ይሁዳ ካትያ ህዝቂያሳ
(2 ካታ. 18:1-3)
1 ህዝቂያሰ ካተትያ ዎደ፥ ላይይ አዉ ላታማነ እቼሻ፤ እ የሩሳላመን ላታማነ ኡዱፑን ላይ ካተቴዳ። አ አት ሱንይ አቢያ፤ አ ዛካራሳ ናቶ። 2 አ ማይዛ አዉ ዳዊተ ኦዳዋዳን፥ ህዝቂያስካ መና ጎዳ ስንን ሱረባ ኦዳ።
ጌሻ ጎልያ ጌሹሳ
3 ህዝቂያሰ ባረ ካተቴዳ ኮይሮ ላይን፥ ኮይሮ አግናን፥ መና ጎዳ ጌሻ ጎልያ ፐንገቱዋ ዶዪደ ኦራዳ። 4 ቄሳቱ ዋነ ሌዋቱዋ አህሲደ፥ ጌሻ ጎልያዉ አዋይ ዶልያ ባጋና ደእያ ዳባባን ሺሼዳ። 5 ሀዋዳን ያጌዳ፤ "ሌዋቶ፥ ታን ግያዋ ስስተ! ሀእ ህንተንቱ ሁጲያዉ ጌይተ፤ መና ጎዳ ህንተንቱ አዎቱዋ ጾሳ ጌሻ ጎልያካ ጌሽተ። ጌሻ ጎልያ ቱንስያባ ኡባ ድግተ። 6 አያዉ ጎፐ፥ ካሰ ኑ አዎቱ አማነትበይክኖ፤ መና ጎዳ ኑ ጾሳ ስንን ኢታባ ኦድኖ። ኡንቱንቱ መና ጎዳ አጊደ፥ ጾሳይ ደእያ ሳኣፐ ባረንቱ ዴሙዋ ዎራ ዛሪደ፥ ባረንቱ ዞኪያ አኮ ዛሬድኖ። 7 ኡንቱንቱ ቃይ ጌሻ ጎልያ ፐንገቱዋ ጎርዴድኖ፤ ጾምፕያካ ቶይሴድኖ። ጌሻ ጎልያን እስራኤልያ ጾሳዉ እጻና ጩዋይበይክኖ፥ ዎይ ጹግያ ያርሹዋ ያርሽበይክኖ። 8 ሄዋ ድራዉ፥ መና ጎዳ ሀንቁ ይሁዳ ቦላነ የሩሳላመ ቦላ ዎዳ። ህንተንቱ አይፍያን ህንተንቱ በእያዋዳን፥ ጾሳይ ኡንቱንቱ ህንተንቶ ያሻ፥ ዳጋማነ ‘ፖራ!’ ግያዋ ኦዳ። 9 ሄዋ ጋሱዋን ኑ አዎቱ ማሻን ሀይቄድኖ፤ ኑ አቱማ ናናይ፥ ኑ ማጫ ናናይነ ኑ ማቻቱ ኦሞደቴድኖ።
10 "መና ጎዳ ሀንቁ ኤጽያዌ ኑ ቦላፐ ክቻና ማላ፥ ታን መና ጎዳና፥ እስራኤልያ ጾሳና ቃላ ጫቁዋ ጫቀታናዉ ታ ዎዛናን ቆፓይ። 11 ታ ናቶ፥ ህንተንቱ መና ጎዳ ስንን ኤቂደ፥ አዉ ኦያ ኦሳንቻ ግዲደ፥ እጻና ጩዋያናዳን ህንተንታ እ ዶሬዳ ድራዉ፥ ሸነኮ ጎፕተ" ያጌዳ።
12 ሄ ሳኣን ደእያ ሌዋቱ ሀዋፐ ካሊደ ጻፈቴዳዋንታ፦
ቃሃታ ያራፐ አማሳያ ናኣ ማሃታነ አዛርያሳ ናኣ ዩኤላ።
ማራራ ያራፐ አብድ ናኣ ቂሳነ ይሃልኤላ ናኣ አዛርያሳ።
ገርሾና ያራፐ ዚማ ናኣ ዮኣሀነ ዮኣሀ ናኣ ኤዴና።
13 ኤልጻፋና ያራፐ ሺምራነ ይኡኤላ።
አሳፋ ያራፐ ዛካራሳነ ማታንያ።
14 ሄማና ያራፐ ይህኤላነ ሽምአ።
ይዱቱና ያራፐ ሻማእያነ ኡዝኤላ።
