ሲቁዋ ሳባ 5

ዎዳላይ:

1 ታ ሲቆ ምቻቶ ግድያ ታ ምሽራተ፥

በአ፤ ታን ታ አታክልትያ ግዶ ገላድ።

ታ ካርቢያነ ታ ሽቱዋ ጪሻ ቆራይ።

ኤሳ ኡክ ዮልታያደ ማይ።

ታ ዎይንያ ኤሳነ ታ ማ ኡሻይ ያጌዳ።

የሩሳላመ ዎዶራቱ:

ህንተኖ፥ አ ላገቶ፥ ሲቁዋ አላና ጋካናዉ ኡሽተ ያጌድኖ።

ወዶራታ:

2 ታን ቃማ ገምእሻድ፤ ሽን ታ ዎዛናይ ቤጎት ኡቴዳ።

ታ አኩሙዋን ታ ሲቁ ሀዋዳን ያጊደ፥

ፐንግያ ቆጺና ስሳድ፤ ታ ሙሹራቴ፥ ታ ሲቃቴ፥

ኔናን ዎያዌ ባይና ታ ሀራጳተ፥ ታዉ ካርያ ዶያ፤

ታ ሁጲ ከተርሳን ካኤዳ።

ታ ብናናይካ ቃማ ፑስያን ናርካኬዳ ያጌ።

3 ታን፥ ታ ማዩዋ ቃራ ድጋድ፤ ዛራ ማዮየ?

ታ ገድያ ሜጨታ ክቻድ፤ ዛራደ ኡርቃዮየ? ያጋድ።

4 ታ ሲቁ እፍ ጾእያና ባረ ኩሽያ ጎለ የዴዳ፤

ታ ዎዛናይ አ ድራዉ ፖድ ፖዴ።

5 ያትና፥ ታ ሲቆ ካርያ ዶያናዉ ደንዳድ።

ካርያ ዶይያ ኩልቡዋ ታን ኦይቂያ ዎደ፥

ታ ኩሽያፐ ካርቢ፥ ታ ብራያፐ ሽቱ ጾኬ።

6 ታ ሲቆ ካርያ ዶያድ፤ ሽን ዶይያ ዎደ እ ባዋ ብ ክቼዳ።

አ ኮሻ ስሳናዉ ሎይ አሞታድ።

ምንደ አ ኮያድ፤ ሽን ደማናዉ ዳንዳያበይከ።

ጼጋድ፤ ሽን ታዉ ኮይቤና።

7 ዩዪደ ካታማ ናግያዋንቱ ታና ደሚደ፥

ዋድኖነ ማዱድኖ፤

ካታማ ድርሳ ናግያዋንቱ ታ ቁማዩዋ ቃር አኬድኖ።

8 ህንተኖ የሩሳላመ ጌላዮቶ፥ ታ ሲቁዋ ደሞፐ፥

ታን አ ሲቁዋፐ ደንዴዳዋን ሀርግያዋ፥

ሀዳራ፥ አዉ ኦድተ ያጋዱ።

የሩሳላመ ዎዶራቱ:

9 ኔኖ፥ ማጫ አሳ ኡባፐ አዳ ማላንቻቴ!

ነ ሲቁ ቱሙ ሀራቱዋፐ ዋን ዱማቲ?

ኔን ሀዋ ኬሻ ኑና ጫልያዌ፥

እ ሀራቱዋፐ ዱማትያዌ አያኔ? ያጌድኖ።

ወዶራታ:

10 ታ ሲቁ ዳሮ ሎእያዋነ ምና፤

ታሙ ሻኡ አቱማ አሳ ግዶን አ ማል ባዋ።

11 አ ሁጲ ዎርቃ ሉልያ ማላቴ፤

አ ብናናይካ ሎአነ ቁሩዋ ማላ ካረ።

12 አ አይፊ ሻፋ ላንቂያን ኤቄዳነ፥

ማን ሜጨቴዳዋ ማላትያ ሀራጰቱዋ ማላቴ።

13 አ ጋጮቱካ ሳዉዋ ማታይነ፥

ቅማሚ ቶከቴዳ አታክልትያዳን ሎኢኖ፤

አ መተርሻቱ ካርቢያ ሽቱ ጾክያ ዎራ ጪሻዳን ሎኢኖ።

14 አ ኩሸቱ እንቁዋን አሌቀቴዳ ዎርቃ ጻምኣዳን ሎኢኖ፤

አ አሳተይ ሳምፔርያ ግያ እንቁዋን አሌቀቴዳ፥

ዳንጋርሳ አቻ ማላ።

15 አ ገደቱ ዎርቃ ባሱዋን ቶከቴዳ፥

እብናባራድያ ቱሳ ማላቲኖ፤

አ ማላይ ዝጋን አሌቀቴዳ ሊባኖሳ አሳ ማላ።

16 አ ዶናይ ኤሳዳን ማልኤ። እ ኡባናካ ሎእያዋ።

ህንተኖ የሩሳላመ ዎዶራቶ፥

ታ ሲቁነ ታ ላጊ ሀዋ ማላቴ ያጋዱ።