2 ኦዱዋ 33

ይሁዳ ካትያ ምናሳ

1 ምናሰ ካተትያ ዎደ፥ ላይይ አዉ ታማነ ላኣ፤ እ የሩሳላመን እሻታማነ እቼሹ ላይ ካተቴዳ። 2 መና ጎዳይ እስራኤልያ አሳ ስንፐ ላጊደ ከሴዳ አሳቱዋፐ ደኡዋ ዎጋ፥ ሄ ሸነይያዋ ቁሊደ፥ እካ መና ጎዳ ስንን ኢታባ ኦዳ።✝33:2 ኤር. 15:4 3 ምናሰ ባረ አዉ ህዝቂያሰ ላሌዳ፥ ጎይንያ ቃ ሳኣ ዛረደ ኬጼዳ፤ ባኣላዉ ያርሽያ ሳአቱዋነ አሼሮ ጌተትያ ጾሳት ምስለቱዋ መዳ። ቃይ ሳሉዋ ጾልንተቱዋ ኡባቶካ ጎይኔዳነ ኡንቱንቶ ኦዳ። 4 መና ጎዳይ ካሰ፥ "ታ ሱንይ መናዉ የሩሳላመን ደአናዋ" ያግ ዎዳ መና ጎዳ ጌሻ ጎልያን ምናሰ ሀራ ጾሳቶ ያርሽያ ሳኣ ጊግሴዳ።✝33:4 2 ኦዱዋ 6:6 5 መና ጎዳ ጌሻ ጎልያን ደእያ ላኡ ዳባባቱዋን ሳሉዋ ጾልንተቶ ኡባዉ ያርሽያ ሳኣ ጊግሴዳ። 6 ህኖማ ዛንጋራን ባረ አቱማ ናና ታማን ጹጊደ ያርሼዳ። እ ባረ ሁጲያዉካ ብትያዋነ ሙሩንያዋ ግዲደ፥ ሻሬቾቱዋነ ሞይትልያ ሃሳይስያዋንታ ዞርያ ኦቼዳ። መና ጎዳ ስንን እ ዳሮ ኢታባ ኦደ፥ አ ሀንቀዳ።

7 ሄዋፐ ጉይያን፥ ባረ መዳ ኤቃ ምስልያ ጾሳ ጌሻ ጎልያ ግዶን ኤሴዳ። ሄ ጌሻ ጎሊ፥ ጾሳይ ዳዊተዉነ አ ናኣ ሶሎሞናዉ፥ "እስራኤልያ ዛርያ ኡባ ግዶፐ ታን ዶሬዳ ሀ ጌሻ ጎልያንነ የሩሳላመን ታን ታ ሱን መናዉ ጼስሳና።✝33:7-8 1 ካታ. 9:3-5፤ 2 ኦዱዋ 7:12-18 8 ታን እስራኤልያ አሳ አዛዜዳ አዛዙዋ ኡባነ ሙሴ ባጋና እመቴዳ ህግያ፥ ዎጋነ ፕርዳ ኡባ ኡንቱንቱ ናጊደ ኦፐ፥ ታን ኡንቱንቱ ማይዛ አዋቶ እሜዳ ጋድያፐ ኡንቱንቱ ቃታማ ሾድስከ" ያግ ዎዳ ጌሻ ጎልያ። 9 ሽን ምናሰ ይሁዳ አሳነ የሩሳላመ አሳ ባለዳ፤ ያትና፥ ኡንቱንቱ መና ጎዳይ እስራኤልያ አሳ ስንፐ ይሴዳ ደሪ አሳዋፐ አያ ኢታ ኦድኖ።

ምናሰ ባረ ናጋራፐ ስሜዳ

10 መና ጎዳይ ምናሰዉነ አ አሳዉ ሃሳዬዳ፤ ሽን ኡንቱንቱ አ ሃሳያ ስሰናን እጼድኖ። 11 ሄዋ ድራዉ፥ መና ጎዳይ አሶረ ካትያ ኦላ ጋዳዎቱዋ ኡንቱንቱ ቦላ ደንዳ፤ ኡንቱንቱ ምናሰ ሲያን ዳፉዋ አደ ኦይቄድኖ፤ ናሃስያ ሳንሳላታን ቃቺደ፥ ባብሎነ ጋድያ አፌድኖ። 12 ምናሰ ቱጋቴዳ ዎደ፥ መና ጎዳ ባረ ጾሳ ማዱዋ ዎሴዳ፤ ባረ አዎቱዋ ጾሳ ስንን ባረናተ ሎይ ካዉሼዳ። 13 ምናሰ ጾሳ ዎሴዳ ዎደ፥ መና ጎዳይ አዉ ዎሰቴዳ፤ አ ዋትዋቱዋካ ስሴዳ። የሩሳላመን አ ካዉተን ዛረ ዎዳ። መና ጎዳይ ጾሳ ግድያዋ ምናሰ ሄዋን ኤሬዳ።

