1 ካታቱዋ 5

ጌሻ ጎልያ ኦሱዋ

1 ጺሮሳ ካቲ ኪራም ዳዊታና ኡባ ገደ ሲቀቲደ ጋምኤዳ ድራዉ፥ ሶሎሞነ ባረ አዉዋ ዳዊታ ኮታን ካተታናዉ ኦከቴዳዋ ስሲደ፥ ባረ ኦሳንቻቱዋ ሶሎሞነኮ ኪቴዳ። 2 ሶሎሞነካ ኪራማዉ ዛሪደ ሀዋዳን ያጊደ ኪቴዳ፤ 3 "መና ጎዳይ አ ሞርከቱዋ አ ገድያፐ ጋርሳና ሞድሳና ጋካናዉ፥ ታ አዉዋ ዳዊታ ቦላ ኡባ ሳና ደንዴዳ ኦላ ጋሱዋን፥ መና ጎዳ ባረ ጾሳ ሱንዉ ጌሻ ጎልያ እ ኬጽቤናዋ ኔን ኤራሳ። 4 ሽን ሀእ መና ጎዳይ ታ ጾሳይ ታዉ ኡባ ሳና ሸምፑዋ እሜዳ፤ ታዉ አያ ሞርኪካ ዎይ ኢታባይካ ባዋ። 5 መና ጎዳይ ታ አዉዋ ዳዊታዉ፥ ‘ታን ነ ኮታን፥ ነ ካዉተ አራታን ካተይያ ነ ናአይ ታ ሱንዉ ጌሻ ጎልያ ኬጻና’ ጌዳዋዳንካ፥ ታን መና ጎዳ ታ ጾሳ ሱንዉ ጌሻ ጎልያ ኬጻናዉ ቆፓዲ።✝5:5 2 ሳሜላ 7:12-13፤ 1 ኦዱዋ 17:11-12 6 ሄዋ ድራዉ፥ ሊባኖሳፐ ዝጋ ታዉ ቃንጽያ አሳቱዋ አዛዛ፤ ታ አሳቱ ነ አሳቱዋና ኦናዋንታ። ያቶፐ ነ አሳቶ ኔን ጭጋ ጌዳ ድርጉዋ አያ ግዶፐነ፥ ታን ጭጋና። ሲዶና አሳቱዋዳን ም ቃንጹዋ ሂላ ኑ አሳይ ኤረናዋ ኔን ኤራሳ" ያጌዳ።

7 ኪራም ሶሎሞና ኪታ ስሲደ ሎይ ናሸቲደ፥ "ሀ ዎልቃማ ካዉተ ሞዳና ማላ፥ ዳዊታዉ ሀ አዳ ኤራንቻ ናኣ እሜዳ መና ጎዳይ ጋላተቶ" ያጌዳ።

8 ሄዋፐ ጉይያን ኪራም ሶሎሞናዉ ሀዋዳን ያጊደ ኪቴዳ፤ "ኔን ታዉ ኪቴዳ ኪታይ ታና ጋኬዳ። ኔን ኮዬዳዋ ኡባ ታን ኦና፤ ዝጋ ሙደነ ጽድያ ሙደ ታን ነዉ ሺሻና። 9 ታ አሳቱ ነ ሙደ ሊባኖሳፐ ዱገ አባዉ ኬዛናዋንታ። ታን ቃሽሳደ፥ አባ ቦላና ቶከቲደ ኔን ማላቶ ሳኣ ጋካናዳን ኦና፤ ታን ያን ብልሳደ ያፐ አፍሳና። ሄዋፐ ጉይያን ኔን ነ ባጋና ታ ካትያ ጎለን ደእያ አሳዉ ምያባ ኪትያዋን ታ ኮይያዋ ፖላናሳ" ያጌዳ።

10 ሄዋዳን ኦደ ኪራም ሶሎሞነ ኮዮዋ ኬሻ ዝጋ ሙደነ ጽድያ ሙደ ኡባ እሜዳ። 11 ሶሎሞነካ ካትያ ጎለን ደእያ አሳይ ማናዉ ላታሙ ሻአ ኮንታለ ዛርጋነ ኦይዱ ጼቱ ሻአ ሊትሮ ጌሻ ዎጋራ ዛይትያ ላይን ላይን ፓጨናን ኪራማዉ እሜዳ። 12 መና ጎዳይ ሶሎሞናዉ እማና ጌዳዋዳን፥ አዉ አዳ ኤራ እሜዳ። ኪራመነ ሶሎሞነ ባረንቱ ግዶን ሳሮ ደኤድኖ፤ ኡንቱንቱ ላኡ ባረንቱ ግዶን ቃላ ጫቁዋ ጫቀቴድኖ።

13 ካቲ ሶሎሞነ እስራኤልያ ኡባፐ ሀታሙ ሻአ ጎሻንቻቱዋ ዶሪደ ከሴዳ። 14 አዶንራማ ግያ ብታንያ ኡንቱንቱ ቦላ ካፑዋ ኦደ ሱንዳ። ጋባራቱዋካ ታሙ ሻኣ ታሙ ሻኣ ሻክ፥ ሄዙ ጭታ ከሴዳ፤ እት እት ጭታይ ታራን ታራን ቢደ፥ እት አግና ሊባኖሳን ኦናዳንነ ላኡ አግና ባረንቱ ሶን ደአናዳን ቆፔዳ።✝5:14 1 ካታ. 12:18 15 ሶሎሞናዉ ቶኩዋ ቶክያ ላፑን ታሙ ሻአ አሳቱነ ሹቻ ቆእያ ሆስፑን ታሙ ሻአ አሳቱ ገዝያን ደኢኖ። 16 ሀዋንቱ ካፑዋ ግዲደ አሳ ኪታ ኦስስያ ሄዙ ሻአነ ሄዙ ጼቱ አሳቱዋ ጊግሴዳ። 17 ኦሳንቻቱ ካቲ ሶሎሞነ አዛዝና፥ ጌሻ ጎልያዉ ባሶ ግዳና ማላ ዎጋ ሙሩታ ሹቻቱዋ ቆኢደ ማሴድኖ። 18 ሶሎሞና አሳቱነ ኪራማ አሳቱ ኩሽያ ሂላ ኤርያዋንቱ፥ ጌባላ አሳቱዋናካ ግዲደ፥ ጌሻ ጎልያ ኬጻናዉ ም ቃንጺደነ ሹቻ ቆኢደ ጊግሴድኖ።