1 Hemwe wadala, muwahulichize walume wa hemwe, leka wone wawe baho walume wawele hambe wakunde ulonzi wa Nguluwi, wakunde kwa kuwinza madito ga hemwe. Haiwa lupichi kwa hemwe kulonga ulonzi, 2 kwa vila wokona madito ga hemwe logawele gelile na gakumuhulichiza Nguluwi. 3 Kuli kinoliga kwa hemwe, kuleche kuwa kinoliga kwa kunze, kota vila mbuli ya kudalanga mnvili kwa vinji na kuvala vinhu vya zahabu na nguwo zinojile. 4 Ila kinoliga kwa hemwe, kwanguganigwa kuwe mgati mwa nhumbula za hemwe, ila kinoliga kuli vinhu vyohambe viwifigwe, kota vila, muhe wa uliholile na kusindamala, uwele na katogo ng'hulu ng'hatu hali Nguluwi. 5 Ndo lowenolije aho katali wadala welile wawele womtumbila Nguluwi, nawawahulichiza ng'hatu walume wa hewo. 6 Kwa ulajilo Sala nakamhulichiza Abulahamu na kumchema mkulu. Hemwe sambi muwa wahinza wa heye wone mdite ganojile ne kudumba chinhu choneche chila.

7 Hihyo du namwe walume, kuli kikala na wadala wa hemwe mwanguganigwa kuvizela kota hewo wahela mong'ho kota hemwe, ahyo mumhe katogo, mina na hewo kahi wobochela hamwe na hemwe ndolendole ya ukomu yalinguwapa Nguluwi. Aho kulanda kwa hemwe kohulichizwa.

8 Hemwe mwengha mwanguganigwa muwe na nhumbula imwe na majesa gamwe na mwanguganigwa kigana chilukolo na muwe waliholile na chila munhu yawe yalingumgana myage. 9 Mleche kuwahilusila wanhu lihile kwa lihile, ama iligo kwa iligo, ila muwape utambichizo, mina hemwe namchemigwa na Nguluwi leka mpegwe utambichizo. 10 Kota vila Maandiko Matakatifu vyogalingulonga,

"Yalingugana mazuwa menji,

na kona mazuwa ganojile,

yaulemeze umyango wa heye uleche kulonga gehile,

yelahe kulonga udesi.

11 Yewiche kutali na wihe, yadite ganojile,

yapale kikala goya na kibatilila.

12 Kwa vila meho ga Mkulu ganguwalolaga watanganiche,

na kuhulichiza kulanda kwa hewo.

Ila Mkulu Nguluwi hambe yawahulichize walingudita wihe."

13 Yalihi yoweza kuwalumiza hemwe wone mibatilila kudita ganojile? 14 Ila, hanga wone yanguwagana kugazika kwa chiwalo cha kudita ganojile, lelo, mbweda. Mleche kumdumba munhu yoneche, ne mleche kukunda kuwa na lunhwinhwi. 15 Ila mumtogole Kilistu mnhumbula za hemwe kota Mkulu. Muwe mwimile nzinzili chila zuwa kumwidichila yoneche yowauzani kwa utumbilo uwele mgati mwa hemwe, 16 ila mdite ahyo kwa uliholile na kuhulichiza. Muwe mgazelele ganojile na gehile, leka homlijigwa wala walingulonga wihe kwa chiwalo cha madito ga hemwe ganojile kota walingumkunda Kilistu, wone soni. 17 Mina inoga kugazika kwa chiwalo cha kudita ganojile, kota Nguluwi vyoyalingugana, kuleka kugazika kwa chiwalo cha kudita gehile.

18 Mina Kilistu yuye nakagazika na nakabagama kwa chiwalo cha gehile ga hemwe, nakabagama kamwe hela naihega, munhu yanojile kwa chiwalo cha wihe, leka yawahiliche hemwe kwa Nguluwi. Nakakopoligwa chilukuli ila nakaditigwa yawe mkomu kwa ludali lwa Muhe Yelile, 19 na nakaluta kuwadamlila wala muhe nawawele mchinweng'ho. 20 Hewo ndo wala nawalemile kumhulichiza Nguluwi loyawabeteze kwa kwimilila, mhela Nuhu loyali yogongomanya itumbwi ikulu lilinguchemigwa safina. Mgati mwa itumbwi alyo ikulu lilinguchemigwa safina, ndo wanhu wachefu hela, mina wanhu nane ndo waloholigwe kuli mazi, 21 uwele ulajilo wa kubatizigwa kuli kuwalohola hemwe sambi. Kubatizigwa hakuwele ndo mbuli ya kusa chikwe mlukuli, ila ndo ilagano lya wanhu kwa Nguluwi lilinguditikwa kuli nhumbula inojile. Ako kubatizigwa ndo kulinguwalohola kukolela uzilipuko wa Yesu Kilistu. 22 Yawele yalutile kilanga na sambi kekala nzingo ya kudilo kwa Nguluwi, kangulongoza wahilisi wa kilanga, wakulu na wawele na ludali na mong'ho.