14 ሄዋፐ ጉይያን፥ ምናሰ ግዮነ ፑልቱዋ ኤለካ ደኢያሳፐ ዶሚደ፥ ኦፌላ ጌተትያ ሳኣና አደ ቢደ፥ ሞልያ ፐንግያ ጌተትያ ፐንግያ ጋካናዉ፥ ካሰዋፐ ካረ ባጋና ሀራ ድርሳ ግምቢያ ግምቤዳ። ሄ ግምቢ ዳዊታ ካታማፐ አዋይ ዉልያ ባጋና ደእያ ዛንጋራን ደኤ። ይሁዳ ካታማቱዋ ኡባን ኦላ ጋዳዎቱዋ ዎዳ።

15 አላጋ ጾሳቱዋነ ኤቃ ምስልያ መና ጎዳ ጌሻ ጎልያፐ ድጌዳ፤ ጌሻ ጎሊ ደእያ ደርያ ቦላነ የሩሳላመን እ ኦዳ ያርሽያ ሳኣ ኡባ ኮሊደ፥ ሄ ካታማፐ ካረ ከሲደ ኦሌዳ። 16 ምናሰ ቃይ መና ጎዳዉ ያርሽያ ሳኣ ኦራጽሲደ፥ እትፐተ ያርሹዋነ ጋላታ ያርሹዋ አን ያርሼዳ። ይሁዳ አሳካ መና ጎዳዉ እስራኤልያ ጾሳዉ ጎይናናዳን አዛዜዳ። 17 አሳይ ጎይንያ ቃ ግሹዋን ያርሹዋ ያርሽያዋ አጋና ዮፐካ፥ ኡንቱንቱ ያርሽያዌ መና ጎዳ ባረንቱ ጾሳ ጻላላሳ።

ምናሰ ሀይቁዋ

18 ምናሰ ሀኔዳ ሀራባይ፥ እ ባረ ጾሳ ዎሴዳ ዎሳይነ መና ጎዳ እስራኤልያ ጾሳ ሱንን ትምቢትያ ኦድያዋንቱ አዉ ኦዴዳባይ እስራኤልያ ካተቱ ታርክያ ማጻፋን ጻፈት ኡቴዳ። 19 ቃይ አ ዎሳይነ ጾሳይ አዉ ዎሰቴዳባይ፥ እ ኦዳ ናጋራይነ ናቁ ኡባይ፥ ምናሰ ባረና ካዉሻናፐ ካሰ ኦዳ ጎይንያ ቃ ሳአቱነ አሼር ምስለቱዋነ ባረ ጎይንያ ኤቃቱዋ እ ኤሴዳ ሳአቱ ኡባይ ትምቢትያ ኦድያዋንቱ ታርክያ ማጻፋን ጻፈት ኡቴድኖ። 20 ምናሰ ሀይቂደ፥ ባረ ማይዛን ጋከቴዳ፤ ያትና፥ ምናሳ አ ካትያ ጎለን ሞጌድኖ። አ ኮታን አ ናአይ አሞነ ካተቴዳ።

ይሁዳ ካትያ አሞና

21 አሞነ ካተትያ ዎደ፥ ላይይ አዉ ላታማነ ላኣ፤ እ የሩሳላመን ላኡ ላይ ካተቴዳ። 22 አ አዉ ምናሰ ኦዳዋዳን፥ እካ መና ጎዳ ስንን ኢታባ ኦዳ። አ አዉ ምናሰ ኦስሴዳ ምስለቱ ኡባዉ ያርሼዳነ ኡንቱንቶ ኦዳ። 23 ሽን አ አዉ ምናሰ ባረናተ ካዉሼዳዋዳን፥ እ ባረናተ መና ጎዳ ስንን ካዉሽቤና፤ አሞነ ናቁዋ ያ ያ ዳርሴ።

24 አሞና ኦሳንቻቱ አ ቦላ ማቀቲደ፥ አ ካትያ ጎለን አ ዎድኖ። 25 ሄዋፐ ጉይያን፥ ይሁዳ አሳቱ ካትያ አሞና ቦላ ማቀቴዳ ኡባቱዋ ዎድኖ። አሞና ሳኣን አ ናኣ ዮስያሳ ካተዬድኖ።