1 ካታቱዋ 16

1 ሀናና ናኣ ዬሁ ባጋና መና ጎዳ ቃላይ ባእሻባ ሀዋዳን ያጊደ ዬዳ፤ 2 "ታን ኔና ባናፐ ደንደ ታ አሳ እስራኤልያ ቦላ ካፑዋ ከሳድ፤ ሽን ኔን እዮርባማ ኦግያን ሀመታዳ። ቃይ ታ አሳ እስራኤልያ ናጋራ ኦስሳደ፥ ኡንቱንቱ ናጋራን ታና ሀንቀዳ። 3 ሄዋ ድራዉ፥ በአ! ታን ባእሻነ አ ጎልያ አሳ ፕታና ሀናይ። ባእሻ፥ ታን ነ ጎልያ አሳ ናባጻ ናኣ እዮርባማ ጎልያ አሳዳን ኦና። 4 ባእሻ ዛርያ ግዲደ፥ ካታማን ሀይቂያ ኦናነ ካናይ ማና፤ ቃይ ጋጻርያን ሀይቂያ ኦናነ ሳሉዋ ካፎቱ ማና" ያጌዳ።

5 ባእሽ ሀኔዳ ሀራባይ፥ እ ኦዳባይነ አ ምኖተ እስራኤልያ ካተቱ ታርክያ ማጻፋን ጻፈት ኡቴዳ። 6 ባእሽ ሀይቂደ ባረ ማይዛን ጋከቴዳ፤ ትርጻ ካታማን ሞገቴዳ። አ ናአይ ኤል አ ሳኣን ካተቴዳ። 7 መና ጎዳይ ትምቢትያ ኦድያ ዬሁ ባጋና ባእሻ ቦላነ አ ሶ አሳ ቦላ ሄ ትምቢትያ ኦዴዳ ጋሱ ባእሽ ኦዳ ናጋራ ድራሳነ እዮርባምነ አ ሶ አሳይ ኦዳዋዳን፥ ኢታባ ኦደ፥ መና ጎዳ ሀንቀዳ ድራሳ። ቃይ እ እዮርባማ ሶ አሳ ኡባ ዎ ዉርሴዳ ድራሳ።

እስራኤልያ ካትያ ኤልያ

8 ይሁዳ ካቲ አሲ ካተቴዳ ላታማነ ኡሱፑን ላይን ባእሻ ናአይ ኤል እስራኤላን ካተቴዳ። ትርጻ ካታማን እ ላኡ ላይ ካተቴዳ። 9 ካትያ ኦላ ጋዳዋቱዋፐ እቱዋ ግዲደ፥ አ ፓራ ጋረቱዋፐ ባጋ አዛዝያ ዝምር ካትያ ቦላ ማቀቴዳ። ካቲ ኤል ሄ ዎደ ትርጻን ደእያ ካትያ ጎለዉ አዎትያ አርጻ ሶን ትርጻን ማት ኡቴዳ። 10 ይሁዳ ካቲ አሲ ካተቴዳ ላታማነ ላፑን ላይን ዝምር አርጻ ሶ ገሊደ ካትያ ዎደ፤ አ ሳኣን ባረዉ ካተቴዳ።

11 ዝምር ካዉቲደ፥ ካዉተ አራታን ኡቶሳናካ ባእሻ ሶ አሳ ኡባ ዎዳ። ባእሻዉ ዳቦ ግዲና ላገ ግዲና እት አቱማ አሳነ ፓጻ አሽቤና። 12 ትምቢትያ ኦድያ ዬሁ ባጋና መና ጎዳይ ባእሻ ቦላ ሃሳዬዳ ቃላዳን ዝምር ባእሻ ሶ አሳ ኡባ ዎ ይሴዳ። 13 ሄዌ ሀኔዳዌ ባእሽነ አ ናአይ ኤል ባረንቱ ኤቃዉ ጎይኒደ፥ ኦዳ ናጋራ ኡባ ጋሱዋንነ እስራኤልያ አሳ ኦስሴዳ ናጋራ ጋሱዋን፥ መና ጎዳ፥ እስራኤልያ ጾሳ ሀንቀዳ ድራሳ።

14 ኤል ሀኔዳ ሀራባይነ እ ኦዳባይ ኡባይ እስራኤልያ ካተቱ ታርክያ ማጻፋን ጻፈት ኡቴዳ።

እስራኤልያ ካትያ ዝምራ

15 ይሁዳ ካቲ አሲ ካተቴዳ ላታማነ ላፑን ላይን ዝምር ትርጻን ላፑን ጋላሳ ጻላላ ካተቴዳ። ሄ ዎደ እስራኤልያ ኦላንቻቱ ግባቶና ጌተትያ ፕልስጼማ ካታማ ዶዲደ ኡቴድኖ። 16 ዶድ ኡቴዳ እስራኤላቱ ዝምር ካትያ ቦላ ማቀቲደ አ ዎዳዋ ስሴዳ ዎደ፥ ኦላ ጋዳዋ ኦምራ ሄ ጋላስካ ሄ ሳኣን እስራኤልያ ካትያ ከሲደ ካተዬድኖ። 17 ኦምርነ አናና ደእያ እስራኤልያ አሳይ ኡባይ ግባቶና ካታማፐ ከሲደ ቢደ፥ ትርጻ ካታማ ዶዴድኖ። 18 ካታማይ ኦይቀትክቼዳዋ በኤዳ ዎደ፥ ዝምር ካትያ ጎልያ ግዶን ደእያ ጌሱዋ ገሊደ፥ ካትያ ጎለን ታማ ኦይዳ፤ ያቲደ እካ ሀይቄዳ። 19 ሄዌ ሀኔዳዌ እዮርባም ኦዳ ናጋራነ እስራኤልያ አሳ ኦስሴዳ ናጋራ ካሊደ፥ ዝምር መና ጎዳ ስንን ኢታባ ኦዳ ድራሳ።

