1 Ntiidi ti luzaba bunene bu mvita yi nina nwananga mu dyambu dyeno na mu dyambu di bantu ba ku Lawodise mpe na bantu bamvimba ba ka banyeni. 2 Ntiidi ti baba na kibakala, bakangama mu kintwadi ki luzolo mpe bafuluka mu dyela di lunga, mu zaba mansweki ma Nzambi*: ni Klisto, 3 ni mu yandi mu muswama bimvwama bimvimba bi ndwenga na bi nzayilu. 4 Nina luteela bobo mwanki ha lembolo ba muntu lenda luhuna mu binzonzi bimbote. 5 Kaati ti ni neeno kintwadi mu nsuni ko, kansi mu kimpeve ni neeno, mpe nii na kyese mu yena ti luu basyama mpe bakwikama mu kiminu kyeno mu Klisto.

6 Bwabu bu lutambudi Mfumu Yesu-Klisto, dyateeno mu yandi. 7 Beeno bamena myanzi na batungu mu yandi, beeno bakwikama mu kiminu, mpe beeno bantu bakwe toma vutulanga matondo ku Nzambi.

8 Kebeeno kweno, muntu kalembolo lu baka mu mutambu wu mbanzulu zi bantu zi luvunu na zi lembolo ba mu nzila. Zidi zi kangama mu misamu mi kinkulu ki bantu, mu ndongosolo zii bonso makunzi mu sikamani mabanza ma bantu ha nza beyiyi, kansi ka mu Klisto ko. 9 Mu dyambu ti mimvimba mi mu Nzambi, midi nitu yi Yesu. 10 Yeno mpe mu yandi ludi bafuluka mu bimvimba, yandi wuu mfumu yi bimfumu bimvimba na lulendo lumvimba.

11 Mu yandi luzengosolo bubakala, mu nzengosolo yi lembolo sadulu mu moko ma bantu, kansi mu Klisto wu tukuula mu lulendo lu masumu ma be yaalanga nitu eto. 12 Bu balubotika, baluziika kintwadi na Klisto, mu yandi mpe lufuluka nandi kintwadi bu lukwikila mu lulendo lu Nzambi wu mufulukisa mu bafwa*. 13 Mu ntama, yeno luba bantu bafwa mu dyambu di masumu meno, na bu luba bantu balembolo zengoso bubakala. Kansi bwabu, Nzambi wuluheeni dyaka luzingu mu Klisto. Yandi wu tulemvokidi masumu meto mamvimba. 14 Yandi wukyakuna mukanda wedi tufundanga, wuba na nsadulu zi lembolo ba zimbote ku yeto. Klisto wukatula wo na wukoma wo ha kulunsi. 15 Wumanisa ngolo zi bimfumu na lulendo lu zimpeve. Wusempidika zo ha meso ma bantu bamvimba bu kedi ze nata bonso zinkole mu mukembo andi wu kabanungina ha kulunsi.

16 Ni hahoho, muntu kalufundisandi mu dyambu ditadidi bindya hoti malamu ko, mu dyambu ditadidi mukembo hoti mbikulu yi ngonda ko, hoti kilumbu ki saba. 17 Bimvimba bebyobyo bii kwandi bonso kinsinsya ki bima byaakwiza, kansi kikedika ni mu Klisto. 18 Lutambulandi ko ti balubedisa ku yobobo bakwe tyanga mu kiyenikisa ti yawu bantu ba luyinunu mpe mu sambila zimbazi. Bantu ba bobobo bakwe vula haananga zimbweno zawu mfunu, na mbanzulu zawu zi kimuntu zi nasa ti baba bafuluka mu mayama malembolo kisalu. 19 Bantu bebobo baa bakangama mu Klisto ko, wudi mutu. Ni mu Klisto nitu yimvimba, yidi yidikulu na yidi yitoma bundana ha kimosi misunya na bihisi, yikwe kudilanga bonso butiidi Nzambi.

20 Yeno luu bafwa ha kimosi na Klisto mpe lukuulu mu lulendo lu zimpeve zikwe yaalanga nza. Bila nki luna natina luzingu bonso ti yeno bantu ba nza beyiyi ludi, mu tambula balukwika mu landa nsadulu bezizi: 21 «Kubongandi ko», «kubimbandi ko», «Kusimbandi ko»? 22 Nsadulu bezozo zikwe zimbalanga bu bameni sadila zo. Ntumunu na ndongosolo zi bantu kwandi zidi. 23 Nsadulu bezozo zina yenika bonso nsadulu zi ndwenga, mu dyambu ti zina lonka lusambulu mu luzolo lu muntu yandi bende, luyinunu, na kuyenisa nitu mpasi. Kansi, zii mfunu ko, mpe kisalu kyawu ni mu yangidika kwandi nsuni.