1 Zimpangi, mu dyambu ditadidi ntangu na kilokola, luu na nsatu ko ti tulusonikina dyaka mu musamu bewowo. 2 Mu dyambu ti, walutomini zaba yebende ti kilumbu kyaakwiza Mfumu kyaaba bonso bukwe kwizanga mwivi mu mpimpa. 3 Bantu bu baata ti: «Mu kiyenge na mu nkebolo tudi», baayitukulu, mpasi zinsisi zibabwididi bonso misongo bu mikwe bakilanga mukento weka lukufi mu buta, mpe nakani muntu kaavuka ko. 4 Kansi zimpangi, yeno luu mu kitombe ko, mpe kilumbu bekyokyo lwaayitukulu kyo bonso mwivi ko. 5 Yeno bamvimba luu bantu bakwe zinganga mu kya na mu mwini. Yeto tukwe zinganga mu mpimpa hoti mu tombe ko. 6 Ni hahoho, tubwandi tolo bonso bahiika ko, kansi tukayeeno meso mpe tukiyaaleeno. 7 Mu dyambu ti, yobobo bakwe bwanga tolo, mpimpa bakwe lambalalanga, mpe yobobo bakwe kolongo malamu mpimpa bakwe kolongo. 8 Kansi yeto tuvwihulu ku kya, tukiyaaleeno. Tulwateeno kiminu bonso kinkutu ki kisengo kikwe kebanga ntulu, tulwateeno mpe luzolo na kivuvu ki mpulusu bonso mpu. 9 Mu dyambu ti Nzambi ka tusoola ko mwanki nganzi zandi zi tubwila, kansi tutambula mpulusu mu Yesu-Klisto, Mfumu eto, 10 wufwa mu dyambu dyeto, mwanki tuzinga kintwadi nandi, ni tuba bamoyo hoti bafwa. 11 Ni hahoho, syamasaneeno mpe tungasaneeno yeno na yeno mu kintwadi, bonso bu luna sanga bo.

12 Zimpangi, tuna lulomba mu zitisa yobobo bana salanga ha kati dyeno, bana lutwadisanga mu Mfumu, na bana lulwengisanga. 13 Balonkeeno ti luu na buzitu mpe luzolo lulwingi mu dyambu di kisalu ki bana sala. Mpe beeno mu kiyenge yeno na yeno.

14 Zimpangi, ebu tuna lulomba: Lwengisangeeno bantu balembolo ba na ludedomo, kindisangeeno yobobo balebakani, sadisangeeno yobobo baa na bunokina, bangangeeno na luvibudulu ku bamvimba. 15 Kebeeno kweno, muntu ka vutulandi mambi mu mambi ko, kansi tatamanangeeno mu hidika misamu mimbote yeno na yeno, mpe ku bantu bamvimba.

16 Yangalalangeeno ntangu zimvimba 17 sambilangeeno ntangu zimvimba, 18 vutulangeeno matondo mu mimvimba. Mu dyambu ti, ludi luzolo lu Nzambi ha kati dyeno mu Yesu-Klisto.

19 Luzimandi tiya tu Mpeve Yilongo ko, 20 Luyinandi mbikudulu ko. 21 Kansi fyongoninangeeno mimvimba, simbidilangeeno myo mii mimbote, 22 mpe beeno kitatu mu misamu mimvimba mimbi.

23 Bika Nzambi yi kiyenge kalubyeka longo mu nkadulu eno yimvimba, bika ti Mpeve, mwela na nitu eno biba bilembolo dyambu dye semba natee mu kilumbu kyaavutuka Mfumu eto Yesu Klisto. 24 Yondowo wuna lutumisa wukwikama kadi, mimvimba mya kaahidika.

25 Zimpangi, tusambidilangeeno mpe.

26 Hanangeeno ku zimpangi zimvimba mbote ye bumbasana mu kimpangi.

27 Mu nkumbu yi Mfumu, nina lubombidila: tangeeno mukanda bewuwu ku zimpangi zeto zimvimba!

28 Bika Mfumu eto Yesu-Klisto kalusakumuna!