አሞጻ 1

አሳ ዘረ ኡባይ ባረ ዎንጃላን ኦሸትያዋ

1 ኦዝያነ ይሁዳ ጋድያን ካትያ፥ ቃይ ዮኣሻ ናአይ እዮርባም እስራኤልያ ጋድያን ካትያ ግዲደ ደኤዳ ላይን ታቆአ ጋድያን ዶርሳ ሄምያዋንቱፐ እቱ አሞጽ፥ ቢታይ ቃጻናፐ ላኡ ላይፐ ካሰ እስራኤልያባ በኤዳ ሳጻይ ሀዋ።✝1:1 2 ካታ. 15:1-7፤ 2 ኦዱዋ 26:1-23፤ 2 ካታ. 14:23-29

2 እ ሀዋዳን ያጌዳ፤✝1:2 ኢዩ. 3:16 "መና ጎዳይ ጽዮነ ደርያን ጉዴ፤ የሩሳላመ ካታማንካ ባረ ኮሻ ስሴ። ሄንንቻቱ መህያ ሄምያ ሄን ጋደቱ መሊኖ፤ ቃርመሎሳ ደርያ ሁጲያን ደእያ እርጻይካ ሹሌ" ያጌዳ።

3 መና ጎዳይ ሀዋዳን ያጌ፤ "ዳማስቆ አሳይ ዛር ዛሪደ ኦዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ጋላኣደ ቢታ አሳ ብራታ አቻና ደእያ ጋርያን የሲደ ቆጼድኖ።✝1:3-5 ኢሳ. 17:1-3፤ ኤር. 49:23-27፤ ዛካ. 9:1 4 ሄዋ ድራዉ፥ ታን ካትያ ሀዛኤላ ጎልያን ታማ የዳና፤ የድና ሄ ታማይ ካትያ በንሀዳዳ ጌሱዋካ ማና። 5 ታን ዳማስቆ ካታማ ፐንግያ ኩልቡዋ መንና፤ አዌና ዛንጋራን ደእያ አሳ የደርሳናነ ካተቱዋ ጻምኣ ኦይቄዳዋካ ቤት-ኤዴናፐ ይሳና፤ ቃይ ሶርያ ጋድያ አሳይካ ኦሞደቲደ፥ ቂራ ግያሳ ባና" ያጌ መና ጎዳይ።

ፕልስጼማ

6 መና ጎዳይ ሀዋዳን ያጌ፤ "ጋዛ ካታማ አሳይ ዛር ዛሪደ ኦዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ጋድያን ደእያ አሳ ኡባ ኦሞዲደ፥ ኤዶማ ጋድያ አሳዉ ባይዜድኖ።✝1:6-8 ኢሳ. 14:29-31፤ ኤር. 47:1-7፤ ህዝ. 25:15-17፤ ኢዩ. 3:4-8፤ ሶፎ. 2:4-7፤ ዛካ. 9:5-7 7 ሄዋ ድራዉ፥ ታን ጋዛ ካታማ ድርሳን ታማ የዳና፤ ሄ ታማይ ካታማ ጌሱዋካ ማና። 8 አሽዶዳን ደእያ አሳ ታን የደርሳናነ ካተቱዋ ጻምኣ ኦይቄዳዋካ አስቀሎናፐ ይሳና። ኤቅሮና ካታማን ደእያ አሳካ ሙራና፤ ቃይ ፕልስጼማ ጋድያ አሳፐ አቴዳዋንቱካ ሀይቃና። ታን ኡባ ሞድያ መና ጎዳይ ሀዋ ኦዳይ" ያጌ።

ጺሮሳ

9 መና ጎዳይ ሀዋዳን ያጌ፤ "ጺሮሳ ካታማ አሳይ ዛር ዛሪደ ኦዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ጫቀቴዳ እሻተ ጫቁዋ አደ፥ ኦሞደቴዳ አሳ ኡባ ኤዶማ አሳዉ ባይዜድኖ።✝1:9-10 ኢሳ. 23:1-18፤ ህዝ. 26:1—28:19፤ ኢዩ. 3:4-8፤ ዛካ. 9:1-4፤ ማቶሳ 11:21-22፤ ሉቃሳ 10:13-14 10 ሄዋ ድራዉ፥ ታን ጺሮሳ ካታማ ድርሳን ታማ የዳና፤ ሄ ታማይ ካታማ ጌሱዋካ ማና" ያጌ።

ኤዶማ

11 መና ጎዳይ ሀዋዳን ያጌ፤ "ኤዶማ ጋድያ አሳይ ዛር ዛሪደ ኦዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ባረንቱ እሻቱዋ እስራኤላቱዋ ማሻን የደርሴድኖ፤ ኡንቱንቱ ኡንቱንቶ ቃረትበይክኖ። ኡንቱንቱ ኡባ ገደ ሀንቀቲኖ፤ ኡንቱንቱ ይሉ መናዉካ ስመና።✝1:11-12 ኢሳ. 34:5-17፤ 63:1-6፤ ኤር. 49:7-23፤ ህዝ. 25:12-14፤ 35:1-15፤ አብድ. 1-14፤ ሚልክ. 1:2-5 12 ሄዋ ድራዉ፥ ታን ቴማና ካታማ ቦላ ታማ የዳና፤ ሄ ታማይ ቦጽራ ካታማ ጌሶቱዋ ማና" ያጌ።

አሞና

13 መና ጎዳይ ሀዋዳን ያጌ፤ "አሞና ጋድያ አሳይ ዛር ዛሪደ ኦዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ባረንቱ ዛዋ አሳናዉ ጋላኣደ ጋድያን ደእያ ሻሃራ ማጫ አሳቱ ኡሉዋ ዳኬድኖ።✝1:13-15 ኤር. 49:1-6፤ ህዝ. 21:28-32፤ 25:1-7፤ ሶፎ. 2:8-11 14 ሄዋ ድራዉ፥ ታን ራባ ካታማ ድርሳን ታማ የዳና፤ ሄ ታማይ ካታማ ጌሶቱዋ ማና። ሄዋፐ ጉይያን፥ ኦላ ጋላስ ዋሱ ዳራና፤ ቃይ ኦላንቻቱ ጎትያዳን ዎልቃማና። 15 ኡንቱንቱ ካቲነ አናና ኦያ ካፓቱ ኡባይ ኦሞደቲደ እትፐ ባና" ያጌ መና ጎዳይ።