አሞጻ 9

ጾሳ ፕርዳ

1 ያርሽያ ሳኣ ማታን ጎዳይ ኤቃ ደእሽን፥ ታን በኣድ። እ ታና ሀዋዳን ያጌዳ፤ "ባሱ ቃጻናዳን፥ ጌሻ ማቅዳስያ ጉምቡዋ ሾጫ፤ አሳ ኡባ ሁጲያን መንሬ። ሄዋፐ አትያ አሳ ታን ማሻን ዎና። ባቃትያ አሳይ ከስ አከና፤ ከስ አኬዳ አስካ ፓጻ አተና። 2 ኡንቱንቱ ጋድያ ቦኪደ፥ ስኦልያዉ ዱገ ዎፐካ፥ ታን ኡንቱንታ ሄዋፐ ከሳና። ሳሉዋ ፑደ ከሶፐካ፥ ታን ኡንቱንታ ሄዋፐ ዱገ ዎና። 3 ኡንቱንቱ ቃርመሎሳ ደርያ ጼራን ቆሰቶፐካ፥ ታን ኡንቱንታ ኮያደ ሄዋፐ ከሳና። አባ ጪሙዋ ግዶ ገሊደ፥ ታ ስንፐ ጌሞፐካ፥ ታን ዳዊያ አዛዝና፥ እ ኡንቱንታ ዱካና። 4 ቃይ ባረንቱ ሞርከቱዋን ኦሞደቲደ፥ ኡንቱንቱ ቦፐካ፥ ያን ኡንቱንቱ ማሻን ሀይቃናዳን፥ ታን አዛዛና፤ ታን ኡንቱንታ ኢታ አይፍያን ጼላናፐ አትና፥ ሎኦ አይፍያን ጼልከ" ያጌዳ።

5 ጎዳይ፥ ኡባፐ ዎልቃማ መና ጎዳይ ሳኣ ቦቼ፤ ሳአይ ሴሬ፤ ቃይ ሳኣን ደእያባይ ኡባይካ ዬኬ። ናይለ ሻፋይ ኩንደ ባልቡቀትያዋዳን፥ ቢታ ኡባይ ባልቡቀቴ፤ ቃይ ሄ ኩን ዎያዋዳንካ ዎ። 6 እ ባረዉ ደእያ ሳኣ ሳሉዋን ጊግሴ፤ አ ባሱዋካ ሳኣን ባሴ። ቃይ እ አባ ሃቱዋ ጼሲደ፥ ጋድያ ቦላን ዱገ ጉሴ፤ አዉ ሱንይ መና ጎዳ።

7 መና ጎዳይ ሀዋዳን ያጌ፤ "ህንተኖ፥ እስራኤልያ አሳቶ፥ ህንተ ታዉ ቶጵያ አሳ ማላ ግድክቴየ? ታን ህንተና ግብጼ ጋድያፐ ከሴዳዋዳን፥ ፕልስጼማ አሳ ካፍቶራፐ፥ ቃይ ሶርያ አሳካ ቂራፐ ከሳድ" ያጌ።

8 መና ጎዳይ ሀዋዳን ያጌ፤ "በእተ፥ ኡባ ሞድያ መና ጎዳ አይፊ ናጋራንቻ ካዉተ ቦላን ደኤ። ታን አ ጋድያ ቦላፐ ይሳና፤ ሽን ታን ያቆባ ዛርያ ኡባና ይስከ።

9 "በእተ፥ ካ ዛዝርያን ዛዝርያዋዳን፥ እስራኤልያ አሳ ካዉተቱዋ ኡባ ግዶን ዛዝራናዳን፥ ታን አዛዛና፤ ሽን ኡንቱንቱ ግዶን አማነትያዋንቱፐ እቱነ ሳኣን ዎደ የና። 10 ‘ኑና አያ ኢታባይነ ጋከና ዎይ ደመና’ ያግያ ታ አሳ ግዶን ደእያ ናጋራንቻቱ ኡባይ ማሻን ዉራና" ያጌ።

እስራኤልያ ፖኦ ህዶታ

11 ቃይካ ጾሳይ፥ "ሄ ጋላስ ታን ኮለቲደ ኩንዴዳ ጎልያዳን ሀኔዳ ዳዊታ ካዉተ ደንና፤ ጾኤቴዳ ሳአቱዋካ ባራና፤ ቃይ ኮለቴዳሳካ ኦራና፤ ታን አ በንዋዳን ኦደ ኬጻና።✝9:11-12 ኪታ 15:16-18 12 ሄዌነ እስራኤልያ አሳይ ኤዶማ ጋድያፐ አቴዳዋንታነ ታ ሱንን ጼሰቴዳ ካዉተቱዋ ኡባ ላታናሳ" ያጌ። ሀዋ ኦያዌ ታና መና ጎዳ።

13 መና ጎዳይ ሀዋዳን ያጌ፤ "በእተ፥ ካ ጫክያዋንቱ ጫኪደ ዉርሰናን ደእሽን፥ ጋድያ ጎሽያዋንቱ ጋክያ ዎዲ፥ ዎይንያ ቴራ ጉምእያዋንቱካ ጉምኢደ ዉርሰናን ደእሽን፥ ዎይንያ ዘርያዋንቱ ጋክያ ጋላሳቱ ያና። ሄ ዎደ ደረቱ ማልኦ ዎይንያ ኤሳ ጾካና፤ ዞዘቱዋ ኡባፐካ ዎይንያ ኤሳይ ጎጋና። 14 ኦሞዱዋን ቤዳ ታ አሳ እስራኤልያ ዛራደ እሻልሳና። ኡንቱንቱ ኮለቴዳ ካታማቱዋ ዛረ ኬጺደ፥ ኡንቱንቱን ደአና። ዎይንያ ቱራካ ቶኪደ፥ አፐ ዎይንያ ኤሳ ኡሻና። ቃይ አታክልተቱዋካ ቶኪደ፥ ኡንቱንቱ አይፍያ ማና። 15 ታን እስራኤልያ ኡንቱንቱ ጋድያን ቶካና፤ ኡንቱንቱ ታን ኡንቱንቶ እሜዳ ጋድያፐ ላኤን ሙለካ ሾደትክኖ" ያጌ። ሀዋ ኦድያዌ መና ጎዳ ህንተ ጾሳ።