1 Bwabu ngeye, mwana ani, baka nsyamusunu mu bumbote buu mu Yesu-Klisto. 2 Ndongosolo yi wuyudi yi nasamuni ha ntadisi yi zimbangi zizingi, haana yo ku bantu bakwikama balendi longa yo dyaka ku bahiika.

3 Yena mpasi naani ha kimosi bonso mbulu-mbulu yimbote yi Yesu-Klisto. 4 Kuu mbulu-mbulu ko yikiheeni mu sala kisalu, mboki yina landa misamu mi yobobo balembolo ba zimbulu-mbulu, tala ti tiidi mu yangidika mfumu andi yi mubonga mu kisalu. 5 Bumosi mpe ku muntu kwe nookanga ntiinu, balendi muhaana mpu yi nungunu ko tala ti kavumini misiku ko. 6 Kisadi ki mfuba kikwe salanga kisalu kimpasi, kafweti banga wuntete mu baka kikunku kyandi ki nyonzokolo. 7 Yindula misamu mi nina ta mpe Mfumu waakuhaana madyela mu bakula mimvimba.

8 Bambuka moyo mu Yesu-Klisto wubutuka mu nkuna yi Davidi, wufuluka mu bafwa, bonso budi Musamu Wumbote wu nakwe samunanga. 9 Ni mu Musamu Wumbote bewowo nina yenina mpasi, mpe nidi wukangama mu misinga mi bisengo bonso kimpumbulu. Kansi Mambu ma Nzambi madi makangama ko. 10 Ni hahoho, nina vibidilanga misamu mimvimba mu dyambu di yobobo Nzambi bakasoola, mwanki yawu mpe batambula mpulusu yii mu Yesu-Klisto na nkembo wu mimvu ka mimvu. 11 Mambu bemama makedika madi:

«Tala ti tuu bafwa ha kimosi nandi,

twaazinga mpe ha kimosi nandi.

12 Tala ti tuna vibidila,

twaayaala mpe ha kimosi nandi.

Tala ti tuna mubisa,

yandi mpe waatubisa.

13 Tala ti tuu bakwikama ko,

yandi waatatamana muba wukwikama,

mu dyambu ti kalendi kibisa yandi bende ko.»

14 Bambula moyo misamu bemyomyo ku bamvimba, mpe bateela ha ntadisi yi Nzambi, balembolo bindasana mpaka mu zimpova. Kadi mpaka zii mfunu ko, zawu zikwe zimbisa yobobo bana yuwa zo. 15 Sadila ngolo mu ba kisadi kimbote ha meso ma Nzambi, bonso kisadi kina lembolo yena nsoni mu kisalu kyandi, kina samuna mu ludedomo Mambu mandi makedika. 16 Tina nzonzolo zimpamba mpe zilembolo fwanakana na kiminu. Mu dyambu ti yobobo bakwe sanga bobo, baavula ba kitatu na Nzambi, 17 na ndongosolo awu yidi bonso mputa yibola yina kwe yalangani. Mabanza mani mana tadisa ku Imene na Filetosi. 18 Bakatukidi mu nzila yi kikedika, na bazimbikisi kiminu ki bantu babingi mu ta ti mfulukulu eto mu bafwa yikibeela. 19 Kansi lufulu lungolo lutunga Nzambi ludi lutelama nakekete. Mpova ezi basonika ha yulu lufulu belolo: «Mfumu zebi bantu bandi», mpe: «Wonso muntu wuna ta ti vwihulu ku Mfumu, fweti sisa misamu mimbi.»

20 Mu kati dinzo yiyinene, mudi kaka na ndonga zi wola na zi palata ko, kansi mudi mpe na ndonga zi bahala mu muti, na zibahidikila mu tubumba. Zintete, zazozo bakwe sadilanga mu kilumbu ki mukembo, zimanunu zazozo zikwe sadulungu kadi kilumbu. 21 Tala ti muntu wuna kivedisa mu misamu mimvimba mimbi mi nazonzidi, waafwanakana na ndonga yikwe sadulungu mu ntangu yi mikembo, weka mvimba wuvwihulu ku mfumu andi, muntu wu mfunu mu sadila mfumu andi, na wukubama mu sala kyonso-kyonso kisalu kimbote .

22 Tina nsatu zimbi zi kintwenya, mpe sosa lunungu, kiminu, luzolo, kiyenge ha kimosi na yobobo bakwe sambilanga Mfumu mu mutima wuvedila. 23 Kansi tina mpaka zibuzengi na zilembolo ba na ndandu: zawu zikwe tulumunanga mayuma. 24 Kisadi ki Mfumu kilendi yumana ko. Kansi kifweti ba muntu wuzolakana ha ntadisi yi bamvimba, mwanki kaba na lulendo lwe longa na lwe vibidila misamu mimbi. 25 Yandi fweti semba mitantu mu lembami: kampe Nzambi waabahaana nzila ye viluka na ye zaaba kikedika. 26 Bu baavutukila mabanza mawu mambote, baakuuluka bwabu mu mitambu mi nkadyampemba, wubabwila na wubatuula ku nsye luyaalu lwandi.