ኢዩኤላ 3

ጎዳይ አማነናዋንታ ሙርያዋ

1 መና ጎዳይ ሀዋዳን ያጌ፥ "ሄ ጋላሳቱዋንነ ሄ ዎድያን ታን ይሁዳነ የሩሳላመ አሳ ኦሞዱዋ ዛራናነ እሻልሳደ ዎና። 2 ታን ካዉተቱዋ ኡባን ደእያ አሳ ሺሻደ፥ ዱገ እዮሳፈጻ ዎምባ ዎና፤ ኡንቱንቱ ታ አሳ እስራኤልያ ቦላ ኦዳ ባይዙዋ ኡባ ድራዉ፥ ታን ኡንቱንታ ያን ፕርዳና። አያዉ ጎፐ፥ ኡንቱንቱ ታ አሳ ካዉተቱዋ ግዶን ላሌድኖ፤ ቃይ ታ ቢታካ ባረዉ ግሽ አኬድኖ፤ 3 ኦሞደቴዳ ታ አሳ ቦላን ሳማ የጌድኖ፤ ሻርሙጻ ማጫ አሳ ደማናዉ፥ አቱማ ናኣ እሜድኖ፤ ቃይ ዎይንያ ኤሳ ኡሻናዉ፥ ማጫ ናቶ ባይዜድኖ።

4 "ሄዋዳንካ፥ ህንተኖ፥ ጺሮሳ፥ ሲዶናነ ፕልስጼማ ጋድያ አሳቶ፥ ህንተ ታ ቦላ አይ ኦናዉ ቆፔድቴ? ታን ኦዳዋ ሀሉዋ ከሳናዉ ኮዪቴ? ሄዋ ህንተ ኮዮፐ፥ ታን ኤሌላደ ህንተ ኦዳ ኦሱዋ ህንተ ቦላ ዛራና።✝3:4-8 ኢሳ. 14:29-31፤ 23:1-18፤ ኤር. 47:1-7፤ ህዝ. 25:15—28:26፤ አሞጻ 1:6-10፤ ሶፎ. 2:4-7፤ ዛካ. 9:1-7፤ ማቶሳ 11:21-22፤ ሉቃሳ 10:13-14 5 አያዉ ጎፐ፥ ህንተ ታ ብራነ ታ ዎርቃ አኬድታ፤ ታ አልኦ ሚሻካ ህንተ ኤቃ ጎለቱዋ ገልሴድታ። 6 ይሁዳ ጋድያ አሳነ የሩሳላመ ካታማ አሳ ኡንቱንቱ ጋድያፐ ሃስ አፊደ፥ ግሪከ ጋድያ አሳዉ ዛልኤድታ። 7 በእተ፥ ህንተ ዛልኤዳ ሳኣፐ ታን ኡንቱንታ ሀእ ደንና፤ ህንተ ኦዳዋ ኡባ ህንተ ሁጲያን ዛራና። 8 ታን ህንተ አቱማ ናናቱዋነ ህንተ ማጫ ናናቱዋ ይሁዳ ጋድያ አሳዉ ዛልኤታናዳን ኦና፤ ቃይ ኡንቱንቱካ ሃኮ ጋድያን ደእያ ሳባ ጋድያ አሳዉ ኡንቱንታ ዛልአና። ታን መና ጎዳይ ሀዋ ኦዳድ።

ጾሳይ አማነና አሳ ቦላ አሄዳ ፕርዳ

9 "ሀዋዳን ያጊደ አይሁዳ ግደና አሳቱዋ ግዶን አዋይተ፤ ‘ኦላዉ ጊግተ፤ ምኖ አሳቱዋ ደንተ! ኦላንቻቱ ኡባይ ሺቅኖነ ከስኖ። 10 ህንተ ማራሻ ማሻ፥✝3:10 ኢሳ. 2:4፤ ሚክ. 4:3 ህንተ ባጫካ ቶራ ከሳናዉ ቆጽተ! ዳቡራንቻይ፥ ታን ምና! ያጎ። 11 ህንተኖ፥ ዩሹዋን ደእያ ካዉተ ኡባቶ፥ ኤለካ ሃ ዪተ፤ ሄዋን ሺቅተ’ ያግተ" ያጌ።

አቤት መና ጎዳዉ፥ ነ ኦላንቻቱዋ ያ ዱገ ዎ!

