1 Zaba ti mu bilumbu bimanunu, ntangu zimpasi zaabwa. 2 Mu dyambu ti bantu baaba na bwimi, nzodi yi mbongo, na mayama, baakitumpidika, mpe baaba mintyaki mi Nzambi. Baatumimina matata na zingudi zawu ko, baatonda muntu ko, na baaba na kivumi mu bima bilongo ko. 3 Baaba na mitima mikangama, baaba na nkenda ko, baatoola bantu, baalembana mu kukiyaala, baaba na mbalu, na baaba mitantu mi mambote. 4 Baayekola bantu, baahidika misamu mimbi, mpe baakitumpidika bubwingi, baavula tya mikembo mi nza, kansi ka Nzambi ko. 5 Yawu baakiyenikisa ti bantu bakangama mu Nzambi badi, kansi bakwe bisanga lulendo lwandi. Ba kitatu na bantu babobo! 6 Bantu bahiika ha kati dyawu bakwe kotanga mu zinzo mu baka mu mintambu myawu bakento balembolo ba basyama mu kiminu na baa bafuluka mu masumu, mpe bakwe twadusungu mu zinzinunu zimumpila mu mpila. 7 Bakwe longokanga ntangu zimvimba, kansi bakwe lembananga mu zaba kikedika. 8 Bumosi mpe Zanesi na Zambesi bu babindisa Mose mpaka, ni bwabobo mpe bantu bebobo bana bindisila kikedika mpaka. Yawu baa na madyela mambi na kiminu kyawu kimpamba kidi. 9 Kansi baakwenda kukula ko, mu dyambu ti bantu bamvimba baazaba buzengi bwawu, bonso bubeela kifwani ki Zanesi na Zambesi.

10 Kansi ngeye, wutomini landa bumbote ndongosolo zani, ndyatulu ani, makani mani, kiminu kyani, mvibudulu ani, luzolo lwani, na lutatumunu lwani, 11 mboki mpe mfyetokoso na mpasi zi nayena mu mbanza yi Antiose, na yi Ikonyomi, na yi Lisiteli. Nkye mpila mfyetekoso zibobo zi nayena. Kansi Mfumu wunkuula mu zimvimba! 12 Kedika, yobobo bamvimba batiidi mu zinga mu Yesu Klisto, baafyetokoso. 13 Kansi bantu baa na mutima wumbalu na banga luvunu baatatamana kaka mu hidika misamu mimbi. Baahuna bahiika, na yabende mpe baabahuna. 14 Kansi ngeye kangama nakekete mu misamu mi wulongokidi mpe miwutambudi ti mikedika midi. Ngebende zebi ku banani wulongokidi myo. 15 Tuuka bumwana bwaku, ngeye zebi Masonama Malongo. Malenda kuhaana ndwenga mu baka mpulusu mu kiminu mu Yesu Klisto. 16 Masonama mamvimba mafuma ku Nzambi, mpe madi mfunu mu longa, mu semba, mu sungika na mu haana ndongosolo mu lunungu. 17 Mwanki muntu wu Nzambi kaba wulongoka na wukubama, mu sala kyonso-kyonso kisalu kimbote.