1 Meno Pawuli, Silasi na Timote, tusonikini ku dibundu dii ku mbanza yi Tesalonika divwihulu ku Tata Nzambi, na ku Mfumu Yesu-Klisto. Bika Nzambi kalusakumuna na kaluhaana kiyenge!

2 Tukwe tatamananga mu vutula matondo ku Nzambi mu dyambu dyeno, mpe tukwe lusambidilanga. 3 Ntangu zimvimba tuna bambukanga moyo mu bisalu bi kiminu kyeno, mu bisalu bi luzolo lweno na mvibudulu yi kivuvu kyeno mu Mfumu eto Yesu-Klisto, ha ntadisi yi Nzambi Tata dyeto. 4 Zimpangi, tuzebi ti Nzambi wulutiidi, na wulusoola, 5 mu dyambu ti, ka mu mpova kaka ko tulusamunina Musamu Wumbote, kansi mu lulendo na mu Mpeve Yilongo, mpe mu kivuvu kimvimba. Luzebi bwedi bubela nkadulu eto ha kati dyeno, mu dyambu dyeno. 6 Yeno mpe luna landa kifwani kyeto na ki Mfumu, mu dyambu ti mpeleko mpasi ziba neeno, lutambula Mambu ma Nzambi mu kyese, kyese kifuma ku Mpeve Yilongo. 7 Ni hahoho, luhikidi kifwani kimbote ku minkwikidi mimvimba mi kizunga ki Masedwani na ki Akayi. 8 Mu dyambu ti, Mambu ma Mfumu mamwangana tuka ku yeno, ka ku kizunga ki Masedwani na ki Akayi kaka ko, kansi nsangu zi kiminu kyeno mu Nzambi, zimwangana mu bibuka bimvimba: bwabu tuu na nsatu mu bwesa zonzila wo ko. 9 Bantu bamvimba bana kwe zonzi bwedi lutubwanini mu ntangu yi tubedi ku yeno, mpe bwedi lubiikidi mu sambila biteki mu bangumuka ku Nzambi, mwanki lumusadila, Yandi wuu Nzambi yimoyo na yikedika. 10 Mpe, mu kingila Mwana andi wuna fuma ku mazulu, Yesu wukafulukisa mu bafwa, kwe tukuulanga mu nganzi zina kwiza.