1 ማጫ አሳ ኡባፐ ማላንቻቴ!

ነ ላጊ ሀቃ ቤዴ? ኑንካ ኔናና እትፐ ኮያናዉ፥

እ ቤዳ ሳ ኑዉ ኦዳ ያጌድኖ።

2 ታ ሲቁ ዶርሳ ዉድያ ሄማናዉነ፥

ሎእያ ጪሻ ሺሻናዉ፥

ሽቱዋ ሳዉዋ ማታይ ደእያ አታክልትያ ግዶ ዎዳ።

3 ታን ታ ሲቁዋኖ፤ ታ ሲቁካ ታዋ።

እ ጪሻ ግዶን ዉድያ ሄሜ ያጋዱ።

4 ታ ሲቃቴ! ኔን ትርጻ ካታማይ ሎእያዋዳን ሎኣሳ፤

የሩሳላመዳን ዳሮ ሎኣሳ፤ ባንድራ ኦይቂደ፥

ሳልፕያን ብያ ኦላንቻይ ያሽያዋዳን ያሻሳ።

5 ሀያና ነ አይፍያ ታፐ ዎራ ዛራርኪ፥

አያዉ ጎፐ፥ ኡንቱንቱ ታና ዋይሲኖ።

ነ ብናናይ ጋላኣደ ደርያፐ ዎያ ዴሻ ዉድያ ማላቴ።

6 ነ አቻይ ሜጨቲደ ከስያ፥ ኡባይካ ማንትያ የልያ፥

ኡንቱንቱ ግዶን ማይኒ ባይና ዶርሳ ዉድያ ማላ።

7 ነ ላኡ ጋጮቱዋ ሻርቢያ ግዱዋና ጼልያ ዎደ፥

ላኡ ከሴዳ ሮማንያ ቴራ ማላቲኖ።

8 ኡሱፑን ታሙ ማጫ ካተቱነ ኡሱፑን ታሙ ባኮቱ፥

ቃይ ፓይዱ ባይና ዎዶሮቱ ታዉ ደኢኖ።

9 ሽን ታ ሀራጳታ፥ ታ ቶሺ ባይናና፥ አ ታዉ ዱማ።

አ ባረ አትስካ መጽ እትኖ፤

እዞ የሌዳ አታካ አያፐነ አደ እዞ ሲቃዉ።

ዎዶሮቱካ እዞ ጼሊደ፥ ሀና አንጀቴዳኖ ያጊኖ።

ማጫ ካተቱካ ባኮቱካ እዞ ሳቢኖ።

10 ሀና ዎንታ ጻልቂያዳን ዶልያና፥ አግናዳን ፖእያና፥

አዋዳን ጫድያና፥ ባንድራ ኦይቂደ ሳልፕያን ብያ ኦላንቻዳን፥

ያሽያና እዛ ኦኔ? ያጊኖ።

11 ታን ዎምባን ቶከቴዳ ምቱ ልጩዋ በአናዉ፥

ዎይንያ ቱራይ አጬደንቶነ ቃይ ሮማኒካ ጪሼደንቶነ ጼላናዉ፥

ዱገ አታክልትያ ሳኣ ዎይ።

12 ታን አኬከናን ደእሺና፥ ታ አሙ ታና አፊደ፥

ታ ካትያ ማታን፥ ፓራ ጋርያን ታና ኡትሴዳ ያጌዳ።

13 ኔኖ ሹላመ ቢታፐ ዬዳዉነ፥ ሃያ፤

ሃ ስማ! ኔና ኑ ሎይደ ጼላና፤ ሃ ስማ! ያጌድኖ።

ዳሮ አሳ ስንን የጽያ አሳዳን፥ ታኮ አያዉ ጼሊቴ? ያጋዱ።