እስራኤልያ አሳይ በስያ ሙሩዋ ደማና
(9:1-16)
1 እስራኤልያ አሳቶ፥ ናሸቶፕተ! ሀራ ካዉተቱዋዳን፥ ፖጩ ጎፕተ! አያዉ ጎፐ፥ ህንተ ህንተ ጾሳፐ ሻከቲደ፥ ሻርሙጼድታ፤ ካ ቡክያ ኡዱማ ኡባን ሻርሙጻታ እምያ ጋትያ ዶሴድታ። 2 ሄዋ ሀዳን ህንተ ኡዱማፐ ካ፥ ዎይንያ ጉምኢያሳፐካ ኤሳ ደምክታ፤ ቃይ ዎይንያ ቱራይካ ኡንቱንቶ አይፈና። 3 ኡንቱንቱ መና ጎዳ ቢታንካ ጋምእክኖ። ሽን ኤፍሬመ ግብጼ ቢታ ስማና፤ ቃይ አሶረ ጋድያን ቱና ቁማ ማና።
4 ኡንቱንቱ መና ጎዳዉ ዎይንያ ኤሳ ያርሹዋ ጉስክኖ፤ ኡንቱንቱ ያርሹካ አ ናሸቼና። ሄ ያርሹ ኡንቱንቶ ሾቻ ማላ ግዳናዋ፤ ሄዋ ምያ ኡባይ ቱናና። ሄ ኡክይ ኡንቱንቱ ማናሳፐ አትና፥ መና ጎዳ ጌሻ ጎልያ ገለና። 5 ኬሬዳ ባላ ጋላስነ መና ጎዳ ቦንችያ ባላ ጋላስ፥ ህንተ አያ ኡዳንቴ? 6 ኡንቱንቱ ባሻፐ ከስ አኮፐካ፥ ግብጼ ኡንቱንታ ሺሻና፤ መምፒሳ ግያ ካታማይ ኡንቱንታ ሞጋና። ኡንቱንቱ ሺሼዳ ብራ ሚሻ ኡባይ ሻራፋ ማይ አታና፤ ኡንቱንቱ ዱንካንያ ግዶንካ ቡሉ ቡዙ ሞካና።
7 ሙሩዋ ጋላሳይ ዬዳ፤ ጾሳይ አሳዉ አ ኦሱዋዳን ኦሱዋዳን ዛርያ ዎዲ ጋኬዳ። እስራኤልያ አሳይ ሄዋ ኤሮ! ህንተ ኢታ ናጋራ ድራዉነ ህንተ ሞርከተ ድራዉ ህንተ፥ "ትምቢትያ ኦድያዋንቱ ኤያ፤ ሳፃ በእያዋንቱካ ጎይያዋንታ" ያጌድታ።9:7 ሉቃሳ 21:22 8 ትምቢትያ ኦድያዌ ታ ጾሳና እትፐ ግዲደ፥ ኤፍሬማ ናግያዋ። ሽን ሀመትያ ኦገ ኡባን ኤፍሬማዉ ካፉዋ ኦይቂያዋዳን፥ ጲሪ ዎ ኡቴዳ፤ አ ጾሳ ጎልያንካ ሞርከተይ ደኤ። 9 በን ግብኣ ካታማን ሀኔዳዋዳን፥ ኡንቱንቱ ሎይ ቱኔድኖ። ጾሳይ ኡንቱንቱ ባይዙዋ ሀሳያና፤ ኡንቱንቱ ናጋራ ሙራና።9:9 ዳና. 19:1-30
እስራኤልያ አሳ ናጋራነ አ ካልያ ፕርዳ
10 ጾሳይ ሀዋዳን ያጌ፤ "ታን እስራኤልያ አሳ መላ ቢታን ዎይንያ ቴራ ደምያዋዳን ደማድ። ታን ህንተ አዎቱዋ ባላስያ ግያ ምን ደእያ ኮይሮ አይፍያ በእያዋዳን በኣድ። ሽን ኡንቱንቱ ባኣል-ፓኦራ ግያሳ ዪደ፥ ባኣላ ግያ ኤቃዉ ጎይኔድኖ፤ ያቲደ ባረንቱ ዶሴዳ ኤቃዳንካ ቱኔድኖ።9:10 ፓይ. 25:1-5 11 ኤፍሬማ ቦንቹ ካፉዋዳን ፓል ያና፤ ሀዋፐ ስንናዉ የልያባይ ባዋ፤ ሻሃራይካ ባዋ፤ ሻሃርያባይ ባዋ። 12 ኡንቱንቱ ናናቱዋ የሊደ ድቾፐካ፥ እቱነ አተናን ዎ ድጋደ፥ ኡንቱንቱ የሉ ባይና አሳ ከሳና። ታን ኡንቱንቱፐ ሃኬዳ ዎደ፥ ኡንቱንቶ አየ አና። 13 ኤፍሬማ አሳይ ሎይ ሎእያ ታየረ ቢታ ማትያዋ በኣድ፤ ኤፍሬማ አሳይ ባረንቱ ናናቱዋ ሹክያዋንቶ ከሲደ እማናዉ ኮሼ" ያጌ።
14 አቤት መና ጎዳዉ፥ ኡንቱንቶ እማ! ኔን ኡንቱንቶ አያ እማኒ? ኔን ኡንቱንቶ ቦሸትያ ቃንነ መሌዳ ን እማ።
15 ጾሳይ ሀዋዳን ያጌ፤ "ኡንቱንቱ ኢታተ ኡባይ ገልጋላ ግያ ሳና፤ ታን ኡንቱንታ እጽያዋ ያን ዶማድ። ኡንቱንቱ ኦሱዋ ኢታተ ድራዉ፥ ታን ኡንቱንታ ታ ጎልያፐ የደርሳና፤ ሀዋፐ ስንናዉ ታን ኡንቱንታ ሲቅከ፤ ኡንቱንታ ሞድያዋንቱካ ማካላንቻ። 16 ኤፍሬማ አሳይ ደሸትና፥ ኡንቱንቱ ጻጱ መሌዳ፤ አይፍያካ አይፍክኖ። ኡንቱንቱ ናናቱዋ የሎፐካ፥ ታን ኡንቱንቱ ሲቅያ ናናቱዋ ዎና" ያጌ።
እስራኤልያ አሳዉ እመቴዳ ሴራ
(9:17—10:15)
17 ኡንቱንቱ ታን ጾሳይ ግያዋ ስሰና ድራዉ፥ እ ኡንቱንታ ፕጽ ኦላና፤ ኡንቱንቱ ካዉተቱዋ ግዶን ቶይላካትያዋንታ ግዳና።