1 Timóteo 2

ዎሳ ጎልያ ዎሳ

1,2 ኑን ጾሳ ማላትያዋን፥ ጌሻተ ኡባን፥ ሳሮተንነ አሽከተን ደአና ማላ፥ አሳ ኡባዉ፥ ካተቶነ ሱንተይ ደእያ ኡባቶ፥ ጾሳ ኦቻናዉ፥ ዎሳናዉ፥ ጋናታናዉነ ጋላታናዉ በስያዋ ኡባባፐ ካሰታደ ታን ኔና ኤርሳይ። 3,4 አሳይ ኡባይ አታናዳንነ ቱማተ ኤራናዳን ኮይያ ኑና አሽያ ጾሳ ስንን ሀዌ ሎእያባነ ናሸችያዋ። 5 አያዉ ጎፐ፥ እት ጾሳይ ደኤ፤ ጾሳፐነ አሳፐ ግዱዋን ግዲደ ጋናትያ እቱ ደኤ። ሄዌካ ክርስቶስ የሱሳ ግያ አሳ። 6 እ አሳ ኡባ ዎዛናዉ ባረና ኡባዉ እሜዳ። ጾሳይ ባረ ዎድያን አሳ ኡባ ዎዛናዉ ኮይያዋ በስያ ማርካይ ሀዋ። 7 ታን ጾሳ ቃላ ኦድያዋ፥ የሱስ ኪቴዳዋነ ቃይ አማኑዋንነ ቱማተን አይሁዳ ግደና አሳ ታማርስያዋ ግዳደ ሱንቴዳዌ ሀዋሳ። ታን ዎርዶትከ፤ ቱሙዋ ሃሳያይ።

8 ሄዋ ድራዉ፥ ኡባ ሳን ደእያ አቱማ አሳይ ሀንቁነ ፓሉሚ ባይናን፥ ባረ ጌሻ ኩሽያ ፑደ ደንደ፥ ጾሳ ዎሳናዳን፥ ታን ኮያይ።

9,10 ሄዋዳን ቃይ ማጫዋንቱካ በስያ ማዩዋ ያሻተንነ ባረንታ ሞድያዋን ማይኖ። ጾሳዉ ያያይ ግያ ማጫ አሳ በስያዋዳን፥ ሎኦባ ኦያዋናፐ አትን፥ ሁጲያ ሹሩባ ዳድያዋን፥ ዎርቃን ዎይ እንቁዋን፥ ዎይ ዳሮ አልኦ አፍላን ባረና አሌቂሶፕኖ።

11 ማጫዉና ኡባባን ሞደታደ፥ ጮኡ ጋደ ታማሩ። 12 ታን ማጫዉና ጮኡ ጋደ ደኡ ጋይፐ አትን፥ አቱማ አሳ ታማርሱነ ዎይ ኡንቱንቱ ቦላ አዎቱ ጊከ። 13 አያዉ ጎፐ፥ አዳም ኮይሮ መቴዳ፤ ሄዋና ጉየፐ መታዱ።✝2:13 ዶመ 2:7፣ 21-22 14 ሄዋና ጭመታደ ጾሳ ህግያ መንዱፐ አትን፥ አዳም ጭመትቤና።✝2:14 ዶመ 3:1-6 15 ሽን ማጫዉና አማኑዋን፥ ሲቁዋን፥ ጌሻተንነ ባረና ሞዳደ ደኦፐ፥ ናና የልያዋን አታና።*2:15 ናና የልያዋን አታና፦ ናና የልያዋን ናገታ ደአና ጉሳ።