1 ህንተኖ፥ ሳማርያ ማጫዋንቶ፥ ባሳነ ጋድያ ማጫ ሚዛቱዋዳን ሞዳዋንቶ፥ ሀዋ ስስተ! ህንተ ህዬሳቱዋ ኡቁኒታ፤ ማንቆቱዋካ ቱጋዪታ። ህንተ አስናቱዋካ፥ "ኑዉ ኡሻ ሀምተ" ያጊታ። 2 ኡባ ሞድያ መና ጎዳይ ሀዋዳን ያጊደ፥ ባረ ጌሻተን ጫቃ፤ "ህንተ ማጋን ኦይቂደ ጎሸታና ጋላሳይነ ህንተፐ አቴዳ አማሬዳዋንቱካ ማጋን ኦይቂደ ብያ ሞለቱዋዳን ሀናና ጋላሳይ ያና። 3 ህንተ ኡባይካ ድርሳ ጾእያና ጎችና ከሲደ፥ ሄርሞነን ኦለታና" ያጊደ ጫቄዳ መና ጎዳይ።
እስራኤልያ አሳይ ባረ ባላፐ ታማራናዉ ዳንዳይበይክኖ
4,5 ኡባ ሞድያ መና ጎዳይ ሀዋዳን ያጌ፤ "ህንተኖ፥ እስራኤልያ አሳቶ፥ ቢተ፤ ቤቴለ ቢደ፥ ናጋራ ኦተ፤ ጋልጋላካ ቢደ፥ ናጋራ ጉጂደ ኦተ። ዎንታ ዎንታ ህንተ ያርሹዋ ያርሽተ፤ ሄዘን ጋላስ ጋላስ ህንተ አስራታ አህተ። እርሹዋ የጊደ ኡኬዳ ኡክ ጹጊደ፥ ጋላታ ያርሹዋ ያርሽተ። ህንተ ህንተ ዶሱዋን እምያዋ ድራዉ፥ ኦቶረቲደ አዋይተ። አያዉ ጎፐ፥ ህንተ ኦናዉ ዶስያዌ ሄዋ" ያጌ።
6 ቃይካ መና ጎዳይ ሀዋዳን ያጌ፤ "ህንተ ካታማ ኡባን ታን ኮሻ የዳደ፥ ሀራይ አቶ ህንተ ማታን ዳጽያባካ ይሳድ፤ ሽን ህንተ ሄዋንካ ታኮ ስምበይክታ። 7 ካ ጫክያ ዎዲ ጋካናዉ ብሮ ሄዙ አግናይ ደእሽን፥ ታን ህንተንቶ እራ ተኣድ። ታን እት ካታማን እራ ቡክሳደ ሀራ ካታማን ቡከናዳን ድጋድ፤ እት ሾይቃን ቡኬዳ፤ ሀራ ቡክቤና ሾይቃይ ቃይ መሌዳ። 8 ሄዋ ድራዉ፥ ላኡ ዎይ ሄዙ ካታማቱዋ አሳይ ሃ ኡሻናዉ እት ካታማ ቤድኖ፤ ሽን አልበይክኖ። ሄዋንካ ቃይ ህንተ ታኮ ስምበይክታ" ያጌ መና ጎዳይ።
9 መና ጎዳይ፥ "ታን ህንተ ካ ቦላን ሀርግያ የዳድ፤ ህንተ አታክልትያነ ህንተ ዎይንያ ቱራ፥ ህንተ ባላስያ ምነ ህንተ ዎጋራ ኡባ ቦሊ ሜዳ፤ ሽን ህንተ ሄዋንካ ታኮ ስምበይክታ" ያጌ።
10 መና ጎዳይ፥ "ታን ግብጼ አሳቱዋ ቦላ ኢታ ሀርግያ የዴዳዋዳን፥ ህንተ ቦላንካ ቦሻ የዳድ፤ ህንተ ዎዳላ ናናቱዋ ማሻን ዎድ፤ ህንተ ፓራቱካ ኦሞደታናዳን ኡዳድ። ህንተ ሞን ሀይቄዳ አሳ አሃ ጽንቁዋን ህንተና ኡላድ፤ ሽን ህንተ ሄዋንካ ታኮ ስምበይክታ" ያጌ።
11 መና ጎዳይ፥ "ሶዶማነ ጋሞራ ካታማቱዋ ይሴዳዋዳን፥ ህንተፐካ ዳሮቱዋ ይሳድ፤ ሀ አቴዳ ህንተካ ታማፐ ኤጺደ አቴዳ ጺፋ ማላ፤ ሽን ህንተ ሄዋንካ ታኮ ስምበይክታ" ያጌ።4:11 ዶመ 19:24
12 ጾሳይ፥ "ሄዋ ድራዉ፥ እስራኤልያ አሳቶ፥ ታን ህንተና ሄዋዳን ኦደ ሙራና ሀናይ። ታን ህንተና ሀዋዳን ኦደ ሙራና ሀንያ ድራዉ፥ እስራኤልያ አሳዉ፥ ህንተ ጾሳና ጋከታናዉ ጊግተ" ያጌ።
13 ደረቱዋ ጊግሴዳዌ፥ ጫርኩዋካ መዳዌ፥ ባረ ዎዛና ቆፋ አሳዉ ቆንጭስያዌ፥ ዎንታ ፖኡዋ ማዉ ላምያዌ፥ ጋድያን ደእያ ቃ ደረቱዋ የያዌ፥ አዉ ሱንይ መና ጎዳ፥ ኡባፐ ዎልቃማ ጾሳ።