2 ኦዱዋ 14

ካቲ አሳይ ቶጵያ ኦላንቻቱዋ ጾኔዳ

1 አቢይ ሀይቂደ፥ ባረ ማይዛን ጋከቴዳ፤ ዳዊታ ካታማን አ ሞጌድኖ። አ ኮታን አ ናአይ አሳይ ካተቴዳ። እ ካተቴዳ ዎደ ጋዲ ታሙ ላይ ዎፓ ደሜዳ።

2 አስ መና ጎዳ ባረ ጾሳ ስንን ሎኦባነ ሱረባ ኦዳ። 3 አስ አላጋ ጾሳቶ ያርሽያ ሳአቱዋነ ጎይንያ ቃ ሳኣ ኮሌዳ። ጎይናናዉ ሹቻፐ ኦዳ ቱሳቱዋካ መንሬዳ፤ አሼሮ ጌተትያ ጾሳት ምስለቱዋካ ቃንጸሬ ኦሌዳ። 4 ይሁዳ አሳይ መና ጎዳ ባረንቱ አዎቱዋ ጾሳ ኮያናዳንነ አ ህግያነ አ አዛዙዋ ናጋናዳን አሳይ አዛዜዳ። 5 ቃይ ጎይንያ ቃ ሳአቱዋነ እጻና ጩዋይያ ሳኣ ይሁዳ ካታማ ኡባፐ ይሴዳ። አ ካዉተ ላይን ቢታይ ዎፓ ደሜዳ። 6 ካቲ አሳይ ይሁዳን ደእያ ካታማቶ ጌሶቱዋ መዳ። መና ጎዳይ አ ሸምፕሴዳ ድራዉ፥ ቢታይካ ሸምፔዳ፤ ሄ ላይቱዋን አናና ኦንነ ኦለትቤና።

7 አሳይ ይሁዳ አሳ ሀዋዳን ያጌዳ፤ "አነ ኑን ሀ ካታማቱዋ ኬጾይተ፤ ኡንቱንቱ ዩሹዋን ሚጻቱዋ መይተ። ኡንቱንቱ ቦላ አዱሳ ግምበቱዋ፥ ፐንገቱዋነ ፐንገቱዋ ጎርድያ ሽካላቱዋ ከሴቶ። ኑን መና ጎዳ ኑ ጾሳ ኮዮዋ ድራዉ፥ ቢታይ ሀእካ ኑሳ። ኑን አ ኮዬዶ፤ እ ኑዉ ኡባ ባጋና ዎፓ እሜዳ" ያጌዳ። ሄዋ ድራዉ፥ ኡንቱንቱ ካታማቱዋ ኬጺደ ፖሌድኖ።

8 አሳዉ ዎጋ ጎንዳለቱዋነ ቶራቱዋ ኦይቂያ 300,000 ኦላንቻቱ ይሁዳ ዛርያፐ ደኢኖ፤ ቃይ ቄር ጎንዳለቱዋ ኦይቂያዋንቱነ ዎንዳፍያን ዱክያዋንቱ ላኡ ጼታነ ሆስፑን ታሙ ሻአ ኦላንቻቱ ቢንያማ ዛርያፐ ደኢኖ። ሀዋንቱ ኡባይካ ምኖ አሳቱዋ።

9 ዘራሀ ጌተትያ እት ቶጵያ አሳይ እት ሚሎነ ኦላንቻቱዋነ ሄዙ ጼቱ ፓራ ጋረቱዋ አኪደ፥ ይሁዳ ኦላናዉ ዪደ፥ ማሬሻ ጋኬዳ። 10 አስካ አናና ኦለታናዉ ከሴዳ፤ ከሲደ ባረ ኦላንቻቱዋ ማሬሻ ማታን ደእያ ጻፋታ ዎምባን ሳልፕሴዳ። 11 ሄዋፐ ጉይያን፥ አስ መና ጎዳ ባረ ጾሳ ዎሲደ፥ "አቤት መና ጎዳዉ፥ ዎልቃይ ባይና ኦላንቻቱ ዎልቃማ ኦላንቻቱዋ ጾናናዳን ማድያዌ ኔፐ አትና፥ ሀራይ ባዋ! አቤት መና ጎዳዉ፥ ኑ ጾሳዉ፥ ኑን ኔናን አማነቲደ፥ ሀ ጮራ ኦላንቻቱዋና ነ ሱንን ኦለታናዉ ዬዳ ድራዉ፥ ኔን ኑና ማዳ። አቤት መና ጎዳዉ፥ ኔን ኑ ጾሳ፤ ኔና አሳይ ጾነና" ያጌዳ።

12 ሄዋ ድራዉ፥ መና ጎዳይ አሳ ስንንነ ይሁዳ ኦላንቻቱ ስንን ቶጵያ ኦላንቻቱዋ ሾጬዳ፤ ቶጵያ ኦላንቻቱ ባቃቴድኖ። 13 አስነ አናና ደእያ አሳይ ኡንቱንታ ጋራራ ጋካናዉ የደርሴድኖ። ቶጵያ ኦላንቻቱዋፐ ዳሩ ሀይቄዳ ድራዉ፥ ኡንቱንቱ ስሚደ ምናናዉነ ኦለታናዉ ዳንዳይበይክኖ። ሄዋዳን ሀኒደ፥ ቶጵያ ኦላንቻቱ መና ጎዳንነ አ ኦላንቻቱዋን ጾነቴድኖ። ካትያ አሳ ኦላንቻቱካ ዳሮባ ኦሞዴድኖ። 14 ሄዋ ሄራን ደእያ አሳይ መና ጎዳይ ኦዳዋ ያቲደ፥ ዳሮ ዳጋሜዳ። አሳ ኦላንቻቱካ ጋራራ ዩሹዋን ደእያ ካታማቱዋ ኡባ ቦንቂደ ይሴድኖ። 15 ቃይ መህያ ሄምያዋንቱ ሞቱዋ ኦለቲደ፥ ዳሮ ዶርሳ፥ ዴሻነ ጋሉዋ ድኢደ፥ የሩሳላመ ስሜድኖ።