1 ካታቱዋ 22

ትምቢትያ ኦድያ ምካስ አካባዉ ጾነትያዋ ኦዴዳ

1 ሶሪነ እስራኤሊ ኦለተናን ሄዙ ላይ ሳሮ ደኤድኖ። 2 ሄዛን ላይን ይሁዳ ካቲ ዮሳፌጸ እስራኤልያ ካትያ በአናዉ ቤዳ። 3 እስራኤልያ ካቲ ባረ ቆማቶ፥ "ጋላኣደን ደእያ ራሞታ ካታማይ ኑዋ ግድያዋነ ኑን ሀኖ ጋናዉ ሄ ካታማ ሶርያ ካትያፐ ዎ አካናዉ አይነ ኦቤናዋ ኤርክቴ?" ያጌዳ። 4 ቃይካ እ ዮሳፌጻ፥ "ጋላኣደን ደእያ ራሞታ ካታማ ኦላናዉ ታናና ባኒ?" ያጌዳ።

ዮሳፌጸ እስራኤልያ ካትያ፥ "ኤ፥ ኔን ኦላ ባናዉ ጊግያ ዎደ አዉደነ፥ ታን ጊጋና። ታ ኦላንቻቱ ነ ኦላንቻቱዋ ማላ፤ ታ ፓራቱካ ነ ፓራቱዋ ማላ" ያጌዳ። 5 ቃይካ ዮሳፌጸ እስራኤልያ ካትያ፥ "ግዶፐነ፥ ኔን ካሰታደ መና ጎዳ ኦቻ" ያጌዳ።

6 እስራኤልያ ካቲ ትምቢትያ ኦድያ ኦይዱ ጼቱዋ አሳቱዋ እትፐ ሺሺደ፥ "ጋላኣደን ደእያ ራሞታ ካታማ ኦላናዉ ቦ ቦፖ?" ያጊደ ኡንቱንታ ኦቼዳ።

ኡንቱንቱ፥ "ባ፤ አያዉ ጎፐ፥ ጾሳይ ሄ ካታማ ካትያ ነ ኩሽያን አደ እማና" ያጌድኖ።

7 ሽን ዮሳፌጸ፥ "ኑን መና ጎዳ ኦቻናዉ ዳንዳይያ ትምቢትያ ኦድያ ሀራ አሳይ ሀዋን ባዌ?" ያጌዳ።

8 እስራኤልያ ካቲ ዮሳፌጻዉ ዛሪደ፥ "ኑን አ ባጋና መና ጎዳ ኦቻናዉ ዳንዳይያ እት ሀራ ብታኒ ደኤ፤ እ ይምላ ናኣ ምካሳ። ሽን ታን አ እጻይ፤ አያዉ ጎፐ፥ እ ኡባ ዎደካ ታዋ ኢታባ ኦዴፐ አትና ሎኦባ ኦድ ኤረና" ያጌዳ።

ዮሳፌጸ እስራኤልያ ካትያ፥ "ካቲ ሄዋዳን ጎፖ!" ያጌዳ።

9 ሄዋፐ ጉይያን እስራኤልያ ካቲ ባረ ኦሳንቻቱዋፐ እቱዋ ጼሲደ፥ "ይምላ ናኣ ምካሳ ኤለካ አካደ ያ" ያጌዳ።

10 እስራኤልያ ካቲነ ይሁዳ ካቲ ዮሳፌጸ ባረንቱ ካዉተ ማዩዋ ማዪደ፥ ሳማርያ ካታማ ገልያ ፐንግያ ማታን ደእያ ኡዱማን ባረንቱ ካዉተ አራታን ኡቴድኖ፤ ትምቢትያ ኦድያ ኡባቱ ኡንቱንቱ ስንን ትምቢትያ ኦዲኖ። 11 ኡንቱንቱፐ እቱ፥ ካናእና ናአይ ጽድቂ ብራታፐ ካጨቱዋ ጊግሲደ፥ አካባ፥ "መና ጎዳይ ሀዋዳን ያጌ፤ ‘ሶረቱ ያና ጋካናዉ ኔን ኡንቱንታ ሀ ካጨቱዋን ቃይጫና’ ያጌ" ያጌዳ። 12 ትምቢትያ ኦድያ ሀራ ኡባቱካ፥ "ጋላኣደን ደእያ ራሞታ ካታማ ባደ ኦላ፤ ኦላደካ ጾና። አያዉ ጎፐ፥ መና ጎዳይ ሄ ካታማ ካትያ ኩሽያን አደ እማና" ያጊደ ኦዴድኖ።

