1 ነ ታዉ አላጋ ግደናን ታ ዳይ ን ሜዳ ታ እሻ ግዳርኪሻ!

ያትንቶ ታን ኔና ኦግያን ደማደ ሺሻ አካ የርና፥

ታና ኦንነ ቦረናሽን።

2 ታና ታማርሴዳ ታ ዳይ ጎለ ታን ኔና ካለደ፥

ታ ዳይ ቆልኦ ገልሳ አግና፥

ሄዋን ታና ነ ሲቁዋባ ታማርሴዳዋ ግዳርኪ፤

ሮማንያ ጉምኤዳ ማልእያዋ፥

ሎእያ ዎይንያ ኤሳ ታን ኔና ሄዋን ኡሻርክታ።

3 ታና ሄዋን ነ ሀድርሳ ቄስያ ቦርኮትሳደ፥

ነ ኡሸቻ ኩሽያን ታና ቆሜዳዋ ግዳርኪ።

4 ህንተኖ የሩሳላመ ዎዶራቶ፥

ሲቁ ባረ ዎድያን ደንዳናዉ፥ ቃሰ ደንናዳን፥

ታ ህንተዉ ሀዳራ ጋይ ያጋዱ።

5 ባረ ሲቁዋ ሀሽያን ዘምፓደ፥

ባዙዋፐ ይያና ሀና ኦኔ? ያጌድኖ።

በን ነ አታ ኔና ባንካ የሌዳ፥

አፕልያ ላንቂያን ነ ግሳ ደእሽን፥

ኔና ታ ቃሰረደ ደንድ።

6 መና ሲቁዋን ታና ነ ዎዛና ቦላ አታማ፤

ነ ቀስያንካ ማታፋዳን፥ ታ ጻላላ ኦይቃ።

አያዉ ጎፐ፥ ሲቁ ሀይቁዋ ማላ ምና፤

ምሹካ ዱፉዋ ማላ መቀ ኢታ፤

አ ላጩካ ጾሳ ታማ ላጩዋ ማላ።

7 ሃ ዳሩ ሲቁዋ ታማ ቶይሳናዉ ዳንዳየና፤

ድኡካ ሜጪደ አፋናዉ ዳንዳየና።

አሳይ ሲቁዋ ሻማናዉ ባረዉ ደእያ አቁዋ ኡባ እሞፐካ፥

ሲቁ ሻሉዋን ሻመተና ድራዉ፥

አሳይ ሄዋ ካ ያጋዱ።

8 ኑዉ ትራን ንይ ኡትቤና ምቻታ ደአዉ፤

አስናይ እዞ ኦቾፐ፥ ኑን እዉ ኦናዌ አዬ?

9 እዛ ግምቢያ ድርሳ ግድንቶ፥ ኑን እ ቦላ ዎችያ አዱሳ፥

ብራ ግምቢያ ግምባና፤ አ ድርሳ ፐንገ ግድንቶ፥

ዝጋ ሳንቃን እዞ ዶድሳና ያጌድኖ።

10 ሄኮ ታን ድርሳ ግምቢያ፤

ታ ንይካ ግምቢያ ቦላ ግምበቴዳ ዎችያ ሳ፤

ሄዋ ድራዉ፥ ታን ታ ሲቁዋና ደእያ ዎደ፥ እ ታናን ናሸቴ።

11 ሶሎሞነዉ ባኣል-ሀሞናን ዎይኒ ቶከቴዳ ሾይቃይ ደኤ፤

ሄ ዎይንያ ግዱዋ ኦያዋንቶ ከራ እሜዳ።

ከራ አኬዳዋንቱ ቴራን ጎኤቴዳዋ ድራዉ፥

ሁጲያን ሁጲያን ሻኡ ብራ አዉ አሂኖ።

12 ሽን ታዉ ታ ቡዞ ዎይኒ ቶከቴዳ ሾይቃይ ደኤ፤

ሶሎሞና፥ ኔን ሻኡ ብራ አካ፤

አታክልትያ ኦያዋንቱ ላኡ ጼቱ ብራ አክኖ ያጋዱ።

13 ኔኖ፥ አታክልትያ ግዶን ደእያ ታ ሲቃቴ፥

ነ ኮሻ ላገቱዋ ስሳናዉ ኮዪኖ፤

ነ ኮሻ ታና ስሳ ያጌዳ።

14 ታ ሲቆዉ፥ ታኮ ኤለካ ሃያ!

ሳዊያ ማታይ ሞክያ ደረቱዋ ቦላና፥

ጉፕያ ገንእያ ዎይ ዶግያ ማራቱዋ ማላታደ ያጋዱ።