ሳባ ካታቶ
(2 ኦዱዋ 9:1-12)
1 ሳባ ካታታ መና ጎዳ ሱንን ዋረቴዳ ሶሎሞና ዋርያ ስሳደ፥ ዴጽያ ኦሻቱዋ አካደ፥ አ ፓጫናዉ ደንዳዱ።10:1-10 ማቶሳ 12:42፤ ሉቃሳ 11:31 2 ሳዉዋ፥ ሎይ ዳሮ ዎርቃነ አልኦ ሹቻ ጫነቴዳ ዳሮ ጋሎቱዋ ጩጉዋና ሎይ ዳሮ አጃባና የሩሳላመ ጋካደ፥ ሶሎሞና ስን አአዱ። ባረ ዎዛናን ደእያዋ ኡባ ሶሎሞናዉ ኦዳዱ። 3 ሶሎሞነ አ ኦቼዳዋ ኡባ ኦዴዳ፤ እዝዉ ብርሸናን አፐ ጌም አቴዳባይ አያይነ ባዋ። 4 ሳባ ካታታ ሶሎሞና አዳ ኤራ፥ እ ኬጼዳ ካትያ ጎልያ፥ 5 አ ማዳን ሺቅያ ቁማ፥ አ ኦሳንቻቱ ኡትያ ኡተ፥ አ ቆማቱ ኦያ ኦሱዋነ ማይያ ማዩዋ፥ አ ኤሳ ትግያዋንታነ መና ጎዳ ጌሻ ጎልያን እ ጹግያ ያርሹዋ በኤዳ ዎደ፥ እዝ ዎዛናይ ጋገቴዳ።
6 ሄዋፐ ጉይያን እዛ ካትያ፥ "ነዋነ ነ አዳ ኤራተባ ታን ታ ጋደን ደኣደ ስሴዳዌ ቱማ። 7 ሽን ታን ያደ፥ ታ አይፍያ ብራናን በአና ጋካናዉ ኡንቱንቱ ታዉ ኦዴዳዋ አማናበይከ። ታዉ አሳይ ኦዴዳዌ ባጋነ ጋከና፤ አዳ ኤራተንካ ዱረተንካ ታን ስሴዳዋፐ ሎይ ዳሬ። 8 ኡባ ዎደ ነ ስንን ኤቂደ፥ ነ አዳ ኤራ ስስያ ነ አሳቱነ ነ ኦሳንቻቱ አያ ናሸቲኖሻ! 9 ኔናን ናሸቲደ፥ ኔና እስራኤልያ ካዉተ አራታን ኡትሴዳ መና ጎዳይ ነ ጾሳይ ጋላተቶ! መና ጎዳይ እስራኤልያ አሳ መናዉ ሲቄዳ ድራዉ፥ ኔን ሱረ ፕርዳነ ጽሎተ ኦና ማላ እ ኔና ካተዬዳ" ያጋዱ።
10 ካታታ ኦይዱ ሻአ ኪሎ ግራመ ዴጽያ ዎርቃ፥ ሎይ ዳሮ ሳዉዋነ አልኦ ሹቻ ካትያዉ እማዱ። ሳባ ካታታ ካትያ ሶሎሞናዉ እሜዳዋ ኬሻ ዳሮ ሳዉዋ ሄዋፐ ስምና ኦንነ አህቤና።
11 (ካትያ ኪራማ ማርካባቱ፥ ኦፍራፐ ዎርቃ አሄዳዋንቱ ያፐካ ሳንዳለ ጌተትያ ሎይ ዳሮ ምነ አልኦ ሹቻ አሄድኖ። 12 ካቲ ሶሎሞነ ሄ ሳንዳልያፐ መና ጎዳ ጌሻ ጎልያነ ካትያ ጎልያ ቱቀቱዋ፥ ማዝሙርያ የጽያዋንቶ ዲነ ማስንቁዋ መሴዳ። ሄዋ ማላ ሳንዳሊ ሄ ጋላሳፐ ሃ ስምና ይነ ኤረና፥ ቤትነ ኤረና።)
13 ካቲ ሶሎሞነ እማናዉ በስያ እሞታፐ ሀራ፥ ሳባ ካታታ አሞታደ አ ኦቼዳዋ ኡባ እዝዉ እሜዳ። ሄዋፐ ጉይያን ሳባ ካታታ ባረ አጃባና ደንዳደ፥ ባረ ጋደ ስማዱ።
ካትያ ሶሎሞነ ዱረታ
(2 ኦዱዋ 9:13-28)
