ሆሰ 5

1 "ህንተኖ፥ ቄሳቶ፥ ሀዋ ስስተ! ህንተኖ፥ እስራኤልያ አሳቶ፥ ስስተ! ካትያ ጎልያ አሳቶ፥ አኬክተ! ሀ ፕርዳይ ህንተ ቦላ ፕርደቴዳ። ህንተ ምጽጳን ጲርያዳን ሀኔድታ፤ ታቦራ ደርያ ቦላካ ምጬዳ ግትያዳን ሀኔድታ። 2 ማካላንቻቱ ዎያ ዲዛዳን ሀኔድኖ፤ ሄዋ ድራዉ፥ ታን ኡንቱንታ ኡባ ሙራና። 3 ኤፍሬማዋ ታን ኤራይ፤ እስራኤልካ ታፐ ጌምቤና። ኤፍሬማ፥ ኔን ሀእ ሻርሙጻ ከሳዳ፤ እስራኤልካ ቱኔዳ" ያጌ።

ሆሰኤ አሳይ ኤቃዉ ጎይነናዳን ሴሬዳ

4 እስራኤልያ አሳይ ባረንቱ ጾሳኮ ስመናዳን፥ ኡንቱንቱ ኢታ ኦሱ ኡንቱንታ ተኤዳ፤ ሻርሙጻ አያናይ ኡንቱንቱ ግዶን ደኤ። ሄዋ ድራዉ፥ ኡንቱንቱ መና ጎዳ ኤርክኖ። 5 እስራኤልያ አሳ ኦቶሩ ኡንቱንቱ ቦላን ማርካቴ፤ ሄዋ ድራዉ፥ እስራኤልያ አሳይነ ኤፍሬማ አሳይ ባረንቱ ናጋራን በቲኖ፤ ይሁዳ አሳይካ ኡንቱንቱና በቴ። 6 ኡንቱንቱ መና ጎዳዉ ያርሻናዉ ባረንቱ ዶርሳቱዋ ዉድያነ መህያ ዉድያ ላግ አኪደ ባና፤ ሽን ኡንቱንቱ አ ደምክኖ። አያዉ ጎፐ፥ እ ኡንቱንቱፐ ሻከቴዳ። 7 ኡንቱንቱ መና ጎዳዉ አማነትበይክኖ፤ ኡንቱንቱ የሌዳ ናናይካ ሻርሙጻ ናና። ሄዋ ድራዉ፥ ሀ አግናይ ጼራናዉ፥ ኡንቱንቱካ ኡንቱንቱ ቢታይካ ያና።

እስራኤልነ ይሁዳይ ኦለትያ ኦላ

8 ግብኣ ካታማን ማላካታ፥ ራማ ካታማን ጹሩምባ ፑንተ። "ቢንያማ አሳዉ፥ ህንተ ጉይያን ደእያባ ጼልተ፤ ሄዋ ኤርተ!" ያጊደ፥ ቤት-አዌናን ዋሱዋ ጹልስተ። 9 ቃጻየትያ ጋላስ ኤፍሬመ መላ አታና፤ እስራኤልያ ዛራቱ ግዶን ቱሙ ትምቢትያ ታን ኦዳይ።

10 ጾሳይ ሀዋዳን ያጌ፤ "ይሁዳ ካፓቱ ዛዋ ሹቻ ሱግያዋንቱ ማላ ግዴድኖ፤ ታን ታ ሀንቁዋ ኡንቱንቱ ቦላን ሃዳን ጉሳና። 11 ኤፍሬማ አሳይ ማዳናዉ ዳንዳየና ካዉተቱዋፐ ማዱዋ ኦቻናዉ ቃቼዳ ድራዉ፥ ናቀቴዳነ ፕርዳን ቆሄቴዳ። 12 ሄዋ ድራዉ፥ ታን ኤፍሬማ አሳዉ ብልኣ ማላ፥ ይሁዳ አሳዉካ ቁኑዋ ማላ።

13 "ኤፍሬመ ባረ ሀርግያ፥ ይሁዳይካ ባረ ማዱ በኤዳ ዎደ፥ ኤፍሬመ አሶረ ቢታ ቤዳ፤ ሄ ቢታ ሞድያ ዎልቃማ ካትያ ማዱዋ ኦቼዳ። ሽን እ ኡንቱንቱ ሀርግያ ላናዉ ዎይ ኡንቱንቱ ማዱ ፓናዉ ዳንዳይቤና። 14 ሄዋ ድራዉ፥ ታን ኤፍሬማዉ ጋሙዋዳን ሀናና፤ ይሁዳዉካ ዎዳላ ጋሙዋዳን ሀናና። ታን ኡንቱንታ መንሬደ፥ ቶካ አካደ ባና፤ ኦንነ ኡንቱንታ ታፐ ዎ አከና። 15 ኡንቱንቱ ባረንቱ ባይዙዋ አኬካና ጋካናዉነ ታና ኮያና ጋካናዉ፥ ታን ጉየ ታ ሳኣ ስማሻና። ኡንቱንቱ ባረንቱ ቱጋዉ ታና ምንሲደ ኮያና" ያጌ።