1 ካታቱዋ 12

ፑደሃ ያራቱዋ ማካላ

1 እስራኤልያ አሳይ ኡባይ ሮብኣማ ካተያናዉ ሰኬማ ካታማ ቤዳ ድራዉ፥ እካ ያ ቤዳ። 2 ናባጻ ናአይ እዮርባም፥ ካትያ ሶሎሞነፐ ባቃቲደ ግብጼን ደእያዌ ሀዋ ስሴዳ ዎደ፥ ግብጼፐ ስሚደ ዬዳ። 3 እስራኤልያ አሳይ እዮርባማዉ ኪቲደ ጼስስና፥ እነ እስራኤልያ ማባራይ ኡባይ ሮብኣማኮ ቢደ፥ 4 "ነ አዉ ኑና ዴጾ ሞርገ ም ቶሴዳ፤ ሽን ሀእ ኔን እ ኑና ኦስስያ ዎልቃማ ኦሱዋነ ዴጾ ሞርገ ም ኑዉ ካዉሽሳርኪ። ያቶፐ፥ ኑን ነዉ ሞደታና" ያጌድኖ።

5 ሮብኣመ ኡንቱንቶ፥ "ቢተ፤ ሄዘን ጋላስ ስሚደ ታኮ ዪተ" ያጌዳ፤ አሳይ ቤዳ።

6 ሄዋፐ ጉይያን ካቲ ሮብኣመ አ አዉ ሶሎሞነ ፓጻ ደእያ ዎደ፥ ሶሎሞና ዞሬዳ ጭማቱዋ ዞረታ በሴዳ። እ ኡንቱንታ፥ "ሀ አሳዉ ዋጋደ ዛራ ጊቴ?" ያጊደ ኦቼዳ።

7 ጭማቱ ሮብኣማ፥ "ሀቼ ኔን አሳዉ ቆማ ግዳደ ኦፐነ ኡንቱንቱ ኦችያዎ ኔን ሎኦ ቃላ ዛሮፐ፥ ኡባ ገደ ኡንቱንቱ ነዉ ቆማ ግዳናዋንታ" ያጌድኖ።

8 ሽን ሮብኣመ ጭማቱ ዞሬዳ ዞርያ አጊደ፥ አናና ድጪደ አዉ ኦያ ያላጋ አሳቱዋ ዞረታ በሴዳ። 9 እ ኡንቱንታ፥ "ህንተንቱ ታና ዞርያዌ አዬ? ‘ነ አዉ ኑና ቶሴዳ ዴጾ ሞርገ ም ኑዉ ካዉሽሳርኪ’ ያግያ ሀ ደርያዉ ዋጋደ ዛሮ?" ያጊደ ኦቼዳ።

10 ሽን አናና ድጬዳ ያላጋቱ፥ " ‘ነ አዉ ኑና ዴጾ ሞርገ ም ቶሴዳ፤ ሽን ኔን ኑዉ ካዉሽሳርኪ’ ያግያ አሳዉ፥ ‘ታ ቄር ብራ ታ አዉዋ ጼሳፐ ኦርዴ። 11 ታ አዉ ህንተንቱ ሞርገ ም ዴጽሴዳ፤ ሽን ታን ሄዋፐካ አደ ዴጽሳና። ታ አዉ ህንተንታ ልሱዋን ዋዳ፤ ሽን ታን ህንተንታ ማስማሱዋዳን ዱክያ ልሱዋን ዋና’ ያጋደ ዛራ" ያጌድኖ።