13 ሄዋፐ ጉይያን ምካሳ ጼሳናዉ ኪተት ቤዳ ብታኒ አ፥ "በአ፥ ትምቢትያ ኦድያ ኡባቱ እት ዶና ግዲደ፥ ‘ካቲ ሀ ኦላ ጾናና’ ያጊደ ኦዴድኖ። ሄዋ ድራዉ፥ ሀያና ነ ኦዱካ ኡንቱንቱፐ እቱዋ ማላ ግዶ፤ ኔንካ ሎኦባ ኦዳ" ያጌዳ።

14 ሽን ምካስ ሄ ብታንያ፥ "መና ጎዳይ ኤሮ! መና ጎዳይ ታዉ ኦድያዋ ታን ኦዳና" ያጌዳ።

15 ምካስ ካትያኮ ዬዳ ዎደ፥ ካቲ አ፥ "ምካሳ፥ ኑን ጋላኣደን ደእያ ራሞታ ካታማ ኦላናዉ ባኔየ ቦፓነ?" ያጊደ ኦቼዳ።

ምካስ ካትያ፥ "ባደ ኦላ፤ ኦላደካ ጾና። መና ጎዳይ ሄ ካታማ ካትያ ኩሽያን አደ እማና" ያጌዳ።

16 ካቲ አ፥ "ኔን መና ጎዳ ሱንን ቱሙዋፐ አትና ሀራባ ታዉ ኦደናዳን ታን ኔና አፑ ገደ ጫቀናዉ ኮሺ?" ያጌዳ።

17 እ፥ "እስራኤልያ ኦላንቻቱ ኡባይ ሄንንቻይ ባይና ዶርሳቱዋዳን ደርያን ላለቴዳዋንታ ታን በኣድ። መና ጎዳይ ኡንቱንታ፥ ‘ሀዋንቶ ጎዳይ ባዋ። ኡንቱንቱ ኡባይካ ባረንቱ ሶ ባረንቱ ሶ ሳሮ ቢኖ’ ያጌ" ያጌዳ።✝22:17 ፓይ. 27:17፤ ማቶሳ 9:36፤ ማር. 6:34

18 እስራኤልያ ካቲ ዮሳፌጻ፥ " ‘እ ታዋ ኢታባ ኦዴፐ አትና፥ ሎኦባ ኦድ ኤረና’ ጋደ፥ ታን ነዉ ኦዳበይክታ?" ያጌዳ።

19 ምካስ ጉጂደካ ሀዋዳን ያጌዳ፤ "ስም መና ጎዳይ ግያዋ ስሳ! መና ጎዳይ ባረ ካዉተ አራታን ኡትና፥ ሳሉዋ ኦላንቻቱ ኡባይ አ ኡሸቻናነ ሀድርሳና ኤቄዳዋንታ ታን በኣድ።✝22:19 ኢሳ. 6:1፤ ኢዮባ 1:6 20 መና ጎዳይ፥ አካበ ጋላኣደን ደእያ ራሞታ ካታማ ቢደ፥ ያን ሀይቃናዳን ባለናዌ ኦኔ? ያጌዳ። እቱ ሀዋዳን ግያ ዎደ፥ ሀራይ ቃይ ሄዋዳን ጌዳ። 21 ሄዋፐ ጉይያን ኢታ አያናይ ከሲደ መና ጎዳ ስንን ኤቂደ፥ ‘ታን አ ባለና’ ያጌዳ።

22 "መና ጎዳይ አያና፥ ዋታ ባለን? ያጌዳ።

"አያናይ፥ ‘ታን ከሳ ባደ፥ አዉ ትምቢትያ ኦድያዋንቱ ኡባቱዋ ዶናን ዎርዶትያ አያና ግዳና’ ያጌዳ።

"መና ጎዳይ፥ ‘ኤ፥ ኔን አ ባለና፤ ነዉ ሄዌ ሀናና። ባደ ባለ’ ያጌዳ" ያጌዳ።

23 ምካስ ጉጂደካ፥ "ሄዋ ድራዉ፥ መና ጎዳይ ነዉ ትምቢትያ ኦድያዋንቱ ሀዋንቱ ኡባቱዋ ዶናን ዎርዶትያ አያና ዎዳ፤ አያዉ ጎፐ፥ መና ጎዳይ ነ ቦላ ባሻ አሀናዉ ቃቼዳ" ያጌዳ።

