ሆሰ 14

ናጋራ ማሮታነ አንጁዋ ህዶታ

1 እስራኤልያ አሳዉ፥ ህንተ ናጋራ ጋሱዋን በቲደ ኩንዴድታ። ህንተ ሀእ መና ጎዳኮ፥ ህንተ ጾሳኮ ስምተ። 2 መና ጎዳኮ ስሚደ፥ ሀዋዳን ያጊደ ዎስተ፤ "ኑ ናጋራ ኡባፐ ኑና ማራ፤ ኔን ኑና ነ ኬካተን ሺሻ አካ፤ ያትና ኑን ኑ እንጻርሳን ኔና ጋላታና። 3 አሶረ ጋዲ ኑና አሸና፤ ኑን ኦላ ፓራቱዋካ ቶጎኮ። ኑን ኑ ኩሽያን መዳ ኤቃ ምስለቱዋ ሙለካ፥ ‘ሀዋንቱ ኑ ጾሳቱዋ’ ጎኮ። አዉ ባይናዋንቶ ቃረያዌ ኔና" ያግተ።

ጾሳይ እስራኤልያ አሳ ኦራጽሳናዉ ህዶታ እሜዳ

4 ጾሳይ ሀዋዳን ያጌ፤ "ታ ሀንቁ ኡንቱንቱፐ ስሜዳ፤ ሄዋ ድራዉ፥ ታን ኡንቱንቱ ማካላ ሀኑዋፐ ኡንቱንታ ፓና፤ ኡንቱንታ ዎዛናፐ ሲቃና። 5 ታን እስራኤልያ አሳዉ ጮኩዋ ማላ ግዳና፤ ኡንቱንቱ ጪሻዳን ጪሺደ፥ ሊባኖሳ ዝጋዳን፥ ጻጱዋ የዳና። 6 ኡንቱንቱ ያላጋ ማራቱ ዳሻና፤ ዎጋራዳን ኡንቱንቱ ሎአና። ኡንቱንቱ ሳዉካ ሊባኖሳ ዝጋዳን ቶሹኩ ጋና። 7 አሳይ ስሚደ፥ ታ ኩዋ ጋርሳን ደአና፤ ካ ጫርሻዳን፥ ኡንቱንቱ ሳልክሳልካና፤ ቃይ ኡንቱንቱ ዎይንያ ቱራዳን ጪሻና፤ ሊባኖሳ ዎይንያ ኤሳዳን፥ ደሪ ኤርያዋ ግዳናዋ። 8 ሀዋፐ ስንን ኤፍሬማ አሳይ ኤቃ ምስላትና ጋከተና፤ ታን ህንተ ዎሳ ስሳናነ ህንተና ናጋና። ታን እርጻ ዝጋ ማላ፤ ህንተንቶ አንጆ ኡባይ ታፐ ቤታና" ያጌ።

9 አዳ ኤራይ ደእያ ኦንነ ሀዋ አኬኮ፤ ዎዛን ደእያ ኦንነ ሀዋ ኤሮ። መና ጎዳ ኦጊ ሱረ፤ ጽሎቱ ሄ ኦግያና ሀመቲኖ። ሽን ናጋራንቻቱ አን በቲኖ።