12 ሄዋፐ ጉይያን ካቲ ሮብኣመ፥ "ሄዘን ጋላስ ስሚደ ታኮ ዪተ" ጌዳዋዳንካ፥ እዮርባምነ አሳይ ኡባይ ሄዘን ጋላስ ስሚደ ዬድኖ። 13 ካቲ ኡንቱንቶ ሀንቆ ዛሩዋ ዛሬዳ። ጭማቱዋ ዞርያ አግ ባሺደ፥ 14 ያላጋቱ ዞሬዳ ዞርያ ካሌዳ። ያቲደ ሀዋዳን ያጌዳ፤ "ታ አዉ ህንተንቱ ሞርገ ም ዴጽሴዳ፤ ሽን ታን ሄዋፐካ አደ ዴጽሳና። ታ አዉ ህንተንታ ልሱዋን ዋዳ፤ ሽን ታን ህንተንታ ማስማሱዋዳን ዱክያ ልሱዋን ዋና" ያጊደ ዛሬዳ። 15 ካቲ አሳይ ግያዋ ስሰናን እጼዳ፤ አያዉ ጎፐ፥ መና ጎዳይ ሴሎፐ ዬዳ አኪያ ባጋና ካሰ ናባጻ ናኣ እዮርባማዉ ኦዴዳ ቃላይ ፖለታናዳን ሀዌ መና ጎዳፐ ሀኔዳ።

16 እስራኤልያ አሳይ ኡባይ ካቲ ኡንቱንቱ ግያዋ ስሰናን እጼዳዋ በኢደ፥ ካትያ ሀዋዳን ያጌድኖ፤ "ዳዊተዋፐ ኑና ጋክያባይ አዬ? እሰያ ናኣፐ ኑን ላታናዌ ባዋ! እስራኤልያ አሳዉ፥ ህንተንቱ ሶ ህንተንቱ ሶ ስምተ! ሀእ ስም ሮብኣመ ባረዉ ናገቶ!" ያጌድኖ። እስራኤልያ አሳይ ኡባይ ባረንቱ ሶ ባረንቱ ሶ ስሜድኖ።✝12:16 2 ሳሜላ 20:1 17 ሽን ሮብኣመ ይሁዳ ካታማቱዋን ደእያ እስራኤልያ አሳ ቦላ ካተቴዳ።

18 ሄዋፐ ጉይያን ካቲ ሮብኣመ ባረ ጋባራቱዋ ካፑዋ አዶንራማ እስራኤልያ አሳኮ ኪቴዳ፤ ኡንቱንቱ ሹቻን ጫዲደ ዎድኖ። ያትና፥ ካቲ ሮብኣመ ባረ ፓራ ጋርያን ኤለካ ከስ ኡቲደ፥ የሩሳላመ ባቃቴዳ። 19 ሄዋፐ ዶሚደ ሀቼ ጋካናዉ እስራኤልያ ዛራቱ ታማቱ ዳዊታ ዛርያፐ ካተቴዳ ካተቱዋ ቦላ ማካሌድኖ። 20 እዮርባም ግብጼፐ ስሜዳዋ እስራኤልያ አሳይ ኡባይ ስሴዳ ዎደ፥ አ ባረንቱ ያአዉ ጼስሲደ፥ እስራኤልያ ቦላ ካተዬድኖ፤ ዳዊታ ዛርያፐ ካተቴዳ ካተቶ አማነቲደ አቴዳዌ ይሁዳ ዛርያ ጻላላ።

ሻማእይ ትምቢትያ ኦዴዳ

21 ሶሎሞና ናአይ ሮብኣመ የሩሳላመ ካታማ ጋኬዳ ዎደ፥ እስራኤልያ ቢታ አሳና ኦለቲደ፥ ካዉተ ባረዉ ዛራና ማላ፥ ይሁዳ ዛርያፐነ ቢንያማ ዛርያፐ ዶረቴዳ እት ጼታነ ሆስፑን ታሙ ሻአ ኦላንቻቱዋ ሺሼዳ። 22 ሽን ጾሳ ቃላይ፥ ጾሳ አሳ ግድያ ሻማእያኮ ዪደ፥ 23 "ሶሎሞና ናኣ፥ ይሁዳ ካትያ ሮብኣማዉ፥ ይሁዳነ ቢንያማ ዛረቶነ አቴዳ አሳ ኡባዉ ሀዋዳን ያጋ፤ 24 ‘መና ጎዳይ ህንተንታ፥ "ህንተንቱ ዳቦቱዋና፥ እስራኤላቱዋና ኦለታናዉ ቦፕተ። ሀዋ ታን ኦዳ ድራዉ፥ ህንተንቱ ኡባይካ ህንተንቱ ሶ ህንተንቱ ሶ ስምተ" ያጌ’ ያጋደ ኦዳ" ያጌዳ። ኡንቱንቱ መና ጎዳ ቃላ ስሲደ፥ ስሚደ ሶ ቤድኖ።