15 ኡንቱንቱ ባረንቱ ዳቦቱዋ፥ ሌዋቱዋ፥ ሺሽና፥ ኡንቱንቱ ኡባይካ ባረንቱ ሁጲያዉ ጌዬድኖ። ካቲ ኡንቱንታ አዛዝና፥ መና ጎዳ ህግያን ጻፈቴዳዋዳን ኡንቱንቱ መና ጎዳ ጌሻ ጎልያ ጌሹሳ ዶሜድኖ። 16 ሄዋ ድራዉ፥ ቄሳቱ መና ጎዳ ጌሻ ጎልያ ጌሻናዉ ግዶ ገሌድኖ፤ መና ጎዳ ጌሻ ጎልያ ግዶን ደእያ ቱናባ ኡባ ከሲደ፥ መና ጎዳ ጌሻ ጎልያ ዳባባ አሄድኖ። ሌዋቱ አኪደ፥ ቀድሮና ዛንጋራን ኦሌድኖ። 17 ኡንቱንቱ ኮይሮ አግናን፥ ኮይሮ ጋላስ ጌሻ ጎልያ ጌሽያዋ ዶሜድኖ፤ ሄ አግናዉ ሆስፑን ጋላስ መና ጎዳ ባራንዳ ጋኬድኖ። ሀራ ሆስፑን ጋላሳን መና ጎዳ ጌሻ ጎልያ ጌሼድኖ። ኮይሮ አግናዉ ታማነ ኡሱፑን ጋላስ ኡንቱንቱ ሄ ኦሱዋ ፖሌድኖ።
18 ሄዋፐ ጉይያን፥ ኡንቱንቱ ካትያ ህዝቂያሳኮ ገሊደ፥ "ኑን መና ጎዳ ጌሻ ጎልያ ኡባ፥ ጹግያ ያርሹዋ ያርሽያ ሳነ ሄ ያርሽያ ሳኣን ጎኤትያ ሻሉዋ ኡባ፥ ኡክ ጻራጴዛነ ሄ ጻርጴዛን ደእያ ሚሻቱዋ ኡባ ጌሼዶ። 19 ቃይ ካቲ አካዝ ካተቲደ ደእያ ዎደ፥ ጾሳዉ አማነተናን አጊደ፥ አፌዳ ሻሉዋ ኡባ ኑን ዛሪደ ጌሼዶ። በአ፥ ኑን ጌሼዳ ሚሻይ ኡባይ መና ጎዳዉ ያርሹዋ ያርሽያ ሳኣ ስንን ደኤ" ያጌድኖ።
20 ካቲ ህዝቂያሰ ዎንተ ጋላስ ጉራን ደንዲደ፥ ካታማ ካፓቱዋ ሺሺደ፥ ኡንቱንቱና እትፐ መና ጎዳዉ ጌሻ ጎልያ ቤዳ። 21 ኡንቱንቱ ካዉተ ድራዉ፥ ጌሻ ጎልያ ድራዉነ ይሁዳ አሳ ድራዉ፥ ላፑን ኮሩማቱዋ፥ ላፑን ዶርሳ ኦርገቱዋ፥ ላፑን ዶርሳ ማራቱዋነ ቃይ ላፑን ዴሻ ኦርገቱዋ ናጋራ ያርሾ አሄድኖ። አሮና ዘረ ግድያ ቄሳቱ፥ መና ጎዳዉ ያርሹዋ ያርሽያ ሳኣን ሄዋንታ ያርሻናዳን ካቲ አዛዜዳ። 22 ቄሳቱ ኮሩማቱዋ ሹኪደ፥ ኡንቱንቱ ሱ ያርሽያ ሳኣ ቦላ ጫጫፌድኖ። ቃይ ዶርሳ ኦርገቱዋ ሹኪደ፥ ኡንቱንቱ ሱ ያርሽያ ሳኣ ቦላ ጫጫፌድኖ። ቃይካ ዶርሳ ማራቱዋ ሹኪደ፥ ኡንቱንቱ ሱ ያርሽያ ሳኣ ቦላ ጫጫፌድኖ። 23 ናጋራ ያርሾ ሀንያ ዴሻ ኦርገቱዋ ካትያ ስንነ ሺቄዳ አሳ ስን አሄድኖ፤ አህና ኡንቱንቱ ኡባይ ባረንቱ ኩሽያ ዴሻቱዋ ቦላ ዎድኖ። 24 ቄሳቱ ዴሻቱዋ ሹኪደ፥ እስራኤልያ አሳ ኡባ ናጋራይ አቶ ጌተታናዋ ማላ፥ ኡንቱንቱ ሱ ያርሽያ ሳኣ ቦላ ያርሼድኖ። አያዉ ጎፐ፥ ካቲ ኡንቱንቱ ጹግያ ያርሹዋነ ናጋራ ያርሹዋ ያርሻናዳን አዛዜዳ ድራሳ።