20 ዝምር ሀኔዳ ሀራባይነ እ ማቄዳ ማቁ እስራኤልያ ካተቱ ታርክያ ማጻፋን ጻፈት ኡቴዳ።

እስራኤልያ ካትያ ኦምራ

21 ሄ ዎደ እስራኤልያ አሳይ ላኡ ከሲደ ሻከቴዳ። አሳፐ ባጋይ ግናታ ናኣ ቲብና ካተያናዉ ኮይና፥ ባጋይ ቃይ ኦምራ ካተያናዉ ኮዬዳ። 22 ሽን ኦምራ ማድያ አሳይ ግናታ ናኣ ቲብና ማድያ አሳፐ ምኔዳ። ሄዋ ድራዉ፥ ቲብን ሀይቂና ኦምር ካተቴዳ።

23 ይሁዳ ካቲ አሳይ ካተቴዳ ሀታማነ እተን ላይን ኦምር እስራኤልያ አሳ ቦላ ካተቴዳ። ታማነ ላኡ ላይ ሞዴዳ፤ ሄዋፐ ኡሱፑን ላይ ትርጻን ሞዴዳ። 24 ኦምር ሳማርያ ግያ ደርያ ሸሜራ ጌተትያ ብታንያፐ ኡሱፑን ሻአ ጻጋራ ብራን ሻሜዳ፤ እት ካታማ አን ኬጼዳ። ያቲደ ሄ ካታማ ካሰ ሄ ደርያ ጎዳ ሱንን ሳማርያ ጊደ ሱንዳ።

25 ሽን ኦምር መና ጎዳ ስንን ኢታባ ኦዳ፤ እ ባረፐ ካሰ ደኤዳ ካተቱዋ ኡባቱዋፐካ አያ ናጋራ ኦዳ። 26 ናባጻ ናአይ እዮርባም ኦዳ ናጋራነ እስራኤልያ አሳ ኦስሴዳ ናጋራ ኦምር ካሌዳ፤ ሄ ኤቃዉ ጎይንያ ሀኖታይ መና ጎዳ እስራኤልያ ጾሳ ሀንቀዳ።

27 ኦምር ሀኔዳ ሀራባይ፥ እ ኦዳባይነ አ ምኖተ እስራኤልያ ካተቱ ታርክያ ማጻፋን ጻፈት ኡቴዳ። 28 ኦምር ሀይቂደ ባረ ማይዛን ጋከቴዳ፤ ሳማርያ ካታማን ሞገቴዳ። አ ናአይ አካብ አ ኮታን ካተቴዳ።

እስራኤልያ ካትያ አካባ

29 ይሁዳ ካቲ አሳይ ካተቴዳ ሀታማነ ሆስፑን ላይን ኦምራ ናአይ አካብ እስራኤላን ካተቴዳ፤ ኦምራ ናአይ አካብ ሳማርያ ካታማን እስራኤልያ ቦላ ላታማነ ላኡ ላይ ካተቴዳ። 30 ኦምራ ናአይ አካብ ባረፐ ካሰ ዎደ ደኤዳ ካተቱዋ ኡባቱዋፐካ አያ ኢታባ መና ጎዳ ስንን ኦዳ። 31 ናባጻ ናአይ እዮርባም ኦዳ ናጋራ ኦያዋ ላፋባ ጊደ ቆፕያዋ ጻላላ ግደናን ሲዶናቱዋ ካትያ ኤትባኣላ ናቶ ኤልዛቤሎ ባረዉ ማቾ ኦ አኪደ፥ ባኣላ ጌተትያ ኤቃዉ ኦናዉነ ጎይናናዉ ዶሜዳ። 32 ሳማርያ ካታማን እ ኬጽሴዳ ባኣላ ኤቃ ጎለን ባኣላዉ ያርሽያ ሳኣ ኬጼዳ። 33 ቃይ አካብ አሼሮ ጌተትያ ጾሳት ምስልያ ኤሲደ፥ ባረፐ ካሰ ደኤዳ ካተቱዋ ኡባቱዋፐ አደ መና ጎዳ እስራኤልያ ጾሳ ሀንቀያ ናጋራ ኦዳ።

34 አካባ ካዉተ ዎደ ቤቴለፐ ዬዳ ሂኤላ ጌተትያ እት ብታኒ ያርኮ ካታማ ዛረደ ኬጼዳ። ነዊ ናኣ ኢያሱ ባጋና መና ጎዳይ ኦዴዳዋዳን፥ ሂኤል ያርኮ ኬጻናዉ ባስያ ዎደ፥ አቢራማ ጌተትያ አ ባይራ ናአይ ሀይቄዳ፤ ቃይ ፐንግያ አያ ዎደ ሳጉባ ጌተትያ አ ዉርሰ ቴፋ ናአይ ሀይቄዳ።✝16:34 ኢያሳ 6:26