ይሁዳ ካትያ ዮኣታማ
(2 ካታ. 15:32-38)
1 ዮኣታመ ካተትያ ዎደ፥ ላይይ አዉ ላታማነ እቼሻ፤ እ የሩሳላመን ታማነ ኡሱፑን ላይ ካተቴዳ። አ ዳይ ሱንይ ያሩሾ፤ እዛ ጻዶቃ ናቶ። 2 ባረ አዉ ኦዝያነ ኦዳዋዳን፥ ዮኣታምካ መና ጎዳ ስንን ሱረባ ኦዳ፤ ሽን እ አ አዉ መና ጎዳ ጌሻ ጎልያ ገሌዳዋዳን ገልቤና። ግዶፐነ፥ አሳይ ናጋራ ኦያዋ አግቤና።
3 ዮኣታመ መና ጎዳ ጌሻ ጎልያ ገልያ ቆሞ ፐንግያ ዛረደ ኦዳ፤ ቃይ የሩሳላመ ካታማ ግምቢያን ኦፌላ ግያ ሳኣን ዳሮ ኪታ ኦዳ። 4 ይሁዳ ገዝያን ካታማቱዋ ኬጼዳ፤ ዎራይ ዳርያ ደርያን ጌሱዋነ አዱሳ ግምቢያ ግምቤዳ።
5 ዮኣታመ አሞና ካትያና ኦለቲደ ጾኔዳ። አሞናቱ ሄ ላይ ሄዙ ሻአነ ኦይዱ ጼቱ ኪሎ ግራመ ዴጽያ ብራ፥ ታሙ ሻአ ኮንታለ ግድያ ዛርጋነ ታሙ ሻአ ኮንታለ ግድያ ባንጋ አዉ ጊሬድኖ። አሞናቱ ላኤን ላይይነ ሄዘን ላይን ሄዋዳንካ አሂደ፥ አዉ ጊሬድኖ። 6 ዮኣታመ መና ጎዳ ባረ ጾሳ ስንን ሱረ ሄመቴዳ ድራዉ፥ ሎይ ምኔዳ።
7 ዮኣታመ ሀኔዳ ሀራባይ፥ እ ኦለቴዳ ኦላባይ ኡባይነ እ ኦዳባይ ኡባይ እስራኤልያ ካተቱነ ይሁዳ ካተቱ ታርክያ ማጻፋን ጻፈት ኡቴዳ። 8 ዮኣታመ ካተትያ ዎደ፥ ላይይ አዉ ላታማነ እቼሻ፤ እ የሩሳላመን ታማነ ኡሱፑን ላይ ካተቴዳ። 9 ዮኣታመ ሀይቂደ፥ ባረ ማይዛን ጋከቴዳ። ኡንቱንቱ አ ዳዊታ ካታማን ሞጌድኖ። አ ሳኣን አ ናአይ አካዝ ካተቴዳ።