25 ሄዋፐ ጉይያን፥ መና ጎዳይ ካትያዉ ናብያ ጋደ ባጋናነ ትምቢትያ ኦድያ ናታና ባጋና ካትያ ዳዊታ አዛዜዳ አዛዙዋ ህዝቂያሰ ካሊደ፥ ሌዋቱዋ ዳላ፥ ዲነ ማስንቁዋ ኦይደ፥ መና ጎዳ ጌሻ ጎልያን ኤሴዳ። 26 ሌዋቱ ዳዊተ ካሰ የ የጼዳ ሚሻቱዋ ኦይቂና፥ ቄሳቱ ቃይ ጹሩምባቱዋ ኦይቂደ ኤቄድኖ። 27 ሄ ዎደ ኡንቱንቱ ጹግያ ያርሹዋ ያርሻናዳን ህዝቂያሰ አዛዜዳ። ጹግያ ያርሹዋ ያርሽያዌ ዶመቴዳ ዎደ፥ ጹሩምባቱዋንነ እስራኤልያ ካትያ ዳዊታ የ ሚሻቱዋን መና ጎዳዉ የይ ዶመቴዳ። 28 ጹግያ ያርሹዋ ያርሽያዌ ፖለታና ጋካናዉ፥ ኩመን ያአይ ጾሳዉ ጎይኔ፤ የ የጽያዋንቱካ የጺኖ፤ ጹሩምባ ፑንያዋንቱካ ፑኒኖ። 29 ቄሳቱ ያርሹዋ ያርሽያዋ ፖሌዳ ዎደ፥ ካቲነ አናና ደእያ አሳይ ኡባይ ጉልባቲደ ጎይኔድኖ። 30 ካቲ ዳዊተነ ትምቢትያ ኦድያ አሳፈ ጻፌዳ ጋላታ ማዝሙርያ መና ጎዳዉ የጻናዳን ካቲ ህዝቂያስነ ካፓቱ ሌዋቱዋ አዛዜድኖ፤ ሌዋቱ ናሸቻን ጋላቲደ፥ ጉልባቲደ ጎይኔድኖ።
31 ሄዋፐ ጉይያን፥ ህዝቂያሰ አሳ፥ "ሀእ ህንተንቱ ህንተንታ መና ጎዳዉ ዱማዬድታ። ህንተንቱ ሺቂደ፥ ያርሹዋነ ጋላታ ያርሹዋ መና ጎዳ ጌሻ ጎልያ አህተ" ያጌዳ። ሄዋፐ ጉየ ሺቄዳ አሳይ ያርሹዋነ ጋላታ ያርሹዋ አሄድኖ፤ ቃይ ኮዬዳ አሳቱ ጹግያ ያርሹዋ አሄድኖ። 32 ሄ ሺቄዳ አሳይ አሄዳ ጹግያ ያርሹዋ ፓይዱ ላፑን ታሙ ኮሩማቱዋ፥ ጼቱ ዶርሳ ኦርገቱዋነ ላኡ ጼቱ ዶርሳ ማራቱዋ፤ ሄዋንቱ ኡባይ መና ጎዳዉ ጹግያ ያርሾቱዋ። 33 ቃይ እትፐተ ያርሾቱ ኡሱፑን ጼቱ ኮሩማቱዋነ ሄዙ ሻአ ዶርሳቱዋ። 34 ሽን ጹግያ ያርሹዋ ኡባ ሹኪደ፥ ጋልባ ቃራናዉ ደእያ ቄሳቱ ፓይዱዋን ሎይ ጉ። ሄዋ ድራዉ፥ ኪታይ ዉራና ጋካናዉነ ሀራ ቄሳቱ ባረንቱ ሁጲያዉ ጌያና ጋካናዉ፥ ኡንቱንቱ ዳቦቱ፥ ሌዋቱ ኡንቱንታ ማዴድኖ። (ባረንቱ ሁጲያዉ ጌይያዋን ሌዋቱ ቄሳቱ ዋፐ አደ አማነቲኖ።) 35 ጹግያ ያርሹዋ፥ እትፐተ ያርሹዋ ሀንዳነ ጹግያ ያርሹዋና እትፐ ያርሸትያ ኡሻ ያርሹዋ ኡባ ኡንቱንቱ ያርሺኖ።
ሄዋዳን ሀኒደ፥ መና ጎዳ ጌሻ ጎልያ ኪታይ ላኤንዋ ዶሜዳ። 36 ሄዋፐ ጉይያን፥ ህዝቂያስነ አሳይ ኡባይ ሄ ኦሱዋ ኤለካ ፖላናዳን ጾሳይ ኡንቱንታ ማዴዳ ድራዉ፥ ሎይ ናሸቴድኖ።