1 Heni nda sekulu chilongozi wa chilundo cha wanhu walingumkunda Kilistu, mbele ndigawene magazo ga Kilistu na ndochilumba kuli ukulu wougubuligwa, ndanguwadedezani, 2 mchidime chila chilundo cha Nguluwi chompeligwe, mchilolele haiwele kwa lupichi ila kwa kugana mwemwe baho, kota vyoyalingugana Nguluwi. Mkole mijito ajo haiwele kwa maya ga sendi, ila mdite kwa nhumbula ya hemwe yeng'ha. 3 Mleche kuwalongoza kwa lupichi wanhu awo wawichigwe hali wamizi wa hemwe, ila muwe ulajilo kwa acho chilundo. 4 Mhela Mdimi Mkulu hoyokuya kahi, hemwe mobochela chipembelo cha ukulu hachilingubilabila. 5 Hiho du, namwe wasongolo mleche kitwanza kuli ulongozi wa wasekulu. Hemwe mweng'ha mwanguganigwa kinamiza leka muwe miditila mijito kwa chila yumwe, mina Maandiko Matakatifu, galonga, "Nguluwi kangitwanzaga na walingidaya, ila kanguwapaga uganililo wa heye walingunyenyetela." 6 Lelo, muwe liholile hasi ha moko wa Nguluwi uwele na mong'ho, leka yawakwinize mhela wa heye. 7 Mumuwichile nongwa za hemwe zeng'ha, mina heye kanguwamila.

8 Milolele, mikale meho! Mng'honyo wa hemwe Limazoga, lyangusanzalima kota isimba lilingubuma lipala chilyo. 9 Mwime nzinzili kuli makundo na kumlema, mvizela kota wang'holozenu kuli isi yeng'ha wangufichigwa na magazo gago. 10 Ila homsinda kugazika mhela udo hela, Nguluwi yawele chaluchizo cha isungu lyeng'ha, yawele yowachemani muwe hamwe kuli ukulu wa heye wa mazuwa gose kuli kilumba na Kilistu, heye yuye kowahilulani na kuwadita mwime nzinzili na ludali na msisi wimile nzinzili. 11 Ludali luwe kwa heye mazuwa gose! Ena.

12 Ndiwandichilani baluwa ayi iwele na ulonzi uchefu, kwa utanzi wa Silivani, mng'holozetu yondimzelele na kumkunda. Ndangugana kuwakangazani nhumbula na kulavya ulolezi kota mbuli ayi ndo isungu lya Nguluwi kwa kukomya. Mwime nzinzili kuli isungu alyo. 13 Chilundo cha wayenu wahaguligwe na Nguluwi ahano Babiloni wanguwalamsani. Vivyo du mwanangu Malichi kanguwalamsani. 14 Milamse kwa ulajilo wa igano lya Kilistu. Ndanguwaganilani kikala goya hemwe muwele wa heye Kilistu.