1 ካታቱዋ 13

ቤቴለ ቦላ ትምቢትያ ኦዴዳ ብታንያ

1 እዮርባም እጻና ጩዋያናዉ ያርሹዋ ያርሽያ ሳኣ ማታን ኤቂደእሽን፥ መና ጎዳ ቃላን ኪተቴዳ፥ ጾሳ አሳ ጌተትያ እት ብታኒ ይሁዳፐ ዬዳ። 2 መና ጎዳይ አዛዝና ሄ ያርሽያ ሳኣ ቦላ ሀዋዳን ያጊደ ዋሴዳ፤ "ያርሽያ ሳአዉ፥ ያርሽያ ሳአዉ፥ መና ጎዳይ ኔና ሀዋዳን ያጌ፤ ‘ዳዊታ ዛርያዉ ዮስያሳ ጌተትያ እት ናአይ የለታናዋ። ሄ ናአይ ሀእ ሀዋን ያርሺደ ደእያ ቃ ሳአቱ ቄሳቱ ዋ ነ ቦላ ያርሻና፤ ነ ቦላ አሳ መቀይ ጹገታና’ ያጌ" ያጊደ ዋሴዳ።✝13:2 2 ካታ. 23:15-16 3 ሄ ጋላስ ጾሳ አሳይ ማላታ እሚደ፥ "መና ጎዳይ ኦዴዳ ማላታይ ሀዋ፤ ሀ ያርሽያ ሳአይ ጳልቀታና፤ አ ቦላን ደእያ ብድንይካ ዎራ ላለታናዋ" ያጌዳ።

4 ካቲ እዮርባም ጾሳ አሳይ ቤቴለን ደእያ ያርሽያ ሳኣ ቦላ ዋሴዳዋ ስሴዳ ዎደ፥ ያርሽያ ሳኣፐ ባረ ኩሽያ የዲደ፥ "ሄ ብታንያ ኦይቂተ!" ያጌዳ። ሽን እ ብታንያዉ የዴዳ ኩሺ ኤለካ ጺጊደ ስሌዳ፤ ሄዋ ድራዉ፥ ባረ ኩሽያ ጉየ ዛሪደ አካናዉ ዳንዳይቤና። 5 ቃይ ጾሳ አሳይ መና ጎዳ ቃላን እሜዳ ማላታዳን ያርሽያ ሳአይ ጳልቀት ዎና፥ አ ቦላን ደእያ ብድንይካ ዎራ ላለቴዳ። 6 ያትና፥ ካቲ እዮርባም ጾሳ አሳ፥ "ታ ኩሺ ካሰዋዳን ሀናና ማላ ታዉ ጋናታደ መና ጎዳ ነ ጾሳ ዎሳርኪ!" ያጌዳ። ሄዋ ድራዉ፥ ጾሳ አሳይ ካትያዉ ጋናቲደ መና ጎዳ ዎስና፥ ካትያ ኩሺ ስሚደ ካሰዋዳን ሀኔዳ።

7 ካቲ ጾሳ አሳ፥ "ታናና ታ ሶ ደንዳ፤ ቁማ ማ። ቃይ ታን ነዉ እሞታ እማና" ያጌዳ።

8 ሽን ጾሳ አሳይ ካትያዉ ሀዋዳን ያጊደ ዛሬዳ፤ "ሀራይ አትና ኔን ነ አቆ ባጋ ታዉ እምንቶካ፥ ታን ኔናና ቢከ፤ ሀዋን ኡክካ ሚከ፥ ሃካ ኡሽከ። 9 አያዉ ጎፐ፥ መና ጎዳ ቃላይ ታና፥ ‘ኔን ኡክካ ሞፓ፥ ሃካ ኡሾፓ፥ ነ ዬዳ ኦግያናካ ስማደ ቦፓ’ ያጊደ አዛዜዳ" ያጌዳ። 10 ሄዋ ድራዉ፥ ብታኒ ሀራ ኦግያና ቤዳ፤ እ ቤቴለ ዬዳ ኦግያና ስሚደ ብቤና።

