1 ବୟାଁ ବାରି ତନାଇଂ ପବିତ୍ର ଆତ୍ମାନେ ଦାନ୍ ବିସୟ୍‌ରେ ନେଙ୍ଗ୍ ଆପେକେ ସତ୍‌ ଆମ୍ୟାଃନ୍‍ସା ଚାଏଁଣ୍ଡିଂକେ । 2 ପେଇଂ ମ୍ୟାପେଲେଃକେ ଜେ ଅବିସ୍‌ବାସି ଲେଃକେଲା ଜିବନ୍‌ଣ୍ଡୁନେ ମୁର୍ତିଇଂକେ ପୁଜା ଡିଙ୍ଗ୍‌ଚେ ପେଇଂ ଗାଲି ଆବଃପେଲେଗେ । 3 ଆତେନ୍‌ସା ପେଇଂନେ ମ୍ୟାନେ ଦର୍‌କାର୍ ଜେ ଇସ୍‌ପର୍‌ନେ ଆତ୍ମା ବାନ୍ ଆଃଅଲେଙ୍ଗ୍‌କ୍ନେ ରେମୁଆଁ ଜା ବାସଙ୍ଗ୍‍ଆୟା ଣ୍ଡୁ ଜେ "ଜିସୁ ଅବିସାପ୍ ବାଲେଃକେ" ବାରି ପବିତ୍ର ଆତ୍ମାନେ ବାନ୍ ଆଚାଲେଲା ଜାଣ୍ଡେ ଜିସୁକେ ମାପ୍‌ରୁ ଡାଗ୍‌ଚେ ଗ୍ର‍ଅନ୍‌ ଡିଙ୍ଗ୍ ଆୟା ଣ୍ଡୁ ।

4 ✝ପବିତ୍ର ଆତ୍ମାନେ ଦାନ୍ ବିନ୍‌ବିନ୍ ରକମ୍‌ ମାତର୍‌ ଆତେନ୍‌ ମୁଇଙ୍ଗ୍ ପବିତ୍ର ଆତ୍ମା ଆତେନ୍‌ ସାପା ଦାନ୍ ଡିଙ୍ଗ୍‌ଆର୍‌ଏ । 5 ବିନ୍‌ବିନ୍ ରକମ୍‌ ଜତନ୍‌ ଆଡିଙ୍ଗ୍‌ଆର୍‌ଡିଙ୍ଗ୍‌ଲା ଡିଗ୍ ମୁଇଙ୍ଗ୍ ମାପ୍‌ରୁନେ ଜତନ୍‌ ଡିଙ୍ଗ୍‌ଏ । 6 କାମ୍ ଡିଙ୍ଗ୍‌ନେ ବପୁ ବିନ୍‌ବିନ୍ ରକମ୍‌ ମାତର୍‌ ମୁଇଙ୍ଗ୍ ଇସ୍‌ପର୍ ଆତେନ୍‌ ସାପା ବପୁ ଜଗେ ବଏ । 7 ସାପାରେନେ ମଙ୍ଗ୍‍ଲ୍‍ ସା ସାପା ରେମୁଆଁବାନ୍ ପବିତ୍ର ଆତ୍ମାନେ ବପୁ ବିନ୍‌ବିନ୍ ବାବ୍‌ରେ ତ୍ନାଏ । 8 ପବିତ୍ର ଆତ୍ମାନେ ଦୟାବାନ୍‌ ଜାଣ୍ଡେ ବୁଦିନେ ସାମୁଆଁ ବାସଙ୍ଗ୍ ନ୍‌ସା ଅଦିକାର୍ ବିବକେ । ବାରି ମୁଇଂଜାକେ ଗ୍ୟାନ୍ ସାମୁଆଁ ବାସଙ୍ଗ୍‌ ନ୍‌ସା ଅଦିକାର୍ ବିବକେ । 