1 ታናዳን አማንያዋንቶ፥ ታን ጾሳ ቱማተ ጹራ* ህንተንቶ ኦዳናዉ ህንተንቱኮ ዬዳ ዎደ፥ ቃ ቃላንነ አዳ ኤራተን ኦዳናዉ ያበይከ። 2 አያዉ ጎፐ፥ ታን ህንተንቱና ደኣደ፥ የሱስ ክርስቶሳፐነ ቃይ ማስቃልያ ቦላ ምስማርያን ሸቲደ እ ካቀቴዳዋፐ አትን፥ ሀራባ ኤረናዳን፥ ታ ቆፋ ቃቻድ። 3 ታን ዳቡራንነ ያሻን ዳሮ ኮኮርሳን ህንተንቱና ደኣድ። 4 ታን ታማርስያዋነ ኦድያዋ ጾሳ አያናንነ ዎልቃን ቆንጭሳይፐ አትን፥ ጪማ ግዲደ አዳ ኤራተ ቃላና ግደና። 5 ሄዋ ድራዉ፥ ህንተ አማኑ ጾሳ ዎልቃናፐ አትን፥ አሳ አ ኤራተን ዘምፕቤና።

6 ኑን አያናን ዎዛናማቱዋ ግዶን አ ኤራተ ሃሳዬቶ። ሽን ሄዌካ ሀ አላምያ አ ኤራተ ግደና፤ ዎይ ሀ አላምያ ሞድያ ይያዋንቱ አ ኤራተ ግደና። 7 ሽን ኑን ኦድያ አ ኤራተይ፥ ጾሳይ ካሰቲደ፥ ጮራ ዎድያፐ ካሰ ኑ ቦንቾ ዶሬዳ አሳፐ ጌሜዳ አ ጹራ አ ኤራተ። 8 ሀ አላምያ ሞድያዋንቱፐ ኦንነ ሀ አ ኤራተ ኤርቤና። ኡንቱንቱ ኤሬዳዋ ግድንቶ፥ ቦንቾ ጎዳ ማስቃልያ ቦላ ምስማርያን ሺደ ካቂክኖ። 9 ሽን ጾሳ ማጻፋይ፥

"ኦንነ አይፍያን በእቤናዌ፥

ሀይንካ ስስቤናዌ፥

ቃይ ኦንነ ባረ ዎዛናን ቆፕቤናዌ

ጾሳይ ባረና ሲቅያዋንቶ ጊግሴዳዋ"

ግያዋዳን ኑን ሃሳዬቶ።✝ 10 ጾሳይ ባረ ጹራ የዉዋ ባረ አያናን ኑና ኤርሴዳ፤ አያዉ ጎፐ፥ ጌሻ አያናይ ጾሳባ ሀራይ አቶ ጌሜዳ የዉዋ ኡባ ብዴ። 11 አያዉ ጎፐ፥ አሳን ደእያ አሳ አያናፐ አትን፥ አሳባ ኤርያዌ ኦኔ? ሀዋዳንካ፥ ቃይ ጾሳባ ጾሳ አያናፐ አትን፥ ኦንነ ኤረና። 12 ኑን ጾሳይ ኑዉ እሜዳባ ኡባ ኤራናዉ እ ኑዉ የዴዳ አያና አኬዶፐ አትን፥ አላምያ አያና አክበይኮ።

13 ኑን አያና የዉዋ* አያና የዉዋና ጋደ፥ ጌሻ አያናይ ኑና ታማርሴዳ ቃላን ሀዋ ሃሳዬቶፐ አትን፥ አሳ አ ኤራተይ ኑና ታማርሴዳ ቃላን ሃሳዮኮ። 14 ሽን ጌሻ አያናይ ባይና አሳይ ጾሳ አያና የዉዋ አከና፤ አያዉ ጎፐ፥ ሄዌ አዉ ኤያተ። የዉ ጌሻ አያናን ፓጨትያ ድራዉ፥ እ ኤራናዉ ዳንዳየና። 15 ሽን ጌሻ አያናይ ደእያ አሳይ ኡባባ ሻኬ፤ ሽን እ ባረ ሁጰዉ ኦናንነ ሻከተና። 16 አያዉ ጎፐ፥ ጾሳ ማጻፋይ፥

"ጎዳ ዎዛና ኤርያዌ ኦኔ?

አ ዞራናዉ ዳንዳይያዌ ኦኔ?"

ያጌ። ሽን ኑዉ ክርስቶሳ ዎዛናይ ደኤ።*✝