1 Tala ti lufuluka mu bafwa na Klisto, soseeno bima bi ku yulu, kuu Klisto wuzakala ha ndambu yi lubakala lu Nzambi*. 2 Soseeno bima bii ku yulu, kansi ka bima bii ha butoto ko. 3 Mu dyambu ti, luu bafwa, mpe luzingu lweno luu luswekama na Klisto mu Nzambi. 4 Mu ntangu Klisto, wuu luzingu lweno, bu kaayenika, yeno mpe lwaayenika nandi mu mukembo andi.

5 Bikeeno nkadulu zeno zi kinza: kindumba, busafu, mpwila zimbi, nzinunu zimbi, mboki nsatu yi bimvwama yidi nsambudulu yi biteki. 6 Misamu myamyomyo mikwe natanga mankesi ma Nzambi ku bantu bakwe lembolo mutumiminanga*. 7 Bwabobo mpe bubeela ndyatulu eno mu ntangu yi luba mu kinanga ki masumu.

8 Kansi bwabu, looseeno misamu bemimi mimvimba: Mankesi, nganzi, mutima mbalu, matoola, na mpova zi nsoni zikwe totokanga mu minwa myeno. 9 Luhunasanandi yeno na yeno ko, mu dyambu ti lumana bika nkadulu eno yi ntama na nsadulu zandi, 10 yeno lulweti nkadulu yimoona, lweka bantu bamona, Nzambi wuluhidika, ba kakwe kitulanga ntangu zimvimba mu kifwani kyandi, mwanki lutoma mu zaba bumbote. 11 Bwabu kusiidi dyaka Bayudayo hoti balembolo ba Bayudayo ko, bazengoso bubakala hoti balembolo zengoso bubakala ko, ka banzenza ko, ka basenzi ko, ka mindongo hoti bantu bakimpwanza ko, kansi ni Klisto kaka wuu mfunu mu bimvimba mpe wudi mu bamvimba.

12 Ni hahoho, yeno buludi bantu basoolo ku Nzambi, bantu balongo na bakatomini tya, beeno na mitima mii mifuluka mu nkenda, mu mbote, mu luyinunu, mu lembami na mu mvibudulu. 13 Vibidileeno nkadulu zi baneeno yeno na yeno, mpe lemvokileeno baneeno tala ti muntu wu na dyambu na munandi. Bonso Mfumu kakwe tulemvokilanga, yeno mpe lemvokileeno baneeno. 14 Kansi mu mimvimba, zolasaneeno, mu dyambu ti luzolo lukwe sanga ti luba mu kintwadi kilunga. 15 Bika kiyenge ki Klisto kiyaala mu mitima myeno, mu dyambu ti mu kiyenge bekyokyo, Nzambi kalutumisina mu ba nitu yimosi. Mpe lufweti vutudilanga matondo! 16 Bika mambu ma Klisto ma fuluka mu mitima myeno mu kivwama kyawu kimvimba. Longasaneeno na lwengasaneeno yeno na yeno mu ndwenga zimvimba mu Mikunga, mu mikunga mi nzitusu, na mu mikunga mi kimpeve. Yimbidileeno Nzambi mu mitima myeno mimvimba mu muvutudilanga matondo. 17 Mimvimba mi lwaahidika mu mpova hoti mu mavanga, hidikeeno myo mu nkumbu yi Mfumu Yesu, mpe vutulangeeno matondo ku Nzambi Tata mu yandi.

18 Bakento, lufweti tumamananga babakala beno, bonso bufwanakani ha meso ma Nzambi.

19 Babakala, lufweti zola bakento beno, mpe lu bafweminangandi ko.

20 Yeno baala, lufweti tumiminanga bibuti byeno mu mimvimba, kadi Mfumu bwabobo kakwe tyanga.

21 Yeno matata, lufwemisangandi baala beno ko, mwanki balembolo lebakana.

22 Yeno mindongo, lufweti tumiminanga mu mimvimba ku zimfumu zeno zi ha butoto, lusangandi bo ha meso mawu kaka mu bayangidika ko, kansi tumamangeeno ku yawu mu mutima wuzibuka, mu dyambu ti luu na bunkuta mu Mfumu. 23 Kyonso kisalu ki lwaasala, saleeno kyo mu mutima wumosi, bonso ti Mfumu luna sadila, kansi ka bantu ko. 24 Zabeno ti, Mfumu waaluhaana musendo wu fwa di kakubikila bantu bandi. Mfumu yi lukwe sadilanga, ni Klisto. 25 Kansi, yondowo kwe hidikanga mimbi, waatambula musendo mu mambi mandi ma kakwe hidikanga, mu dyambu ti Nzambi kakwe talanga kiini ki muntu ko.