ሲቁዋ ሳባ 3

ወዶራታ:

1 ቃማ ኩመን ታ ሂጻን ግሳደ፥

ታ ሲቁዋ ደማናዉ አሞታድ፤ ምንሳደ ኮያድ፤

ሽን ደማናዉ ዳንዳያበይከ።

2 ካታማ ግዶን ደእያ አኮነ ጹን ኦገቱዋ ኡባን ዩያድ፤

ታ ሲቁዋ ደማናዉ ኮያድ፤ ምንሳደ ኮያድ፤

ሽን ደማናዉ ዳንዳያበይከ።

3 ካታማ ዩይ ናግያዋንቱ ታና ደሜድኖ፤

ታንካ፥ ታ ሲቁዋ በኤድቴ? ያጋደ ኡንቱንታ ኦቻድ።

4 ኡንቱንቱፐ ያ አነ ታ ሲቁዋ ደማ አጋድ።

እ ታፐ ከስ አከናዳን፥ ምንሳደ ኦይቃድ፤

ታ ዳይ ጎለ አካ አፋድ፤ ታ የለቴዳ ክፍልያ ገልሳድ።

5 ህንተኖ የሩሳላመ ያላጋ ማጫ አሳዉ፥

ሲቁ ባረዉ ዶሲደ ደንዳና ጋካናዉ፥

አ ህንተ ቤጎና ማላ፥

ታን ህንተና ገንኤቱዋንነ ባዙዋ ዶገቱዋን ጫላይ ያጋዱ።

ሶይዙዋባ

የሩሳላመ ዎዶሮቱ:

6 ሀዌ ባዙዋና ይያዌ፥ ጩዋ ቱሳ ማላትያዌ፥

ፔኑካ ዛልአንቻ እጻናዳንነ ካዋራዳን፥

ሳዊያዌ እ ኦኔ?

7 ሄዋ በእተ፥ ሶሎሞና ፓራ ጋሪ ዬ፤

ሄ ፓራ ጋሪ እስራኤልያፐ ዶረቴዳ ዎልቃማቱ፥

ኡሱፑን ታሙ ቶራንቻቱ አጃቤድኖ።

8 ኡንቱንቱ ኡባይካ ማሻ ኦይቀ ሜዘቴዳዋንታነ፥

ኦላንካ ፓጨቴዳዋንታ።

ቃማን ጋካና መቱዋ ኤቀታናዉ፥

ኡንቱንቱ እቱ እቱ ማሻ ግጺደ ጊጌዳዋንታ።

9 ካትያ ሶሎሞን ፓራ ጋርያ ግዶን፥

ባረዉ ኡትያ ካዉተ አራታ ጊግሴዳ።

እ አራታ ሊባኖሳ አሳፐ አሄዳ ምፐ ኦስሴዳ።

10 አራታ ቱሳቱ ብራን ሼሸቴድኖ፤

ገዲ ዎርቃን አሌቀቴዳ፤

ኡትያሳይ የሩሳላመ ዎዶራቱ ኦቻ ቴራ ማላትያ ቃጭናን፥

ሲቁዋን ዳዴዳ አፍላን ካመቴዳ ያጌድኖ።

ወዶራታ:

11 ህንተኖ፥ ጽዮነ ዎዶራቶ፥ ካትያ ሶሎሞና በአናዉ ሃይተ!

እ ሎይ ናሸቴዳ፥ አ ቡላቻ ጋላስ አ አታ አ ሁጲያን፥

ዎዳ ካላቻ ዎደ ኡቴዳ ያጋዱ።