1 Yeno zimfumu, hidikeeno misamu mimbote na midedama ku mindongo myeno. Lufweti zaba ti, yeno mpe Mfumu yii neeno ku mazulu.

2 Tatamaneeno mu sambila, kayeeno meso mu lusambulu mpe vutulangeeno matondo ku Nzambi. 3 Bu lwaasambila, tusambidilangeeno mpe, mwanki Nzambi ka tuzibudila nzila ye longa mambu mandi na mu samuna mansweki ma mabanza mandi mu Klisto, ma nididi mu boloko, 4 mwanki na zabikisa mo bonso bufwanakani.

5 Dyatileeno mu ndwenga ha kati di balembolo ba mu Klisto, mboki sadileeno ntangu. 6 Bika mpova zeno zibanga zimbote na zikwe yangidikanga mu yuwa, mboki zabeeno mu vutula mvutu yi fwanakani ku wonso muntu.

7 Tisiki, mpangi eto yi zola, kisadi ki kwikama, mpe mukundi ani mu kisalu ki Mfumu, waaluyadila mpolo zimvimba. 8 Nina mutambika ku ludi, mwanki kaluyadila mpolo zi tutadidi, mpe kalusyamisa. 9 Wuna kwiza na Onezime, mpangi eto yi zola na yi kwikama, wudi wumosi mu yeno. Mbo baluzabikisa mimvimba mi na hyoka kuku.

10 Alisitalaki, mukundi ani wu boloko, mpe Malako, mpangi yi Banabase, balutambikidi mbote. Baluzabikisi bwedi lufweti sa ku Malako. Tala ti wizidi ku yeno, mubwaneeno bumbote. 11 Yesu wu bakwe tuminisinanga ti Yusutuse, wulutambikidi mpe mbote. Ni yawu kaka mu kati di Bayudayo bana sala naani mu dyambu di ki Kimfumu ki Nzambi. Bana nkindisanga bubwingi.

12 Epafalasi, wumosi mu yeno, wulutambikidi mbote. Kisadi bekiki ki Yesu-Klisto wuna kimfuzi mu lusambidilanga ntangu zimvimba, mwanki lutelama nakekete, luba bakula mu kimpeve, mpe luba balunga mu sadila luzolo lu Nzambi mu mimvimba. 13 Nina muteela kimbangi bekiki, mu dyambu ti wuna sala bubwingi mu dyambu dyeno na mu dyambu di bisi mbanza yi Lawodise na yi Yelapolisi*. 14 Luka, mukundi eto wuu mumbuki, na Demasi, balutambikidi mbote.

15 Haaneeno mpe mbote ku mpangi zeto zii ku mbanza Lawodise. Haaneeno mpe mbote ku Nimifa na ku dibundu dikwe kutakananga mu kati di nzo andi. 16 Bu lwaamana tanga mukanda bewuwu, fileeno wo ku dibundu di ku mbanza yi Lawodise batanga wo. Yeno mpe, tangeeno mukanda waafuma ku mbanza Lawodise*. 17 Teleeno Alisipo: «Katoma sala kisalu ki katambudi ku Mfumu, mwanki kamanisa kyo bumbote.»

18 Mu kooko kwani nsonikini misamu bemimi: Tambuleeno mbote zi fumini ku meno Pawuli, bambukeno moyo ti, mu boloko nidi. Bika Nzambi kalusakumuna!