolela Yesu Kilistu. 6 Ila wala wohambe wakunde, Maandiko Matakatifu gangulonga,

"Mlole! Ndanguwika iganga ako Siyoni,

iganga lya msisi lya kuli nzingo, lihaguligwe na liwele na katogo ng'hatu.

Munhu yomkunda ayo hobasigwa soni hebu."

7 Kwa hemwe womlingukunda,

iganga alyo lina katogo ng'hatu, ila kwa wala wawele hambe wakunde,

"Iganga lyowalilemile walinguzenga, naliwa iganga likulu lya msisi."

8 Kahi Maandiko gangulonga,

"Iganga alyo ndo iganga lya kikwang'wala,

na italawe lya kuwagwisa wanhu."

Wanhu wangikwang'wala kwa vila hawalingukunda ula usenga na ahyo nawawichilwa kulawa katali.

9 Ila hemwe ndo lukolo luhaguligwe, watambika wa Mndewa, nhanzi yelile na wanhu wa heye Nguluwi, womhaguligwe kudamla madito makulu ga Nguluwi yawacheme kulawa kuli jiza na kuwenjizani kuli lumuli lwa heye lukulu. 10 Katali hemwe nahamuwele wanhu wa Nguluwi, ila sambi hemwe ndo wanhu wa heye, katali nahampegwe isungu lya Nguluwi, ila sambi mbochela isungu.

11 Moloko, ndanguwadedeza hemwe kota wajenzi na mlingukola aha muisi, mleche maya ga chilukuli zilingitwanza na muhe. 12 Vyomlingikala hali wanhu wohambe wamzele Nguluwi, mwanguganigwa muwe mnojile ng'hatu, leka howokuvilizilani kota mwangudita gehile, waweze kugona madito ga hemwe ganojile na ahyo wamtogole Nguluwi zuwa lya kuya kwa heye.

13 Lelo, muwahulichize vilongozi wa wanhu hano muisi kwa chiwalo cha Mkulu, kahi mumhulichize mndewa yawele chilongozi mkulu, 14 muwahulichize wasenga wawele wahaguligwe na heye kuwagaza wawifile na kuwatogola waditile ganojile. 15 Mina Nguluwi kangugana muwadite waleche kulonga ulonzi wa chipoka wa wanhu wawele hela luhala kwa madito ganojile gomlingudita. 16 Mikale kota wanhu welejehe, ila mleche kuwa kilejeha kwa hemwe kuwe kuvisila wihe, ila mikale kota vitumagwa wa Nguluwi. 17 Muwahulichize wanhu weng'ha, muwagane wang'holozenu walingumkunda Kilistu na mumhulichize Nguluwi na kahi mumhulichize mndewa.

18 Hemwe vitumagwa, muwahulichize ng'hatu wakulu wa hemwe, haiwele hela kwa wawele na isungu na ganojile, ila na wala wang'ang'ale. 19 Mina wone mwangwimilila magazo gohamganigwe, ila kwa vila mvizela kota Nguluwi kangugana ahyo, lelo Nguluwi kowatambichiza. 20 Mina, mopegwa chonolo chachi, homkwimilila kutowigwa kwa chiwalo cha nongwa ya hemwe? Ila wone mlingwimilila magazo hanga mditile ganojile, Nguluwi kowatambichiza kwa chiwalo acho. 21 Ago ndo gomchemelwe, mina Kilistu yuye nakagazigwa kwa chiwalo cha hemwe, kawalechelani ulajilo leka muwinze nzila ya heye. 22 Heye nahaditile gehile, ne halonjile ulonzi woneche wa uhadi. 23 Heye loyalijigwe, hedichile kwa maligo na loyagazigwe heye nahadumbize, leka nakawika utumbilo wa heye kwa Nguluwi, mtagusa yalingutagusa kwa kutanganika. 24 Heye yuye nakahola gehile ga hetwe kuli lukuli lwake mchanya mwa msalaba, leka tubagame kwa chiwalo cha gehile na kikala kwa chiwalo cha kutanganika. Kwa kulumizwa kwa heye, hemwe musilwa matamwa. 25 Hemwe namwali kota ming'holo jajilile, ila sambi mumhiluchila Mdimi na Mwamizi wa nhumbula za hemwe.