9 ଆତେନ୍‌ ମୁଇଙ୍ଗ୍ ପବିତ୍ର ଆତ୍ମା ଜାଣ୍ଡେକେ ବିଏ ବିସ୍‌ବାସ୍‌ ବାରି ଜାଣ୍ଡେକେ ବିଏ ନିମାଣ୍ଡା ଆଡିଙ୍ଗ୍‌ନେ ବପୁ; 10 ଆଜାକେ ବିଏ ଇରିୟାତୁଗ୍‌ ରକମ୍‍ନେ କାମ୍ ଡିଙ୍ଗ୍‌ନେ ଅଦିକାର୍ ଆଜାକେ ବିଏ ଇସ୍‌ପର୍‌ନେ ବବିସତ୍‌ ସାମୁଆଁ ବାସଙ୍ଗ୍‌ନେ ବପୁ ବାରି ଆଜାକେ ବିନ୍‌ବିନ୍‌ନେ ଆତ୍ମା ସାମୁଁଆଃନେ ଅଦିକାର୍; ବାରି ମେଁ ଆଜାକେ ବିଏ ବିନ୍‌ବିନ୍ ବ୍ନାଲିର୍‍ ସାମୁଆଁ ବାସଙ୍ଗ୍‌ନେ ବପୁ ବାରି ଆଜାକେ ବିଏ ଆତେନ୍‌ ବାସାନେ ଅର୍‌ତ ବାସଙ୍ଗ୍‌ନେ ଅଦିକାର୍ । 11 ମାତର୍‌ ଆକେନ୍ ସାପା ଆତେନ୍‌ ମୁଇଙ୍ଗ୍ ଆତ୍ମା ଆଃ ଡିଙ୍ଗ୍‌ବଏ । ମେଁ ନିଜର୍ ଇକ୍‌ଚା ସୁଗୁଆ ସାପା ରେମୁଆଁକେ ବିନ୍‌ବିନ୍ ବିସୟ୍ ବିଃମ୍ୟାକେ ।

12 ✝ଡାଗ୍ଲା ଡିରକମ୍ ଗାଗ୍‌ଡ଼େ ମୁଇଙ୍ଗ୍ ବାରି ଆତ୍‌ଅରିଆ ଗାଗ୍‌ଡ଼େଗୁଗ୍‌ଲା ଗୁଲୁଏ ମାତର୍‌ ଗାଗ୍‌ଡ଼େନେ ସାପା ଗାଗ୍‌ଡ଼େଗୁଗ୍‌ଲା ଗୁଲୁଏ ଡିଙ୍ଗ୍‌ଲା ଡିଗ୍‌ ମୁଇଙ୍ଗ୍ ଗାଗ୍‌ଡ଼େ ଆଃ ଦେତ୍‌ରକମ୍ ଡିଗ୍ କିସ୍‌ଟ । 13 ଦେତ୍‌ରକମ୍ ଜିହୁଦି ଅବିସ୍‌ବାସି ଗତିରେ ବାରି ମୁକ୍‌ତି ରେମୁଆଁ ସାରାସାରିକେଲା ନେ ସାପାରେ ମୁଇଙ୍ଗ୍ ଆତ୍ମାନେ ସାସନ୍‍ ଡିଙ୍ଗ୍‍ନେ ଣ୍ଡିଆଦିକ୍ୟା ବାଚେ ଆତେନ୍‌ ମୁଇଙ୍ଗ୍ ଗାଗ୍‌ଡ଼େନ୍ନିଆ ମିସୁ ନେଲେଃକେ ମୁଇଙ୍ଗ୍ ଆତ୍ମାକେ ଉଗ୍ ନେଲେଃକେ ।

14 ଗାଗ୍‌ଡ଼େ ମୁଇଙ୍ଗ୍ ଗାଗ୍‌ଡ଼େକେ ଡୁଙ୍ଗ୍‍ୱେଚେ ଆରେଆବକେ ମାତର୍‌ ଗୁଲୁଏ ଗାଗ୍‌ଡ଼େ ଏତେ ଆରେବକେ । 15 ଞ୍ଚ ଜଦି ବାସଙ୍ଗ୍ଏ "ନେଙ୍ଗ୍ ନ୍ତି ଣ୍ଡୁ ତେଲା ଗାଗ୍‍ଡ଼େନେ ଅଙ୍ଗ ଣ୍ଡୁ" ତେଲା ଏନ୍‌ ନ୍‌ସା ଆତେନ୍‌ ଗାଗ୍‌ଡ଼େ ଅଙ୍ଗ ଡିଙ୍ଗ୍‌ଚେ ଲେଃ ଆୟା ଣ୍ଡୁ କି । 