1 ካታቱዋ 21

ናቡተ ዎይንያ ቱራ ሳኣ

1 እዝራኤልያ ናቡተዉ ሳማርያ ካትያ አካባ ጎልያ ማታን እዝራኤላን ዎይንያ ቱራ ሳአይ ደኤ። 2 አካብ ናቡታ፥ "ታ ጎልያ ማታን ደእያ ድራዉ፥ ታን ታዉ አታክልትያ ሳኣ ኦናዉ ታዉ ነ ዎይንያ ቱራ ሳኣ እማ። አ ድራዉ ነዉ ታን ሀራ ሎኦ ዎይንያ ቱራ ሳኣ እማና፤ ዎይ ኔን ዶሶፐ፥ አ ጋትያ ታን ነዉ ጭጋና" ያጌዳ።

3 ናቡተ አካባዉ፥ "ታን ታ አዎቱዋፐ ላቴዳ ጋድያ ታና ነዉ እምስያባፐ መና ጎዳይ አሾ" ያጌዳ።

4 እዝራኤልያ ናቡተ፥ "ታን ታ አዎቱዋፐ ላቴዳ ጋድያ ነዉ እምከ" ጌዳ ድራዉ፥ አካብ ይሎቲደነ ላንጪደ ባረ ሶ ቤዳ። ባረ ግሱዋን ጎዳኮ ስም ግሲደ፥ ቁማ ሜናን እጼዳ።

5 አ ማቻታ ኤልዛቤላ አኮ ገላደ፥ "ኔን ሀዋ ኬና አያዉ ሀንቀታዲ? አያዉ ቁማ ሜናን እጻይ?" ያጋደ ኦቻዱ።

6 አካብ እዝዉ፥ "እዝራኤልያ ናቡታ ታን፥ ‘ነ ዎይንያ ቱራ ሳኣ ታዉ ዛልአ፤ ዎይ ነ ዶሶፐ፥ አ ድራዉ ታን ነዉ ሀራ ዎይንያ ቱራ ሳኣ እማና’ ያግና፥ እ፥ ‘ታ ዎይንያ ሳኣ ነዉ እምከ’ ያጌዳ። ታን ሄዋ ድራዉ ሀንቀታድ" ያጌዳ።

7 ማቻታ ኤልዛቤላ አ፥ "ኔን እስራኤልያ ቦላ ካትያ ግዳደ ሀዋዳን ሀናይ? ደንዳደ ማ! ዎዛናፐ ናሸታ! እዝራኤልያ ናቡተ ዎይንያ ቱራ ሳኣ ታን ነዉ እማና" ያጋዱ።

8 ሄዋ ድራዉ፥ ማቻታ አካባ ሱንን ዳብዳበቱዋ አ ማታፋን አታማደ ናቡተና እትፐ ካታማን ደእያ ጭማቶነ ዎልቃማ አሳቶ ኪታዱ። 9 ሄ ዳብዳበቱዋ ሀዋዳን ያጋደ ጻፋዱ፤ "እት ጋላሳዉ ጾማ አዋይተ፤ ያቲደ አሳ ግዱዋን ናቡታ ቦንቾ ሳኣን ኡትስተ። 10 ላኡ ፓና አሳቱዋ አ ስንን ኡትስተ። ሄ አሳቱ፥ ‘ናቡተ ጾሳነ ካትያ ቦሬዳ ያጊደ ማርካታናዳን ኦተ። ሄዋፐ ጉይያን ጋጻ ከሲደ፥ ሹቻን ጫድ ዎተ’ " ያጋደ ጻፋዱ።

11 ሄዋ ድራዉ፥ ናቡተና እትፐ ካታማን ደእያ ጭማቱነ ዎልቃማ አሳቱ ኤልዛቤላ ኡንቱንቶ ጻፌዳ ዳብዳበቱዋን ጌዳዋዳን ኦድኖ። 12 ኡንቱንቱ ጾማ አዋዪደ፥ ናቡታ አሳ ግዶን ቦንቾ ሳኣን ኡትሴድኖ። 13 ሄዋፐ ጉይያን ላኡ ፓና አሳቱ ዪደ፥ አኮ ስም ኡቲደ፥ አሳ ስንን፥ "ናቡተ ጾሳነ ካትያ ቦሬዳ" ያጊደ ዎርዱዋ ማርካቴድኖ። ናቡታ ካታማፐ ጋጻ ከሲደ፥ ሹቻን ጫዲደ ዎድኖ።