24 ሄዋፐ ጉይያን ካናእና ናአይ ጽድቂ ሺቂደ፥ ምካሳ ሻይያ ባቂደ፥ "መና ጎዳ አያናይ ታ ማታፐ ዋኒደ ነዉ ኦዳናዉ ቤዴ?" ያጌዳ።

25 ምካስ አ፥ "ኔን ቆሰታናዉ ቆልኦ ገልያ ጋላስ ሄዋ ደማና" ያጌዳ።

26 ሄዋፐ ጉይያን እስራኤልያ ካቲ ባረ ኦላንቻቱዋፐ እቱዋ አዛዚደ፥ "ምካሳ ኦይቃደ ካታማ ሞድያ አሞናዉነ ታ ናኣ ዮኣሻዉ አፋደ እማ። 27 ኡንቱንታ፥ ካቲ ህንተንታ፥ ‘ሀ ብታንያ ቃሾ ጎለን ቃቺደ ታን ሳሮ ስማና ጋካናዉ፥ ጉ ኡክፐነ ሃፐ ሀራባ አያነ አዉ እሞፕተ’ ያጌ ያጋ" ያጌዳ።

28 ምካስ አ፥ "ቱሙ ኔን ሳሮ ስምያዋ ግዶፐ፥ መና ጎዳይ ታናን ሃሳይቤና" ያጌዳ። ቃይካ ምካስ፥ "አሳዉ ኡባዉ፥ ታን ኦዴዳዋ አኬክተ" ያጌዳ።

አካባ ሀይቁዋ

29 ሄዋፐ ጉይያን እስራኤልያ ካቲነ ይሁዳ ካቲ ዮሳፌጸ ጋላኣደን ደእያ ራሞታ ካታማ ቤድኖ። 30 እስራኤልያ ካቲ ዮሳፌጻ፥ "ታን ማዩዋ ላማደ፥ ሀራ አሳ ማላታደ፥ ኦላዉ ገላና፤ ሽን ኔን ነ ካትያ ማዩዋ ማያ" ያጌዳ። እስራኤልያ ካቲ ማዩዋ ላሚደ፥ ሀራ አሳ ማላቲደ፥ ኦላዉ ገሌዳ።

31 ሶርያ ካቲ ባረ ፓራ ጋረቱዋ አዛዝያ ሀታማነ ላኡ አሳቱዋ፥ "ግታትና ጉጽና ሀራ አሳ ኦናናካ ኦለቶፕተ፤ እስራኤልያ ካትያ ጻላላና ኦለትተ" ያጊደ አዛዜዳ።

32 ፓራ ጋርያ አዛዝያዋንቱ ዮሳፌጻ በኤዳ ዎደ፥ "ቱማ ሀዌ እስራኤልያ ካትያ" ያጌድኖ። አናና ኦለታናዉ ስሜድኖ፤ ዮሳፌጸ ዋሴዳ። 33 ፓራ ጋረቱዋ አዛዝያዋንቱ እ እስራኤልያ ካትያ ግደናዋ በኢደ፥ አ የደርስያዋ አግ አጌድኖ።

34 እት ብታኒ ጮ ባረ ዎንዳፍያን ኦላንቻቱ ቦላ ዱኪደ፥ እስራኤልያ ካትያ ኦላ ማዩ ጋከትያ ሄራና ጫዴዳ። እስራኤልያ ካቲ ባረ ጋርያ ላግያ ብታንያ፥ "ጋርያ ጉየ ዛራደ፥ ታና ኦላ ግዱዋፐ ከሳ። አያዉ ጎፐ፥ ታን ኢታ ጫቻ ጫደታክቻድ" ያጌዳ። 35 ሄ ጋላስ ኦላይ ሱልያ ዎደ፥ እስራኤልያ ካቲ አካብ ባረ ፓራ ጋርያ ግዶን ዘምፒደ፥ ሶረቱዋ ስንን ታኬዳ። አ ጫቻ ሱይ ፓራ ጋርያ ግዶ ጉክና፥ ሄ ኦማርስካ እ ሀይቂ ባሼዳ።

36 አዋይ ዉላናዉ ማትሽና ኦላንቻቱ ግዶን፥ "አሳይ ኡባይ ባረ ካታማ ባረ ካታማ ቦ! አሳይ ኡባይ ባረ ጋድያ ባረ ጋድያ ቦ!" ያግያ አዛዙ ከሴዳ።