ቤቴለን ትምቢትያ ኦድያ ጭማ ብታንያ

11 ትምቢትያ ኦድያ እት ጭማ ብታኒ ቤቴለ ካታማን ደኤ። ቤቴለን ሄ ጋላስ ጾሳ አሳይ ኦዳ ኡባባ ሄ ጭማ ብታንያ ናናይ ዪደ ኦዴድኖ፤ ቃይ ሄ ብታኒ ካትያዉ ኦዴዳ ቃላ ኡንቱንቱ ባረንቱ አዎ ኦዴድኖ። 12 አዉ ኡንቱንታ፥ "ሀቃ ኦግያና ቤዴ?" ያጌዳ፤ ይሁዳፐ ዬዳ ጾሳ አሳይ ቤዳ ኦግያ አዉ ማላቴድኖ። 13 ሄዋፐ ጉይያን እ ባረ ናና፥ "ታዉ አነ ሀርያ ኮርተ" ያጌዳ፤ ኡንቱንቱ አዉ ሀርያ ኮርና ቶጌዳ። 14 ጾሳ አሳ ጌዱዋ ካሊደ ቤዳ፤ እት ዎላ ኩዋን ኡቴዳዋ ደሚደ፥ "ይሁዳፐ ዬዳ ጾሳ አሳይ ኔኔየ?" ያጌዳ።

ብታኒ፥ "ኤ ታና" ያጌዳ።

15 ትምቢትያ ኦድያ ጭማ ብታኒ አ፥ "ቁማ ማናዉ ታ ሶ ታናና ደንዳ" ያጌዳ።

16 ጾሳ አሳይ ዛሪደ፥ "ታን ጉየ ስማደ ኔናና ባናዉ፥ ዎይ ሀ ኮሽያን ኔናና ኡክ ማናዉ፥ ዎይ ሃ ኡሻናዉ ዳንዳይከ። 17 አያዉ ጎፐ፥ መና ጎዳይ ቃላይ ታና፥ ‘ኔን ሄ ሳኣን ኡክካ ሞፓ፥ ሃካ ኡሾፓ፥ ነ ዬዳ ኦግያናካ ስማደ ቦፓ’ ያጊደ አዛዜዳ" ያጌዳ።

18 ትምቢትያ ኦድያ ጭማ ብታኒ፥ "ታንካ ኔናዳን ትምቢትያ ኦድያዋ። ኪታንቻይ መና ጎዳይ ቃላን ታና፥ ‘ኡክ እ ማና ማላነ ሃ ኡሻና ማላ፥ አ ዛራደ ነ ሶ ኔናና አካደ ያ’ ያጌዳ" ያጌዳ። ሽን ጭማ ብታኒ ሄዋ አዉ ዎርዱዋ ኦዴዳ። 19 ሄዋ ድራዉ፥ ጾሳ አሳይ አናና ስሚደ፥ አ ሶን ሜዳነ ኡሼዳነ።

20 ኡንቱንቱ ማዳን ኡት ደእሽን፥ መና ጎዳ ቃላይ ብታንያ ጉየ ዛሬዳ ትምቢትያ ኦድያ ጭማ ብታንያኮ ዬዳ። 21 ብታኒ ይሁዳፐ ዬዳ ጾሳ አሳዉ ባረ ቃላ ቁ ኦደ፥ "መና ጎዳይ ሀዋዳን ያጌ፤ ‘ኔን መና ጎዳ ቃላ እጻዳ፤ መና ጎዳይ ነ ጾሳይ ኔና አዛዜዳ አዛዙዋካ ናጋባካ። 22 ኔን ጾሳይ፥ "ሄ ሳኣን ሞፓ ዎይ ኡሾፓ" ጌዳ ሳኣ ጉየ ስማደ ባደ፥ ያን ኡክ ማዳ፤ ሃካ ኡሻዳ። ሄዋ ድራዉ፥ ነ አሃይ ነ አዎቱዋ ዱፉዋን ሞገተና’ ያጌ" ያጌዳ።