14 ሄዋፐ ጉይያን ጭማቱ ኤልዛቤልኮ ኪቲደ፥ "ናቡተ ሹቻን ጫደቲደ ሀይቄዳ" ያጌድኖ።

15 ናቡተ ሹቻን ጫደቲደ ሀይቄዳዋ ኤልዛቤላ ስሶ ሳናካ፥ አካባ፥ "እዝራኤልያ ናቡተ ነዉ ሻሉዋን ዛልአናዉ እጼዳ ዎይንያ ቱራ ሳኣ ደንዳ ባደ፥ ነዉ አካ። እ ሀእ ፓጻ ባዋ፤ ሀይቂክቼዳ" ያጋዱ። 16 እዝራኤልያ ናቡተ ሀይቄዳዋ አካብ ስሲደ፥ ናቡተ ዎይንያ ቱራ ሳኣ ባረዉ አካናዉ ደንዲደ፥ ዱገ ቤዳ።

17 ሄዋፐ ጉይያን ትሽቢያ ኤላሳኮ መና ጎዳ ቃላይ ዪደ፥ 18 "ሳማርያን ካተቴዳ እስራኤልያ ካትያ አካባና ጋከታናዉ ዱገ ዎ። እ ሀእ ናቡተ ዎይንያ ቱራ ሳኣ አካናዉ ቢደ፥ ያን ደኤ። 19 ኔን አ ሀዋዳን ያጋ፤ ‘መና ጎዳይ ኔና፥ "ብታንያ ዎደ፥ አ ጋድያ ነዉ አካዳ ግድኪ?" ያጌ’ ያጋ። ቃይካ አ፥ ‘መና ጎዳይ ኔና፥ "ናቡተ ሱ ካናቱ ላጬዳ ሳኣን ነ ሱካ ካናቱ ላጫና" ያጌ’ ያጋ" ያጌዳ።✝21:19 1 ካታ. 22:38

20 ሄዋፐ ጉይያን አካብ ኤላሳ፥ "ሀይ ታ ሞርክያዉ፥ ታና ደማድጋዲ?" ያጌዳ።

"ኤ፥ ታን ኔና ደማ ድጋድ፤ አያዉ ጎፐ፥ ኔን መና ጎዳ ስንን ኢታባ ኦናዉ፥ ነ ሁጲያ ናጋራዉ ዛልኣዳ። 21 ጾሳይ ኔና ሀዋዳን ያጌ፤ ‘ስሳ፥ ታን ነ ቦላ ኢታባ አሀና። ታን ነ ዘረ ይሳና፤ ታን እስራኤልያ ቢታን አካባ ጎልያ አሳፐ አይልያ ግድና ሎኡዋ ግድና፥ እት አቱማ አስነ አተናን ቆላና። 22 ታን ነ ሶ አሳ ናባጻ ናኣ እዮርባማ ሶ አሳዳንነ አኪያ ናኣ ባእሻ ሶ አሳዳን ኦና። አያዉ ጎፐ፥ ኔን እስራኤልያ አሳ ናጋራ ኦስሳደ፥ ታና ሀንቀዳ’ ያጌ። 23 ቃይ መና ጎዳይ ኤልዛቤልባ ኦዲደ፥ ‘እዝራኤላ ካታማ ግምቢያ ምይያን ካናቱ ኤልዛቤሎ ማና’ ያጌ።✝21:23 2 ካታ. 9:36 24 አካባ ዛርያ ግዴዳ ካታማን ሀይቂያ ኦናነ ካናይ ማና፤ ቃይ ጋጻርያን ሀይቂያ ኦናነ ሳሉዋ ካፎቱ ማና" ያጌዳ።

25 ባረ ማቻታ ኤልዛቤላ ደንና፥ መና ጎዳ ስንን ኢታባ ኦናዉ ባረ ሁጲያ ናጋራዉ ዛልኤዳ፥ አካባ ማላ አሳይ ኡባካ ባዋ። 26 መና ጎዳይ እስራኤልያ አሳ ስንፐ ላጊደ ከሴዳ አሞረቱዋዳን ኤቃዉ ጎይንያዋን አካብ አያ ሸነይያባ ሀኔዳ።

27 አካብ ሀ ሃሳያ ስሴዳ ዎደ፥ ባረ ማዩዋ ፔደ፥ ዋሩዋ ማዬዳ፤ ያቲደ ጾሜ። ዋሩዋ ማዮሳና ግሴዳ፤ ካዮቲደ ሀመቴዳ።

28 ሄዋፐ ጉይያን መና ጎዳ ቃላይ ትሽቢያ ኤላሳኮ ዪደ፥ 29 "አካብ ባረ ሁጲያ ታ ስንን ካዉሼዳዋ በኣዲ? እ ታ ስንን ባረ ሁጲያ ካዉሼዳ ድራዉ፥ ታን ሀ ባሻ አ ዎድያን አህከ። ሽን ታን አ ናኣ ዎድያን አ ሶ አሳ ቦላ ሀ ባሻ አሀና" ያጌዳ።