ቦልያነ ሞርክያ ዎታዳራ
(ሆሰ 1:1—2:17)
1 ፑቱኤላ ናኣ ኢዩኤላኮ መና ጎዳይ ኪቴዳ ቃላይ ሀዋ።
2 ህንተኖ ጭማቶ፥ ሀዋ ስስተ! ይሁዳ ጋድያን ደእያ አሳዉ ኡባዉ፥ ስስተ! ሀዋ ማላባይ ህንተ ዎደ ዎይ ህንተ አዎቱዋ ዎደ ሀን ኤሪ? 3 ሄዋ ህንተ ናናቶ ኦድተ፤ ህንተ ናናይ ባረንቱ ናናቶ ኦድኖ፤ ቃይ ኡንቱንቱ ናናይካ ካልያ የለታዉ ኦድኖ።
4 ጎንዱዋፐ አቴዳ ካ ዉደ ቦሊ ሜዳ፤ ዉደ ቦልያፐ አቴዳ ካ ቡምቡረይ ሜዳ፤ ቃይ ቡምቡረፐካ አቴዳ ካ ኩኩባይ ሜዳ።
5 ህንተኖ ማትያዋንቶ፥ ቤጎቲደ ዬክተ! ህንተኖ፥ ዎይንያ ኤሳ ኡሽያዋንቶ ኡባ ገደ፥ ዝላልተ! አያዉ ጎፐ፥ ማልእያ ዎይንያ ኤሳይ ህንተ ዶናፐ አቴዳ። 6 ፓይዱ ባይና ኦላንቻይ ታ ጋድያ ማዬዳ። ኡንቱንቱ አቻይ ጋሙዋ አቻ ማላ፤ ቃይ ኡንቱንቱ ካስሊካ ጋማት ካስልያ ማላ።1:6 ሳፃ 9:8 7 ኡንቱንቱ ታ ዎይንያ ቱራ ባይዜድኖ፤ ታ ባላስያ ምካ ጮሜድኖ። ኡንቱንቱ ፖቁዋ ኡባ ም ድጌዳ ድራዉ፥ ዎይንያነ ባላስያ ታሸቱ ኡባይ ቦጼድኖ።
8 አቱማዎ፥ ባረ ያላጋተን አ ጊጌዳ አስናይ ሀይቂና፥ ዋሩዋ ማያደ ዬክያ ጌላያቲዳን፥ ኡባይካ ዬክተ! 9 ካ ያርሹነ ኡሻ ያርሹ መና ጎዳ ጌሻ ጎልያ ብያዋ አጌዳ፤ ሄዋ ድራዉ፥ መና ጎዳዉ ኦያ ቄሳቱ ዬኪኖ። 10 ሾይቃይ መላ አቴዳ፤ ቢታይካ ዬኬ። አያዉ ጎፐ፥ ካይ ዬዳ፤ ዎይንያ ቱራይ መሌዳ፤ ዛይቲካ ላፌዳ።
11 ህንተኖ ጎሻንቻቶ፥ ካዮትተ! ህንተኖ፥ ዎይንያ ቱራ ቶክያዋንቶ፥ ዝላልተ! አያዉ ጎፐ፥ ጫኩ ጋኬዳ ዛርጋይነ ባንጋይ ጋደን ይክቼዳ። 12 ዎይንያ ቱራይ መሌዳ፤ ባላስያ ምይካ ሹሌዳ፤ ሮማንያ ግያ ምይ፥ ተምርያ ግያ ምይ፥ አፕልያ ግያ ምይነ ቃይ ሾይቃን ደእያ ሀራ ም ኡባይካ መሌዳ። ሄዋ ድራዉ፥ አሳፐ ናሸቻይ ሃኬዳ።
ስማናዳንነ ዎሳናዳን ሺቆ ጼሳ
(ሆሰ 1:11—2:17)
13 ህንተኖ ቄሳቶ፥ ዋሩዋ ማዪደ ዬክተ! ህንተኖ፥ ያርሽያሳን ኦያ ቄሳቶ፥ አዬ! አዬ! ጊተ፤ ህንተኖ፥ ታ ጾሳ ስንን ኦያዋንቶ፥ ጌሻ ጎልያ ገልተ፤ ዋሩዋ ማዪደ አቅተ። አያዉ ጎፐ፥ ካ ያርሹዋነ ኡሻ ያርሹዋ ጾሳ ጌሻ ጎልያን ያርሽያዌ ባዋ።
14 ጾማ አዋይተ፤ ጌሻ ያአዉ አሳ ጼሲደ ሺሽተ፤ ጭማቱዋነ ጋድያን ደእያ አሳ ኡባ መና ጎዳ ህንተ ጾሳ ጌሻ ጎልያ ሺሽተ፤ ያቲደ ያን መና ጎዳኮ ዋስተ!
15 መና ጎዳ ጋላሳይ ማቴዳ፤1:15 ኢሳ. 13:6 ሄ ጋላሳዉ አየ አና! ሄ ጋላሳይ ኡባ ዳንዳይያ ጾሳፐ ባሻ ጋላሳ ግዲደ ዬ። 16 ኑ አይፍያ ስንፐ ካይ፥ ኑ ጾሳ ጌሻ ጎልያፐ ናሸቻይነ እልልሳይ ዬዳ ግደኔ? 17 ዘረቴዳ ዘረይ ቢታ ግዶን ቡቄዳ፤ ካይ መል ክቼዳ ድራዉ፥ ዬሲካ ኡባይ መላ ግዴዳ፤ ድየቱካ ኮለቴድኖ። 18 መሄቱ ሎይ ዋሲኖ፤ ሚዛ ዉድያዉካ ማታይ ባይና ድራዉ፥ ያነ ሃነ ብቻሪኖ። ሀራይ አቶ፥ ዶርሳ ዉደቱካ ቱጋቲኖ።
19 አቤት መና ጎዳዉ፥ ታማይ ባዙዋን ደእያ ሄን ጋደቱዋ ም ድጌዳ ድራዉነ ደምባን ደእያ ም ኡባ ላጩ ጹግ ድጌዳ ድራዉ፥ ታን ኔኮ ዋሳይ። 20 ጎግያ ሃይ መሌዳ ድራዉነ ታማይ ባዙዋን ደእያ ማታ ም ድጌዳ ድራዉ፥ ሀራይ አቶ፥ ባዙዋ ዶአቱካ ኔኮ ዋሲኖ።