14 ሶሎሞነ ላይን ላይን አክያ ዎርቃይ ላታማነ ሄዙ ሻአ ኪሎ ግራመ ዴጽያዋ። 15 ሄዌ ዛልአንቻቱዋፐ አኬዳ ቃራጻነ አራባ ቢታ ካተቱዋ ኡባፐነ እስራኤልያ ቢታ ሞድያዋንቱፐ አኬዳ ጊራ ቦላ ጉጃ። 16 ሶሎሞነ ላኡ ጼቱ ዎጋ ጎንዳለቱዋ ቆጼዳ ዎርቃፐ መሴዳ፤ እት እት ጎንዳልያን ላፑን ኪሎ ግራመ ግድያ ዎርቃይ ገሌዳ። 17 ቃይካ እ ሄዙ ጼቱ ቄር ጎንዳለቱዋ ቆጼዳ ዎርቃፐ መሴዳ፤ እት እት ቄር ጎንዳልያን ላኡ ኪሎ ግራመ ግድያ ዎርቃይ ገሌዳ። ካቲ ሄ ጎንዳለቱዋ ሊባኖሳ ዎራ ጎልያ ጌተትያ ጎለን ዎዳ።
18 ቃይካ ካቲ እት ዎልቃማ ካዉተ አራታ ዳንጋርሳ ዛልያፐ መሴዳ፥ ሙሩታ ዎርቃን ሼሼዳ። 19 ካዉታ አራታይ ደእያ ሳኣ ፑደ ከሳናዉ የያ ኡሱፑን ደቱ ደኢኖ። ሄ አራታዉ ጉየ ባጋይ ጻ። አራታዉ ላኡ ባጋናካ ቀስያ ዘምፕስያ ሳአቱ ደኢኖ፤ ሄ ላኡ ሳአቱ ላንቂያንካ ኤቄዳ እት እት ጋሙዋ ምስሊ ደኤ። 20 ሄ አራታ ፑደ ከስያ ኡሱፑን ደቱዋን ያ ባጋናነ ሀ ባጋና እት እት ጋሙዋ ምስሊ፥ ኡባና ታማነ ላኡ ምስለቱ ደኢኖ። ሀዋ ማላ ካዉተ አራታይ ሀራ ካዉተን ሀቃንነ ኦሰትቤና።
21 ካቲ ሶሎሞነ ኡሻ ኡሽያ ሚሻ ኡባይ ዎርቃፐ መቴዳ፤ ሊባኖሳ ዎራ ጎለን ደእያ ሚሻ ኡባይካ ሙሩታ ዎርቃፐ መቴዳ። እትባይነ ብራፐ መትቤና፤ አያዉ ጎፐ፥ ሶሎሞነ ዎደ ብራይ ኡባካ ጎእያባዳን ፓይደት ኤረና። 22 ካትያዉ ኪራማ ማርካባቱዋና ዛልእያ ዎልቃማ ማርካባቱ አባን ደኢኖ። ሄ ማርካባቱ ዎርቃነ ብራ፥ ዳንጋርሳ አቻ፥ ገለሾቱዋነ ቃረቱዋ ጫን አኪደ፥ ሄዙ ላይፐ እት ገደ ዪኖ።
23 ካቲ ሶሎሞነ ዱረተንነ አዳ ኤራተን ሳኣን ደእያ ካተቱዋ ኡባፐ ዳሬዳ። 24 ሳኣን ደእያ አሳይ ኡባይ አ ስን አናዉነ ጾሳይ አ ዎዛናን ዎዳ አዳ ኤራ ስሳናዉ ኮዬ። 25 ላይፐ ላይን ይያ ኡባይ አዉ እማናዉ ዎርቃነ ብራ ሚሻቱዋ፥ ማዮቱዋ፥ ኦላ ሚሻቱዋነ ሳዉዋ፥ ፓራቱዋነ ባቁሎቱዋ አኪደ ዬ።
26 ሶሎሞነ ፓራ ጋረቱዋነ ፓራቱዋ ሺሼዳ፤ አዉ እት ሻአነ ኦይዱ ጼቱ ፓራ ጋረቱነ ታማነ ላኡ ሻአ ፓራቱ ደኢኖ። እ ኡንቱንቱ ፓራ ጋረቱዋ ካታማቱዋንነ ባረናና የሩሳላመን ዎዳ።10:26 1 ካታ. 4:26 27 ካቲ የሩሳላመን ብራይ ሹቻዳን ኬለታናዳን፥ ዝጋይካ ጋን ድጭያ ኤዳን ጮራታናዳን ኦዳ። 28 ሶሎሞነ ፓራቱ ግብጼፐነ ቃዌ ጌተትያ ቢታፐ ዬድኖ። ካትያ ዛልአንቻቱ ኡንቱንቱ ቃዌፐ ሻሉዋን ሻሚደ አሂኖ።10:28 ዛረ. 17:16 29 ኡንቱንቱ እት እት ፓራ ጋርያ ኡሱፑን ጼቱ ጻጋራ ብራን፥ እት እት ፓራ ጼታነ እሻታሙ ጻጋራ ብራን ግብጼፐ ሻሚደ አሂኖ፤ ኡንቱንቱካ ሂተቱዋ ካተቶ ኡባቶነ ሶርያ ካተቶ ዛልኢኖ።