1 ማዛሙርያ ኡባፐ አያ ሶሎሞና ማዛሙሪ ሀዋ።

2 "ነ ሲቁ ዎይንያ ኤሳፐ አ ናሸችያ ድራዉ፥

ነ መተርሻን ዛራ ዛራደካ ታና የራ።

3 ነ ኦከትያ ሽቱ ዎት ሳዊ!

ነ ሱንይ ጼሰትያ ዎደካ አያ ናሸቺ!

ጌላዮቱ ኔና ሲቅያዌ ሄዋሳ።

4 ታና ኔናና አካደ ባ። ሃያ፥ አነ ላኡ እትፐ ዎጾይተ!

ታ ካትያዉ፥ ታና ነ ሲርጻ ገልሳ" ያጋዱ።

አባን ኑን አይ ኬሻ ናሸቴዶ!

ኑን አ ሲቁዋ ዎይንያ ኤሳፐካ አደ ናሸቶ።

ቱሙካ ማጫ አሳይ ኡባይ ኔና ሲቃናዉ በሴ ያጌድኖ።

5 ህንተኖ፥ የሩሳላመ ማጫ አሳቶ፥ ስስተ፥

ታን ካረ፤ ግዶፐነ፥ ማላንቻ።

ታ ካረተይ ቄዳረ ዱንካንያ ማላ፤

ሽን ታ ማላይ ሶሎሞና ካትያ ጎልያ ጋርዳቱዋ ማላ።

6 ታ ማላ ካረጽሴዳዌ ጹግያ አዋ፤

ታን ካረ ግዴዳ ድራዉ፥ ታና ካፓ።

ታ እሻቱ፥ ታ አት ናናቱ ታናና ዋላቀቲደ፥

ታና ዎይንያ ቱራ ናጋንቻ ኦድኖ፤

ያትና፥ ታን ታና ናጋበይከ።

7 ታ ሲቆዉ፥ አነ ታዉ ኦዳ፤

ነ ዶርሳ ዉድያ ኔን ሄምያዌ ሀቃኔ?

ጋላስ አዋፐ ነ ኡንቱንታ ሸምፕስያዌ ሀቃኔ?

ኔና ደማናዉ ነ ላገቱዋ ዉድያ ካላደ፥

አያዉ ዩሻንቻ ማጫ አሳ ግዶ? ያጋዱ።

8 ሀነ፥ ማጫ አሳ ኡባፐ አ ሎእያ ማላንቻቴ!

ሳኣ ኤራና ዮፐ፥ ዶርሳይ ቤዳ ሳ ካላደ ባ፤

ነ ዴሻ ማራቱዋካ ሄንንቻቱዋ ዱንካንያ ማታን ሄማ።

9 ታ ሲቃቴ!

ግብጼ ካትያ ፓራ ጋርያ ጎችያ ፓራቱዋ ግዶን ደእያ ማጋያቲዳን ሎኣሳ።

10 አቤት፥ ነ ሀይን ጎላካትያ አሌቁዋና ሺቂደ፥

ነ ጋጩ አያ ሎኢ! ነ ዚዚካ እንቁዋን አሌቀቴዳዋ።

11 ኑን ነዉ ብራን አሌቀቴዳ፥

ዎርቃ አሌቁዋ ኦስሳና ያጌድኖ።

12 ካቲ ማዳን ኡት ደእሽን፥

ታ ሽቱዋ ሳዉ ጎልያ ግዶ ኡባን ቶሹኩ ጌዳ።

13 ታ ሲቁ ታ ንቱዋፐ ግዱዋን ሸምፕያ ዎደ፥

አ ፔኑ ቃርጪትያና ደእያ ካዋራዳን ሳዌ።

14 ታ ሲቁ ኤንጋደ ጌተትያ ዎይንያ ሳኣን ዶሌዳ፥

ባዙዋ ጪሻ ማላ ያጋዱ።

15 ታ ሲቃቴ፥ ኔን ዋታ ሎአይ! ኔን ዋታ ሎአይ!

ነ አይፈቱ ሀራጵያ አይፍያዳን ሎኢኖ ያጌዳ።

16 ታ ሲቆዉ፥ ኔን አያ ሎአይ! አያ ናሸቻይ፤

ኑ አርሳይካ አጬዳ ማታዳን ናሸችያዋ።

17 ኑ ጎልያ ዛሩ ዝጋ፤ ካራይካ ጺዳን ዳደቴዳዋ ያጋዱ።