ሆሰ 8

መና ጎዳይ እስራኤልያ ኤቃ ጎይኑሳን ፕርዴዳ

1 "ማላካታ ፑና! አያዉ ጎፐ፥ ኡንቱንቱ ታ ጫቁዋ አደ፥ ታ ህግያ መንዳ ድራዉ፥ መና ጎዳ አሳ ቦላ ሞርኪ አርጋንዳን ኩዌዳ። 2 ኡንቱንቱ፥ ‘አቤት ኑ ጾሳዉ፥ ኑን እስራኤልያ አሳይ ኔና ኤሬቶ’ ያጊደ ታዉ ዋሲኖ። 3 ሽን እስራኤልያ አሳይ ሎኦባ እጼዳ ድራዉ፥ ሞርኪ ኡንቱንታ የደርሳና።

4 "ኡንቱንቱ ታና ኦቼናን ባረዉ ካተቱዋ ካተዬድኖ፤ ታን ኦደናን ደእሽን፥ ካፓቱዋ ዶሬድኖ። ባረ ዮ ጋሱዋ ግድያ ኤቃ ምስለቱዋ ባረንቱ ብራፐነ ዎርቃፐ መድኖ። 5 ሳማርያ አሳዉ፥ ማራ ማላትሲደ ህንተ መዳ ኤቃ ታን እጻድ፤ ታ ሀንቁ ህንተ ቦላ ኤጽ ከሴዳ። ኡንቱንቱ ጌሻ ግደናን አዉደ ጋካናዉ ደአኔ? 6 ኩሽያ ሂላንቻይ እስራኤልያፐ አ መዳፐ አትና፥ እ ጾሳ ግደና። ሳማርያ ኤቃ ምስሊ መኤረታና።

7 "ኡንቱንቱ ጫርኩዋ ዘሪኖ፤ ጎትያ ቆይጪኖ። ኤቁዋን ደእያ ኡንቱንቱ ካዉ አይፊ ባዋ፤ ሄዋ ድራዉ፥ ሊ ባዋ፤ ሊ ደእንቶካ አላጋቱ ማና። 8 እስራኤልያ አሳይ ምተቴዳ፤ ሀእ ኡንቱንቱ አላጋ አሳቱዋ ግዶን ደኢኖ፤ ኡንቱንቱ መኤዳ ሚሻዳን፥ ፓና አሳ ግዴድኖ። 9 ኡንቱንቱ ባዶ ሀርዲዳይ ባረካ ዩይያዋዳን ዩዪደ፥ አሶረ ቢታ ቤድኖ፤ ኤፍሬማ አሳይ ባረና ማድያ አሳ ሻሉዋን ሻሜዳ። 10 ታን ኡንቱንታ ሺሻና። ካረ ጋድያ ካተቱነ ካፓቱ ኡንቱንታ ኡቁኖፐ፥ ኡንቱንቱ ኤለካ ግልቃና።

11 "ኤፍሬማ አሳይ ናጋራ ያርሹዋ ያርሽያ ዳሮ ሳኣ ኬጼ፤ ሽን ሄ ያርሹዋ ሳአቱ ናጋራ ኦያ ሳ ግዴድኖ። 12 ታን ኡንቱንቶ ታ ህግያን ዳሮባ ጻፋድ፤ ሽን ኡንቱንቱ ሄ ህግያ አላጋባዳን ጼሌድኖ። 13 ኡንቱንቱ ያርሻናዉ ዶሲኖ፤ ያርሹዋ አሹዋካ ሚኖ፤ ሽን መና ጎዳይ ኡንቱንቱን ናሸትቤና። እ ሀእ ኡንቱንቱ ባይዙዋ ሀሳያና፤ ቃይ ኡንቱንቱ ናጋራ ግሻዉካ ኡንቱንታ ሙራና፤ ኡንቱንቱ ግብጼ ቢታ ባና። 14 እስራኤልያ አሳይ ባረና መዳዋ ዶጊደ፥ ካትያ ጎለቱዋ ኬጼ፤ ይሁዳ አሳይካ ግምበቴዳ ዳሮ ካታማቱዋ ኬጼ። ሽን ታን ሄ ካታማቱዋን ታማ የዳና፤ ኡንቱንቱ ጌሶቱዋ ማና" ያጌ።