23 ጾሳ አሳይ ምያዋነ ኡሽያዋ ፖሌዳዋፐ ጉይያን፥ ትምቢትያ ኦድያዌ ባረ ጉየ ዛሪደ አሄዳ ብታንያዉ ሀርያ ኮሬዳ። 24 እ ኦግያን ቢሽን ጋሙ አናና ጋከቲደ፥ አ ዎዳ። አሃይ ኦግያን ፓንጋራሬዳ፤ ሀሪነ ጋሙነ ላአቱካ አሃ ምይያን ኤቄድኖ። 25 ሄ ኦግያና አያ አሳይ አሃይ ፓንጋራሬዳዋነ ጋሙ አሃ ምይያን ኤቄዳዋ በኤዳ፤ ቢደ ትምቢትያ ኦድያ ጭማ ብታኒ ደእያ ካታማን ኦዴዳ።

26 ብያ ሳፐ ብታንያ ጉየ ዛሬዳ ትምቢትያ ኦድያ ጭማ ብታኒ ሄዋ ስሴዳ ዎደ ሀዋዳን ያጌዳ፤ "ሄዌ ቃላዉ አዛዘተናን እጼዳ ጾሳ አሳ። ሄዋ ድራዉ፥ መና ጎዳ ቃላይ አዉ ካሰቲደ ኦዴዳዋዳን፥ መና ጎዳይ ጋሙዋን አ ጋዳ፤ ያትና፥ ጋሙ አ መንሬደ ዎዳ" ያጌዳ።

27 ሄዋፐ ጉይያን ጭማ ብታኒ ባረ ናና፥ "ታዉ ሀርያ ኮርተ" ያጌዳ። ኡንቱንቱ አዉ ሀርያ ኮሬድኖ፤ 28 ብታኒ ከሲደ ቤዳ። ኦግያን ፓንጋራሬዳ አሃነ አሃ ማታን ኤቄዳ ሀርያነ ጋሙዋ ደሜዳ፤ ጋሙ አሃ ምቤና ዎይ ሀርያካ መንቤና። 29 ትምቢትያ ኦድያ ጭማ ብታኒ ጾሳ አሳ አሃ ደንደ፥ ሀርያ ዞክያን ዎደ፥ ዬካናዉነ ሞጋናዉ ጉየ ባረ ካታማ አኪደ አሄዳ። 30 ባረዉ ማክ ዎዳ ዱፉዋን አሃ ዎዳ፤ አ ቦላ፥ "አየ ታ እሻዉ! አየ ታ እሻዉ!" ያጊደ ዬኬድኖ።

31 ሞግ ስሚደ ባረ ናና ሀዋዳን ያጌዳ፤ "ታን ሀይቂያ ዎደ፥ ጾሳ አሳይ ሞገቴዳ ዱፉዋን ታና ሞግተ፤ ታ መቀቱዋካ አ መቀቱዋ ጋጻን ዎተ። 32 አያዉ ጎፐ፥ ቤቴለ ካታማን ደእያ ያርሽያ ሳኣ ቦላነ ሳማርያ ካታማቱዋን ደእያ ጎይንያ ቃ ሳአቱ ቦላ መና ጎዳይ አዛዝና ሄ ብታኒ ዋሶዌ ቱሙ ፖለታና" ያጌዳ።

እዮርባማ ጎልያ አሳ ይሳናዉ ጋዳ ናጋራ

33 ሄዋፐ ጉየና እዮርባም ባረ ኢታ ኦግያፐ ስምቤና፤ ሽን ጎይንያ ቃ ሳቶ ኡባ ቆሞ አሳፐ ቄሳቱ ዋ ጉጂደ ሱንዳ፤ ቄሳቱዋ ግዳናዉ ኮይያ ኦናነ ጎይንያ ቃ ሳኣን ዎዳ። 34 እዮርባማ ጎልያ አሳ ኡንጋናዉነ ቢታ ቦላፐ ይሳናዉ ጋዳ ናጋራይ ሄዋ።