እስራኤልያ ዩዋ
1 ህንተኖ፥ እስራኤልያ አሳይ ማዱዋ ኦችያ ቦንቼቴዳ እስራኤልያ ጋድያ ካፓቶ፥ ህንተኖ፥ ጽዮነን እሻሉዋን ደእያዋንቶ፥ ሳማርያ ካታማንካ ህርግ ባይናን ኡቴዳዋንቶ፥ ህንተንቶ አየ አና! 2 አነ ካልነ ግያ ካታማ ቢደ በእተ። ሄዋፐ ቃይ ሀማታ ግያ ዎልቃማ ካታማ ቢደ፥ ያና ቃይ ዱገ ፕልስጼማቱዋ ካታማ ጋተ ዎተ። ኡንቱንቱ ህንተ ላኡ ካዉተቱዋፐ ኬኪኖ? ኡንቱንቱ ጋዲ ህንተ ጋድያፐ አኪ? 3 ህንተኖ፥ ኢታ ጋላሳይ ኤለካ ዬና ጊደ፥ ሱገ ኦሱዋ ኦያዋንቶ፥ 4 ዳንጋርሳ ዛልያፐ ኦዳ አርሳን ግስያዋንቶ፥ ምንጻፍያንካ እንጀቲደ ኡትያዋንቶ፥ ቃይ ዶርሳ ዉድያፐ ቦልት ቦልታቱዋነ ሚዛ ዛዳሉዋፐ ሞ ማራ አሹዋ ምያዋንቶ፥ 5 ዳዊተዳን የ ሚሻ ህንተንቶ ጊግሲደ፥ ማስንቁዋን ዱማ ዱማ የ የጽያዋንቶ፥ 6 ዎይንያ ኤሳ ከርያና ጋንያዋንቶ፥ ሎይ አልኦ ሽቱዋካ ኦከትያዋንቶ፥ ዮሴፎ ዛራቱዋ ባይዛድ አይነ ካዮተናዋንቶ፥ ህንተንቶ አየ አና! 7 ሄዋ ድራዉ፥ ኦሞደቲደ ባናዋንቱፐ ኮይሮቱ ህንተና ግዳና፤ ሄ ዎደ ህንተ እንጀ ደኡሳይነ ህንተ እሻልያዌ አታና።
8 መና ጎዳይ፥ ኡባፐ ዎልቃማ መና ጎዳይ ጾሳይ ሀዋዳን ያጊደ፥ ባረካ ባረናን ጫቄዳ፤ "ታን ያቆባ ኦቶሩዋ እጻይ፤ ኡንቱንቱ ጌሱዋካ ሸነታድ፤ ታን ካታማነ ካታማን ደእያ ኡባ ኡንቱንቱ ሞርከቶ አደ እማና" ያጌዳ።
9 እት ጎልያን ታሙ አሳይ አቶፐ፥ ኡንቱንቱካ ሀይቃና። 10 ኡንቱንቱ ዳቦቱዋፐ እቱ አሃ ሞጋናዉ ጎለፐ ከሲደ አፋና፤ ሄ ጎልያ ቆልኦን ደእያ ብታንያ፥ "ኔናና አቴዳ ሀራ አሳይ ደኢ?" ያጊደ ኦቻና። እ ዛሪደ፥ "ባዋ" ያጋና። ኦችያዌ፥ "ሀይዛ፥ ሀይዛ! መና ጎዳ ሱን ኑን ጼሳናዉ ኮሸና" ያጋና።
11 መና ጎዳይ አዛዝና፥ ዎጋ ጎለቱ ኮለታና፤ ቄር ጎለቱካ መኤረታና። 12 ፓራቱ ዛላ ቦላን ጋልፋናዉ ዳንዳዪኖ? ዎይ ቃይ ጎሻንቻይ ቦራ ዋጺደ፥ አባ ጎሻናዉ ዳንዳዪ? ሽን ህንተ ቱሙ ፕርዳ ማርዝያዉ፥ ጽሎተ አይፍያካ ጫሞ ላሜድታ። 13 ህንተ ሎዳባራ ካታማ ጾኔዳ ድራዉ ናሸቲታ፤ ቃይ፥ "ኑን ቃርናይማ ካታማካ ኑ ምኖተን ኦይቄዶ" ያጊታ።
14 መና ጎዳይ፥ ኡባፐ ዎልቃማ ጾሳይ ሀዋዳን ያጌ፤ "ህንተኖ፥ እስራኤልያ አሳቶ፥ ታን ህንተ ቦላ እት ካዉተ ደንና፤ ኡንቱንቱ ህንተና ሀማታ ፕኑዋፐ ዶሚደ፥ አራባ ዎምባ ጋካናዉ ቱጋያና" ያጌ።