16 ନ୍ଲୁଗ୍‌ ଜଦି ବାସଙ୍ଗ୍ଏ "ନେଙ୍ଗ୍ ମ୍ମୁଆଃ ଣ୍ଡୁ, ତେଲା ଗାଗ୍‌ଡ଼େନେ ଅଙ୍ଗ ଣ୍ଡୁ" ତେଲା ଏନ୍‌ ନ୍‌ସା ମେଁ ଡିଗ୍ ଗାଗ୍‌ଡ଼େବାନ୍‌ ବିନେ ଡିଙ୍ଗ୍‌ଚେ ଲେଃଆୟା ଣ୍ଡୁ । 17 ସାପା ଗାଗ୍‌ଡ଼େ ଜଦି ମ୍ମୁଆଁଃ ଡିଙ୍ଗ୍‌ଏ, ତେଲା ଅଁ ଡିଙ୍ଗ୍‌ଏ ଡିରକମ୍ ? ବାରି ଆତେନ୍‌ ଜଦି ମାତର୍‌ ନ୍ଲୁଗ୍ ଡିଙ୍ଗ୍‌ଏ ତେଲା ଚୁଇନ୍‌ସା ଡିଙ୍ଗ୍‌ଏ ଡିରକମ୍ ? 18 ମାତର୍‌ ଇସ୍‌ପର୍ ଗାଗ୍‌ଡ଼େଗୁଗ୍‌ଡ଼ାକେ ମୁଇଂ ମୁଇଂ ଡିଙ୍ଗ୍‌ଚେ ଗାଗ୍‌ଡ଼େନ୍ନିଆ ନିଜର୍ ଇକ୍‌ଚା ରକମ୍‌ ଜଡ଼େବକେ । 19 ବାରି ଜଦି ଆତାନ୍‌ସାପା ମୁଇଙ୍ଗ୍ ଅଙ୍ଗ ଡିଙ୍ଗ୍‌ପାଲେଃ ତେଲା ଗାଗ୍‌ଡ଼େ ଆଣ୍ଡିଅରିଆ ? 20 ମାତର୍‌ ସତେଆ ଗାଗ୍‌ଡ଼େଗୁଗ୍‌ଡ଼ା ଗୁଲୁଏ ମାତର୍‌ ଗାଗ୍‌ଡ଼େ ମୁଇଙ୍ଗ୍ ।

21 "ନାଡାଗ୍ରା ନେଙ୍ଗ୍‌ନେ ଦର୍‌କାର୍ ଣ୍ଡୁ" ଡାଗ୍‌ଚେ ମ୍ମୁଆଁଃ ନ୍ତିକେ ବାସଙ୍ଗ୍‌ ଆୟାକେ ଣ୍ଡୁ । "ଣ୍ଡୁଲା ନାଡାଗ୍ରା ନେଙ୍ଗ୍‌ନେ ଦର୍‌କାର୍ ଣ୍ଡୁ ଡାଗ୍‌ଚେ ବାଆ ଞ୍ଚକେ ବାସଙ୍ଗ୍‌ ଆୟା ଣ୍ଡୁ ।"

22 ବିନ୍‌ ପାକା ଗାଗ୍‌ଡ଼େନେ ଆଣ୍ଡିନେ ଅଙ୍ଗ ଆଣ୍ଡେଙ୍ଗ୍ ଅସକ୍‌ତିଆ ଡାଗ୍‌ଚେ ମନେ ଡିଙ୍ଗ୍‌ଏ ଆତେନ୍‌ ଆଣ୍ଡେଙ୍ଗ୍ ଦର୍‌କାର୍ । 23 ଗାଗ୍‌ଡ଼େ ଆଣ୍ଡିନେ ଅଙ୍ଗ ଆଣ୍ଡେଙ୍ଗ୍ ନେନେ ଜାବର୍‌ ଦର୍‌କାର୍ ଡାଗ୍‌ଚେ ମନେ ଡିଙ୍ଗ୍‍ନେଡିଂକେ ଣ୍ଡୁ ଆତେନ୍‌ ଆଣ୍ଡେଙ୍ଗ୍ ନେନେ ଜାବର୍‌ ଜତନ୍ ନେଡିଙ୍ଗ୍‌ଏ । ବାରି ଗାଗ୍‌ଡ଼େନେ ବୁଡ଼ିଲେଃକ୍ନେ ଅଙ୍ଗ ଇଂନେ ଆଡ଼ାତ୍ରା ନେନେ ଜାବର୍ ମନ୍‌ ନେବିଏ 24 ମାତର୍‌ ନେନେ ବୁଡ଼ିଲେଃକ୍ନେ ଗାଗ୍‌ଡ଼େ ଆଣ୍ଡେଙ୍ଗ୍ ସବା ତ୍ନାନେ ଦର୍‌କାର୍ ଣ୍ଡୁ । 