እዮርባም ጾሳፐ ዎራ ስሜዳ

25 ሄዋፐ ጉይያን እዮርባም ኤፍሬማ ገዝያን ደእያ ሰኬማ ጌሶ ኦ ግምቢደ፥ ያን ደኤዳ፤ ሄዋፐ ከስ ቢደ ጲንኤላ ግምቤዳ።

26 እዮርባም ባረ ዎዛናን፥ "ካዉተይ ዳዊታ ዛርያዉ ስማና። 27 ሀ አሳይ መና ጎዳ ጌሻ ጎልያን ያርሹዋ ያርሻናዉ የሩሳላመ ካታማ ብያዋ ግዶፐ፥ ኡንቱንቱ ቃይካ ባረንቱ ጎዳኮ፥ ካትያ ሮብኣማኮ ስማና። ኡንቱንቱ ታና ዎደ፥ ይሁዳ ካትያ ሮብኣማኮ ስማና" ያጊደ ቆፔዳ።

28 ሄዋ ድራዉ፥ ካቲ ዞረቴዳዋፐ ጉይያን ዎርቃፐ ላኡ ማራቱዋ ምስለቱዋ መደ አሳዉ፥ "ህንተንቱ ሀዋፐ የሩሳላመ ቤዳዋ ኬሻይ ግዳናዋ። ህንተንቶ እስራኤልያ አሳቶ፥ ህንተንታ ግብጼፐ ከሴዳ ህንተንቱ ጾሳቱ ሀዋንቱሽ!" ያጌዳ።✝12:28 ከሳ 32:4 29 ኡንቱንቱፐ እቱዋ ቤቴለን፥ እቱዋ ቃይ ዳናን ዎዳ። 30 ሀ የዉ ኡንቱንቶ ናጋራቴዳ፤ አያዉ ጎፐ፥ እት ማራ ምስልያዉ ጎይናናዉ አሳይ ዳና ጋካናዉ ቤዳ። 31 እዮርባም ደርያ ሁጲያን ጎይንያ ቃ ሳኣ ጊግሲደ ሌዊያ ዛርያ ግዳና ዮፐካ፥ ኡባ ቆሞ አሳፐ ቄሳቱዋ ኦደ ሱንዳ።

32 ይሁዳን ቦንችያዋዳን ሆስፑን አግናን ታማነ እቼሻን ጋላሳን ባላይ ቦንቼታናዳን፥ እዮርባም ጋላሳ ኬሬዳ፤ ያርሹዋ ያርሼዳ። እ ሀዋዳን ሀኔዳ፤ ቤቴለ ቤዳ፤ ባረ መዳ ማራ ምስልያዉ ያርሹዋ ያርሼዳ። ቃይ ባረ መዳ ጎይንያ ቃ ግሹዋን ቄሳቱ ዋ ቤቴለን ሱንደ ዎዳ።✝12:32-33 ዎጋ 23:33-34 33 እ ባረ ሁጲያዉ ዶሬዳ ሆስፑን አግናን፥ ሄ አግናዉ ታማነ እቼሻን ጋላስ ቤቴለ ቤዳ፤ ሄ ጋላሳይ እስራኤልያ አሳዉ ባላ ግዳናዳን አዋዬዳ። ያቲደ እጻና ጩዋያናዉ ፑደ ያርሽያ ሳኣ ከሴዳ።