37 ሄዋፐ ጉይያን ኡንቱንቱ ካትያ ሳማርያ ካታማ አሂደ ያን ሞጌድኖ። 38 ሻርሙጻቱ ሜጨትያ፥ ዳጋት ኡቴዳ ሳማርያ ሃን ኡንቱንቱ ጋርያ ሜጬድኖ። መና ጎዳይ ካሰ ሃሳዬዳ ቃላዳንካ፥ አ ሱ ካናቱ ላጬድኖ።

39 አካብ ሀኔዳ ሀራባይ፥ እ ኦዳባይ ኡባይ፥ ዳንጋርሳ ዛልያን ካትያ ጎልያ እ ኬጼዳባይነ እ ግምቤዳ ካታማቱዋባይ ኡባይ እስራኤልያ ካተቱ ታርክያ ማጻፋን ጻፈት ኡቴዳ። 40 አካብ ሀይቂደ ባረ ማይዛን ጋከቴዳ፤ አ ሳኣን አ ናአይ አካዝያስ ካተቴዳ።

ይሁዳ ካትያ ዮሳፌጻነ እስራኤልያ ካትያ አካዝያሳ

41 እስራኤልያ ካቲ አካብ ካተቴዳ ኦይደን ላይን አሳ ናአይ ዮሳፌጸ ይሁዳን ካተቴዳ። 42 እ ካተትያ ዎደ ላይይ አዉ ሀታማነ እቼሻ፤ እ የሩሳላመን ላታማነ እቼሹ ላይ ካተቴዳ። አ ዳያ ሺልሀ ናቶ አዙቦ ጌተታዉ። 43 ዮሳፌጸ ባረ አዉዋ አሳ ኦግያን ኡባን ሀመቴዳ፤ እ ሄ ኦግያፐ ሸርእ ግቤና፤ መና ጎዳ ስንን ሱረባ ኦዳ። ግዶፐነ፥ ጎይንያ ቃ ሳኣ ይስቤና፤ አሳይ ሄ ግሹዋን ያርሹዋ ያርሽያዋነ እጻና ጩዋይያዋ አግቤና። 44 ዮሳፌጽካ እስራኤልያ ካትያና ስገቴዳ።

45 ዮሳፌጸ ሀኔዳ ሀራባይ፥ አ ምኖተይነ እ ኦለቴዳ ኦላይ ይሁዳ ካተቱ ታርክያ ማጻፋን ጻፈት ኡቴዳ። 46 ጎይኖ ዎጋ ኦደ አቱማዋንቱ አቱማዋንቱና ሻርሙጽያዋንታ፥ አ አዉ አሳይ ካተቴዳ ዎድያፐ አቴዳዉንታ ጋድያፐ ይሴዳ።

47 ሄ ዎደ ኤዶማ ቢታን ካቲ ባዋ፤ ሄ ቢታ ሱንቴዳ ካፑ ሞዴዳ።

48 ኦፊራ ጋድያ ቢደ ዎራ አሀናዳን ዮሳፌጸ ዎልቃማ ማርካባቱዋ መዳ፤ ሽን ሄ ማርካባቱ ኤጽዮን-ጋብራን መኤረቴድኖፐ አትና ኡባካ ብበይክኖ። 49 ሄ ዎደ አካባ ናአይ አካዝያስ ዮሳፌጻ፥ "ታ ቆማቱዋና ነ ቆማቱዋ እትፐ ማርካብያን ቢኖ" ያጌዳ፤ ሽን ዮሳፌጸ እጼዳ።

50 ዮሳፌጸ ሀይቂደ ባረ ማይዛን ጋከቴዳ። ባረ ማይዛ አዉዋ ዳዊታ ካታማን ሞገቴዳ። አ ሳኣን አ ናአይ ዮራመ ካተቴዳ።

እስራኤልያ ካትያ አካዝያሳ

51 ይሁዳ ካቲ ዮሳፌጸ ካተቴዳ ታማነ ላፑን ላይን አካባ ናአይ አካዝያስ እስራኤልያ ቦላ ሳማርያን ካተቴዳ፤ እስራኤልያ ቦላ ላኡ ላይ ካተቴዳ። 52 አካዝያስ መና ጎዳ ስንን ኢታባ ኦዳ፤ ባረ አዉዋነ ባረ ዳይ ኦግያንነ እስራኤልያ አሳ ናጋራ ኦስሴዳ ናባጻ ናኣ እዮርባማ ኦግያን ሀመቴዳ። 53 አካዝያስ ባኣላዉ ኦዳነ ጎይኔዳ። አ አዉ ካሰ ኦዳዋዳን፥ መና ጎዳ፥ እስራኤልያ ጾሳ እ ሀንቀዳ።