1 Meno Pawuli, ntumwa yi Yesu Klisto mu luzolo lu Nzambi mu samuna nsilulu yi luzingu luu mu Yesu-Klisto.

2 Nasonikini ku ngeye Timote, mwana ani wu natomini tya. Bika Nzambi Tata, na Yesu Klisto Mfumu eto bakusakumuna, bakufwila nkenda na bakuhaana kiyenge!

3 Mpimpa na mwini, bu nakwe sambilanga, nkwe kubambukilanga moyo na nkwe vutulanga matondo ku Nzambi, yina kwe sadilanga mu mutima wuvedila bonso busadila zinkaka zani. 4 Nina bambuka moyo mu mansangasa maku mpe nii na mpwila yiyingi mu kuyena mwanki naba wufuluka mu kyese. 5 Nakwe kubambukilanga moyo mu kiminu kikedika kii mu ngeye. Tekila ngeye, kiminu bekyokyo kitwadisa Loyise nkaka aku yi mukento na ngudi aku Enise, nina kwikila ti ni kyakyokyo mpe kii mu ngeye. 6 Ni hahoho, nina kubambula moyo ti: lemisa munkayulu wukuhaana Nzambi mu ntangu yi nakutentika moko. 7 Mu dyambu ti, Nzambi katuhaana Mpeve yi bunkuta ko, kansi Mpeve yi lulendo, yi luzolo, na yi madyela.

8 Buna kuyenandi nsoni ko mu ta kimbangi ki Mfumu eto na ki meno nidi nkole mu dyambu dyandi. Kansi, yena mpasi ha kimosi naani mu dyambu di Musamu Wumbote na ku sa kivuvu mu lulendo lu Nzambi. 9 Yandi wutuvuukisa na wututumisa mu mbokolo yilongo, ka mu dyambu di mavanga meto mambote ko, kansi mu dyambu di makani mandi na bumbote bwandi bu katusila mu Yesu-Klisto mimvu ka mimvu, 10 mpe bwakayenikisi bwabu mu nyizulu yi Yesu-Klisto, Muvuukisi eto. Yandi wubedisi lulendo lu lufwa, mpe mu Musamu Wumbote, wunata ku kya luzingu lu mimvu ka mimvu.

11 Nzambi wunsoola mu ba mulongi na ntumwa, mu longa Musamu Wumbote bewuwu, 12 ni hahoho nina yenina mpasi bezizi. Kansi nina yena nsoni ko, mu dyambu ti nzebi mu nani nsididi kivuvu, mpe nina kwikila ti, yandi wuu na lulendo mu keba mimvimba mi kampeeni, natee mu kilumbu ki mfundusu. 13 Landa kifwani ki mpova zimbote zi wuyudi ku meno, mpe kangama mu kiminu na luzolo bii neto mu kintwadi na Yesu-Klisto.

14 Simbidila ndongosolo zimbote zi bakuheeni mu lusadusu lu Mpeve Yilongo yikwe zinganga mu yeto.

15 Wazebi ti, bamvimba bebobo baa ku kizunga ki Aziya banyafuni, mu kati dyawu tuu na Fingeli na Elemongeni. 16 Bika Mfumu kalonka nkenda zandi ku kanda di Onesifoli, mu dyambu ti yandi wedi mbombanga kadi ntangu bu naba mu boloko, na kedi nyeninanga nsoni ko. 17 Ni bwabobo, bu katuula ku mbanza yi Loma, wunsosa mu muswalu natee bu kayiza mbakula. 18 Bika Mfumu kamufwila nkenda ha ntadisi yi Nzambi mu kilumbu ki mfundusu. Ngebende tomini zaba lusadusu lu kampaana ku mbanza yi Efeso.