1 Zimpangi, bwabu lulongokidi kuu yeto bwedi nkadulu eno yifweti beela mu yangidika Nzambi. Ninga, bwabobo lukwe dyatilanga. Kansi bwabu, tuna lulomba mpe tuna lusyamisa mu nkumbu yi Mfumu Yesu: luvula bwe sa dyaka! 2 Lutomini zaaba nkye zintumunu zifuma ku Mfumu Yesu tuluhaana. 3 Nzambi tiidi ti luba bantu balongo, mpe lulembolo bwa mu kinsuza. 4 Bika kadi muntu mu yeno kazaaba mu keba nitu andi mu zinga mu bulongo na mu buzitu, 5 wulembolo ba ku nsye luyaalu lu nsatu zimbi, bonso bukwe sanga bantu balembolo zaba Nzambi, 6 mu musamu bewuwu, muntu ka hidikandi misamu mimbi ku mpangi andi na ka muhunandi ko. Watuteka luteela, mpe tululwengisa ti: Mfumu kwe haananga nsembolo ku yobobo bakwe hidikanga myo. 7 Kadi Nzambi katutumisa mu zinga ku nsye busafu ko, kansi mu zinga ku nsye bulongo. 8 Ni hahoho, yondowo kwe nyafunanga ntumunu bezizi, kakwe nyafunanga muntu ko, kansi Nzambi kwe luhaananga Mpeve andi Yilongo.

9 Luu na nsatu ko ti tulusonikina mu myo mitadidi zola ku kimpangi, mu dyambu ti yeno bende lulongoka ku Nzambi mu zolasana yeno na yeno. 10 Ni zola bekoko mpe, lukwe lonkisanga ku zimpangi zii ku kizunga kimvimba ki Masedwani. Kansi tuna lusyamisa zimpangi, luvula bwe sa dyaka! 11 Sadileeno ngolo mu ba mu kiyenge, mu lembolo kota mu misamu mitadidi bantu bahiika, na musala mu moko meeno, bonso bu tuteka we lutuma. 12 Bwabobo ndyatulu eno yaabela yi buzitu ha meso ma bantu balembolo zaba Nzambi, mpe lulembolo ba kizitu ku muntu.

13 Zimpangi, tutiidi luzaba kikedika mu dyambu di bantu bebobo bafwa, mwanki lulembolo ba mu kyadi, bonso bantu bahiika balembolo ba na kivuvu. 14 Tala ti, tukwe kwikilanga ti Yesu wufwa na wufuluka mu bafwa, tukwe kwikilanga mpe ti Nzambi waatuula ha kimosi na Yesu, bantu bebobo bafwa mu kiminu mu Yesu.

15 Bonso buta Mfumu, tukwe tanga ti: yeto twaaba bamoyo natee haa kwiza Mfumu, twaatekidila yobobo bateka fwa ko. 16 Ha yuwakana mbembo yingolo yi ntumunu na ndinga yi nkuluntu yi zimbazi, mpe muningu wu kulumenta di Nzambi, Mfumu yandi bende waakulumuka tuuka ku yulu mpe bantu bebobo bafwa mu Klisto baateka fuluka mu bafwa. 17 Mboki yeto twaaba bamoyo mu ntangu beyoyo, baatunata ha kimosi nawu mu matuti mu bwana Mfumu ku yulu, mpe twaaba na Mfumu ntangu zimvimba. 18 Syamasaneeno yeno na yeno mu mpova bezizi.