አሞጻ 7

ቦሊ ያናዋ በስያ ሳፃ

1 ኡባ ሞድያ መና ጎዳይ ታና ሳፃ በሴዳ። ሄ ሳጻን ታን ካትያ ጋክያ ካይ ጫከቴዳዋፐ ጉይያን፥ ላኤንዋ ጫሬዳ ጫርሻ ቦላ እ ቦልያ ዉድያ መሽን በኣድ። 2 ኡንቱንቱ እርጻባ ኡባ ሚደ ዉርሴዳ ዎደ ታን፥ "አቤት ኡባ ሞድያ መና ጎዳዉ፥ ሀያና አቶ ጋርኪ! ያቆባ ዛራቱ ዋኒደ አታናዉ ዳንዳዪኖ? ኡንቱንቱ ቄር ጉቱዋቴ!" ያጋድ።

3 ሄዋ ድራዉ፥ መና ጎዳይ ቃረቴዳ፥ ባረ ቆፋ ላሜዳ፤ ላሚደ ሀዋዳን ያጌዳ፤ "ሀ ኔን በኤዳባይ ፖለተናዋ" ያጌዳ መና ጎዳይ።

ታማን ፕርዳናዋ በስያ ሳፃ

4 ኡባ ሞድያ መና ጎዳይ ታና ሀራ ሳፃ በሴዳ። ኡባ ሞድያ መና ጎዳይ ባረ አሳ ፕርዳናዉ ታማ ጼሴዳ፤ ሄ ታማይ ዎልቃማ ጪማ አባ ም ድጊደ፥ ቢታካ ጹጋናዉ ዶሜዳ። 5 ያትና ታን ሀዋዳን ያጋድ፤ "አቤት ኡባ ሞድያ መና ጎዳዉ፥ ሀያና ሀ ታማ ቶይሳርኪ! ያቆባ ዛራቱ ዋኒደ አታናዉ ዳንዳዪኖ? ኡንቱንቱ ቄር ጉቱዋቴ!" ያጋድ።

6 ሄዋ ድራዉ፥ መና ጎዳይ ቃረቴዳ፥ ባረ ቆፋ ላሜዳ፤ ላሚደ ኡባ ሞድያ መና ጎዳይ ሀዋዳን ያጌዳ፤ "ሀዌካ ቃይ ፖለተናዋ" ያጌዳ።

ግምቢያ ስታተ ልክያ ቱምቢያ በስያ ሳፃ

7 ቃይካ እ ታና ሀራ ሳፃ በሴዳ። ታን ሄ ሳጻን በእያ ዎደ፥ ጎዳይ ግምቢያ ስታተ ልክያ ቱምቢያ ኦይቂደ፥ ቱምቢያን ልከቲደ ግምበቴዳ ግምቢያ ማታን ኤቄዳ። 8 መና ጎዳይ ታና፥ "አሞጻ፥ ሀ ኔን ጼልያዌ አዬ?" ያጊደ ኦቼዳ።

ታን፥ "ቱምቢያ" ያጋድ።

መና ጎዳይ ታና፥ "በአ፥ ታን ታ አሳ እስራኤልያ ግዶን ቱምቢያ የጋይ፤ ታን ኡንቱንታ ሙረናን አከ። 9 ይሳቃ ዛራቱ ጎይንያ ቃ ሳአቱ ኮለታና፤ እስራኤልያ ጌሻ ሳአቱካ ያና፤ ቃይ እዮርባማ ካዉተ ቦላካ ታን ማሻና ደንዳና" ያጌዳ።

አሞጻነ አሜስያሳ

10 ቤቴለ ካታማን ቄስያ ግዲደ ደእያ አሜስያሴ እስራኤልያ ካትያ እዮርባመኮ ሀዋዳን ያጊደ ኪቴዳ፤ "አሞጽ እስራኤልያ አሳ ግዶን ደኢደ፥ ነ ቦላ ማቀቴዳ፤ እ ባረ ኦዱዋን ጋድያ ባይዜ። 11 አያዉ ጎፐ፥ እ ሀዋዳን ያጌ፤ ‘እዮርባም ማሻን ሀይቃና፤ እስራኤልያ አሳይካ ባረንቱ ጋድያፐ ኦሞደቲደ ባና’ ያጌ" ያጌዳ።

12 ያትና አሜስያሴ አሞጻ ሀዋዳን ያጌዳ፤ "ኔኖ ትምቢትያ ኦድያዎ፥ ባ፤ ህን ይሁዳ ቢታ ባቃታ ባደ፥ ያን ቁማ ማ፤ ትምቢትያ ያን ኦዳ። 13 ሽን ሀዌ ቤቴለ ካቲ ጎይንያ ሳኣነ ካዉተ ጌሻ ሳ ግድያ ድራዉ፥ ላኤን ሀ ሳኣን ትምቢትያ ኦዶፓ" ያጌዳ።

14 አሞጽ ዛሪደ፥ አማስያስ ሀዋዳን ያጌዳ፤ "ታን መህያ ሄምያዋነ ኡንቱንቱ አይፍያ ማጽያዋፐ አትና፥ ትምቢትያ ኦድያዋ ዎይ ትምቢትያ ኦድያዋ ናኣ ግድከ። 15 ሽን መና ጎዳይ ታና ዶርሳ ዉድያ ሄምያ ሳፐ አኪደ፥ ‘ባደ ታ አሳዉ እስራኤልያዉ ትምቢትያ ኦዳ’ ያጌዳ። 16 ሀእ ስም መና ጎዳይ ግያዋ ስሳ! ኔን፥ ‘እስራኤልያ ቦላ ትምቢትያ ኦዶፓ፤ ይሳቃ ዛራቱዋ ቦላካ ማርካቶፓ’ ያጋዳ። 17 ሄዋ ድራዉ፥ መና ጎዳይ ሀዋዳን ያጌ፤ ‘ነ ማቻታ ካታማ ግዶን ሻርሙጻ ግዳናዋ፤ ነ አቱማ ናናቱነ ነ ማጫ ናናይ ማሻን ሀይቃና፤ ነ ቢታይካ ዎዶሩዋን ሻከታና፤ ቃይ ኔን ነ ሁጲያዉካ አላጋ ጋድያን ሀይቃና። እስራኤልያ አሳይካ ባረንቱ ጋድያፐ ኦሞደቲደ ቱማ ባና’ ያጌ" ያጌዳ።