1 Bu tuyeni ti tulendi bwesa vibidila mu lembolo luyena ko, tubongidi nzengolo mu saala ku Ateni yeto hiika, 2 mpe tulutambikidi Timote, mpangi eto yi kisalu ki Nzambi mu samuna Musamu Wumbote wu Klisto, mwanki kalusyamisa na kalukindisa mu dyambu di kiminu kyeno, 3 mwanki nakani muntu kalembolo lebakana mu nkwamusu zi tuna yena. Walutomini zaba yeno bende ti, mpasi zazozo Nzambi katutezila. 4 Mu ntangu yi tuba ku yeno, wa tuluteela ti nkwamusu twaayena, zazozo mpe zi tutudila, waluzeebi. 5 Ni hahoho, bu nayena ti nalenda dyaka mu kingila ko, ni natambika Timote mu zaba bwedi bu kiminu kyeno. Nayena bunkuta ti Mutonti bewowo kalutonta, mpe kisalu kyeto kiiza kiba kimpamba.

6 Kansi Timote fumini ku yeno, wizi tula. Wutuyadidi mpolo zimbote zi kiminu kyeno na zi luzolo lweno. Wututedidi ti, luna tatamana mu tubambukilanga moyo mu misamu mimbote na luu na mpwila ye bwesa tuyena, bonso yeto mpe tuu na mpwila mu luyena. 7 Ni hahoho zimpangi, ha kati di nkwamusu na mpasi zeto, tubeki nsyamusu mu yeno, mu dyambu di kiminu kyeno. 8 Ti tuna zinga bwabu, ni mu dyambu ti luu basyama nakekete mu Mfumu. 9 Bwedi tulendi vutudila matondo ku Nzambi mu dyambu dyeno, mu kyese kimvimba ki tuna yena mu yeno ha ntadisi yi Nzambi eto e? 10 Mpimpa na mwini, tuna tatamana mu sambila Nzambi eto, mwanki katuhaana hwahwa mu luyena dyaka na mu lungisa momomo malembolo ba neeno mu kiminu kyeno.

11 Bika yandi bende Nzambi, Tata dyeto na Mfumu eto Yesu, batuzibudila nzila mu kwiza kuu yeno! 12 Bika Mfumu katoma kudisa luzolo na kanyekisa lo mu yeno na yeno mpe ku bantu bamvimba, bonso luzolo luu neto mu yeno! 13 Kakindisa mitima myeno, mwanki lulembolo ba na kibila na luba bavedila ha ntadisi yi Nzambi eto, Tata dyeto, mu kilumbu kyaavutuka Mfumu eto Yesu, na bantu bamvimba bakavwidi! Ameni!