25 ତେସା ଗାଗ୍‌ଡ଼େ ବିତ୍ରେ ମେଃଡିଗ୍‌ ଅସ୍‌ବିଦା ଆଡିଙ୍ଗ୍ ଣ୍ଡୁ ବାରି ବିନ୍‌ବିନ୍ ଗାଗ୍‌ଡ଼େଗୁଗ୍‌ଡ଼ା ଆଣ୍ଡେଙ୍ଗ୍ ମେଁ ମେଇଂ ବିତ୍‍ରେ ଦର୍‍କାର୍‌ ଲେଃକ୍ନେ ଜିନିସ୍‍ ବୁଜେମ୍ୟାଃକେ । 26 ଜଦି ଗାଗ୍‌ଡ଼େନେ ମୁଇଙ୍ଗ୍ ଅଙ୍ଗ କସ୍ଟ ବାଏ, ମେଁ ଏତେ ଗାଗ୍‌ଡ଼େନେ ବିନ୍‌ ଅଙ୍ଗ ଆଣ୍ଡେଙ୍ଗ୍ ଡିଗ୍ କସ୍ଟ ବାଏ । ଜଦି ଗାଗ୍‌ଡ଼େନେ ମେଃଡିଗ୍‌ ଅଙ୍ଗ ସନ୍‌ମାନ୍‌ ବାଏ, ବିନ୍‌ ସାପା ଅଙ୍ଗ ଆଣ୍ଡେଙ୍ଗ୍ ମେଁ ଏତେ ମୁଇଂଅରିଆ ଡିଙ୍ଗ୍‌ଚେ ସାର୍ଦା ଡିଙ୍ଗ୍‌ଆର୍‌ଏ ।

27 ପେ କିସ୍‌ଟନେ ଗାଗ୍‌ଡ଼େ । ପେ ସାପାରେ ଆତେନ୍‌ ଗାଗ୍‌ଡ଼େନେ ମୁଇଂ ମୁଇଂ ଅଙ୍ଗ । 28 ✝ମଣ୍ଡଲିନ୍ନିଆ ଇସ୍‌ପର୍ ସିସେ ପ୍ରେରିତ୍‌ ସିସ୍ଇଂକେ, ତେନ୍‌ ଇଡ଼ିଂ ବାବବାଦିଇଂକେ, ତେନ୍‌ ଇଡ଼ିଂ ଆଲନେ ଗୁରୁଇଂକେ । ତେନ୍‌ ଇଡ଼ିଂ ଇରିଆତୁଗ୍ କାମ୍‍ ଡିଙ୍ଗ୍‍ନେ, ରେମୁଆଁଇଂକେ ରଗ୍‍ ନିମାଣ୍ଡା ଆଃଡିଙ୍ଗ୍‌ଣ୍ଡ୍ରେ, ସାଇଜ ଡିଙ୍ଗ୍‍ଣ୍ଡ୍ରେ, ନେତା କାମ୍‍ରେ ଅଦିକାର୍‌ ବାରି ବିନ୍‌ବିନ୍ ବ୍ନାସାରେ ସାମୁଆଁ ବାସଙ୍ଗ୍‌ନେ ରେମୁଆଁଇଂକେ ସ୍ରି ବକେ । 29 ମେଇଂ ସାପାରେ ପ୍ରେରିତ୍‌ ସିସ୍‌ ବାବବାଦି କି ଗୁରୁ ଣ୍ଡୁ । ସାପାରେ ମେଃ ବପୁନେ କାମ୍‌ ପୁରନ୍‌ ଆଃଡିଣ୍ଡ୍ରେ । 30 ସାପାରେ ରଗ୍ ନିମାଣ୍ଡା ଆଡିଙ୍ଗ୍‌ନ୍‌ସା ବିନ୍‌ବିନ୍ ବ୍ନାସାରେ ସାମୁଆଁ ବାସଙ୍ଗ୍‌ ନ୍‌ସା ବାରି ମେଁ ସାପାନେ ଅର୍‌ତ ବୁଜେନ୍‌ସା ଆୟାଆର୍‌ ଣ୍ଡୁ । 31 ପେ ନିମାଣ୍ଡା ଦାନ୍‍ଆଣ୍ଡେଙ୍ଗ୍‌ ବାନ୍‌ସା ତିଆର୍ ଡିଙ୍ଗ୍‌ପା । ନେଙ୍ଗ୍ ଆପେକେ ଆକ୍‌ମେଁବାନ୍ ନିମାଣ୍ଡାନେ ମୁଇଙ୍ଗ୍ ଗାଲି ନ୍ନାଃକେଏ ।