1 ህንተ አዛዘተናን እጼዳ ድራዉነ ህንተ ናጋራ ድራዉ፥ ካሰ ዎድያን አያና ሀይቁዋ ሀይቄድታ። 2 ሄ ዎደ ህንተ ሀ አላምያ የለታ ኢታ ኦግያ ሀመቴድታ፤ ጫርኩዋ ግዶን ደእያ ዎልቃማ አያናቱዋ ካፖ ቃይ ጾሳዉ አዛዘተና አሳ ሀእ ሞድያ አያናዉ አዛዘቴድታ። 3 ኑንካ ቃይ ኡባይ ሄ አሳ ማላ፤ ቃይ ኑን ኑ አሹዋ አሙዋዳን ደኤዶ፤ ኑ አሹነ ኑ ዎዛናይ ኮዬዳዋ ኦዶ። ኑንካ ሀራቱዋዳን፥ ኑ መታን ጾሳ ሀንቁዋ አካናዉ ደኤቶ።

4 ሽን ጾሳ ማሮተይ ዳራ ግድያ ድራዉ፥ ባረ ሲቁዋ ዳሩዋዳን፥ 5 ኑን አዉ አዛዘተናን እጺደ፥ ሀራይ አቶ አያናን ሀይቄዳዋንታ ግድናካ፥ እ ክርስቶሳና ኑዉ ደኡዋ እሜዳ። ጾሳ አ ኬካተን ህንተ አቴድታ። 6 ኑን ክርስቶስ የሱሳና ሳሉዋነ ሳኣነ ሞዳናዳን፥ ጾሳይ ኑና አናና እትፐ ሀይቁዋፐ ደንዳ። 7 እ ስንፐ ያና ዎድያን፥ ኑዉ ክርስቶስ የሱሳን ደእያ ኬካተን፥ ኡባፐ አያ ባረ አ ኬካተ ቃተ በሳናዉ ሄዋ ኦዳ። 8 አያዉ ጎፐ፥ ህንተ ጾሳ አ ኬካተን፥ አማኑዋን አቴድታ፤ ሀዌ ጾሳ እሙዋፐ አትን፥ ህንተ ኦሱዋና ግደና። 9 ህንተ ዳቡራን ቤትቤና ድራዉ፥ ህንተ ጬቀትያባይ አያይነ ባዋ። 10 አያዉ ጎፐ፥ ኑን ጾሳ መታ፤ እ ኑዉ ካሰቲደ ጊግስ ዎዳ ሎኦ ኦሱዋ ኑን ኦናዳን፥ ክርስቶስ የሱሳ ባጋና ኑና መዳ።

11 ሄዋ ድራዉ፥ ህንተኖ ዛርያን አይሁዳ ግደና አሳቶ፥ ባረንቱ አሳተ ቦላ ኩሽያን ኦሰቴዳዋን፥ ባረና ቃጻረቴዳዋንታ ግያ አይሁዳቱ፥ ቃጻረትቤናዋንታ ጊደ ጼስያዋንቶ፥ ህንተ ካሰ ኦነንቶ አኬክተ። 12 ሄ ዎደ ህንተ ክርስቶሳፐ ሻከቴድታ፤ እማ ግዲደ፥ እስራኤልያ አሳፐ ሃኪደ ደኤድታ፤ ጾሳይ ባረ አሳዉ እማና ጊደ ጫቄዳ ጫቁዋፐ አይነ ደምበይክታ፤ ሀ ሳኣ ቦላ ህንተ ደማና ጊደ፥ ናሸቻን ናግ ኡቴዳዋ ደመናንነ ቃይ ጾሳይ ባይናን ደኤድታ። 13 ሽን ህንተ ካሰ ሃኪደ ደእያዋንቱ ሀእ ክርስቶሳ የሱሳና ደኢደ፥ ክርስቶሳ ሀይቁዋን ማታ ሺቄድታ።

14 አያዉ ጎፐ፥ ክርስቶስ አይሁዳ አሳነ አይሁዳ ግደና አሳ እቱዋ ኦደ፥ ኑዉ ሳሮተ አሄዳ። ኡንቱንቱ ላኡዋ ሻኪደ፥ ሞርከ ኦ ዎዳ ሞርከተ ጎዳ ባረ አሳተን ኮል የጌዳ። 15 እ ባረ ሁጰዉ ሀ ላኡ ዛራቱዋፐ እት ኦራ አሳ መደ ሳሮተ ዎናዉ፥ አይሁዳ አሳቱዋ ህግያ አ አዛዛቱዋነ ዎጋቱዋና እትፐ ይሴዳ። 16 ክርስቶስ ማስቃልያ ቦላ ምስማርያን ሸቲደ ሀይቄዳ ባረ ሀይቁዋን ሞርከተ ይሴዳ፤ ቃይ ማስቃልያ ባጋና ላኡ ዛራቱዋካ እት አሳ ኦ ስገደ፥ ጾሳኮ አሄዳ። 17 ክርስቶስ ዪደ፥ ጾሳፐ ሃኪደ ደእያ ህንተንቶ አይሁዳ ግደናዋንቶነ፥ አ ማታን ደእያ አይሁዳቶ ኡባዉ፥ ምሽራቹዋ ቃላ ሳሮተ ኦዴዳ።✝ 18 አያዉ ጎፐ፥ ኑን ኡባይ፥ አይሁዳቱካ አይሁዳ ግደናዋንቱካ፥ እት ጌሻ አያናን ክርስቶሳ ባጋና አዉዋ ስን ሺቃናዉ ዳንዳዬቶ።

19 ስም ህንተ አይሁዳ ግደና አሳቱ ሀዋፐ ስንዉ አላጋ ዎይ እማ ግድክታ፤ ሀእ ህንተነ ጌሻቱ እት ቢታ አሳ፤ ቃይ ጾሳዉ ህንተ ሶይ አሳ። 20 የሱስ ኪቴዳዋንቱነ ትምቢትያ ኦድያዋንቱ ባሴዳ ባሱዋ ቦላ ህንተካ ኬጸቴድታ፤ ጎዳ ጻጱዋ ምንስያ ዋና ሹቻይ ክርስቶስ የሱሳ። 21 እ ጎልያ ኡባ እትፐ ሺሽ ኦይቂደ፥ ጾሳ ባጋና ጌሻ፥ ጾሳ ጌሻ ጎለ ግዳና ማላ ድቼ። 22 ህንተ ቃይ ጾሳይ ባረ አያናን ደእያ ጎልያ ግዳናዉ፥ ሀራቱዋ ኡባና እትፐ ክርስቶሳን ኬጸቲታ።