12 ቃይካ ጾሳይ ሀዋዳን ያጌ፤ "ካዉተቱ ደንዲደ፥ እዮሳፈጻ ዎምባ ቢኖ፤ አያዉ ጎፐ፥ ዩሹዋን ደእያ ካዉተቱዋ ኡባ ቦላን ፕርዳናዉ ታን ያን ኡታና። 13 ኡንቱንቱ ኢታተይ ሎይ ዳሬዳ።✝3:13 ሳፃ 14:14-16፣ 19-20፤ 19:15 ሄዋ ድራዉ፥ ጫካ ዎዲ ጋክና ባጫን ጫክያዋዳን፥ ኡንቱንታ ጫክተ፤ ዎይንያ አይፊ ጉምእያ ኦላን ኩምና የያዋዳንካ፥ ኡንቱንታ የተ።"

14 ፕርዳ ዛንጋራን መና ጎዳ ጋላሳይ ጋኬዳ፤ ሄዋ ድራዉ፥ ዳሮ ዳሮ አሳይ ፕርዳ ዛንጋራን ደኤ። 15 ሄ ጋላስ አዋይነ አግናይ ማና፤ ጾልንተቱካ ባረንቱ ፖኡዋ ገንና። 16 መና ጎዳይ ጽዮነን ግዲደ ጉማና፤✝3:16 አሞጻ 1:2 የሩሳላመንካ ባረ ኮሻ ስሳና፤ ሳሉነ ሳአይ ኮኮራና። ሽን መና ጎዳይ ባረ አሳዉ እስራኤላዉ ባቃት አትያ ሳኣነ ደኡዋ ግዳናዋ።

ጾሳይ ባረ አሳ አንጃና

17 መና ጎዳይ፥ "ታን ታ ጌሻ ደርያን ጽዮነን ደእያ መና ጎዳ ህንተ ጾሳ ግድያዋ ህንተ ሄ ዎደ ኤራና። የሩሳላመ ካታማይ ጌሻ ግዳናዋ፤ ቃይ አላጋቱዋ ኦላንቻቱ ላኤን የሩሳላመ ዎራጅክኖ።

18 "ሄ ጋላስ ደረቱ አይፍያ ዎይንያ ቱራን ካመታና፤ ደረቱዋ ቦላንካ ዳሮ ማ እምያ ሚዛይ ሄመታና። ይሁዳ ጋድያን ደእያ ሻፋ ኡባና ሃይ ፑልታና። መና ጎዳ ጌሻ ጎልያፐ ፑልቱ ጎጋና፤ ሺጽማ ዛንጋራ ኡሻና።

19 "ግብጼ ጋዲ መላ ግዳናዋ፤ ኤዶማ ቢታይካ አይነ ዶለና ቢታ ግዳናዋ። አያዉ ጎፐ፥ ኡንቱንቱ ይሁዳ አሳ ቦላ ኢታባ ኦድኖ፤ ቃይ ይሁዳ ጋድያን ጽሎ አሳ ሱካ ጉሴድኖ። 20 ሽን ይሁዳ ጋዲ መናዉ፥ የሩሳላመካ የለታ ኡባ ጋካናዉ፥ አሳይ ደኢያሳ ግዳናዋ። 21 ታን ጭገተናን አጌዳ ኡንቱንቱ ሱ ሀሉዋ ብሮ ከሳና፤ አያዉ ጎፐ፥ ጾሳይ ጽዮነን ደኤ" ያጌ።