2 ኦዱዋ 9

ሳባ ካታቶ

1 ሳባ ካታታ ሶሎሞነ ዋርያ ስሳደ፥ ዴጾ ኦሻቱዋ አካደ፥ አ ፓጫናዉ ደንዳዱ። ደንዳደ ሳዉዋ፥ ሎይ ዳሮ ዎርቃነ አልኦ ሹቻ ጫነቴዳ ዳሮ ጋሎቱዋ ጩጉዋና ሎይ ዳሮ አጃባና የሩሳላመ ጋካደ፥ ሶሎሞነ ስን አአዱ። ባረ ዎዛናን ደእያዋ ኡባ ሶሎሞናዉ ኦዳዱ።✝9:1-9 ማቶሳ 12:42፤ ሉቃሳ 11:31 2 ሶሎሞነ እዛ ኦቼዳዋ ኡባ ኦዴዳ፤ እ እዝዉ ብርሸናን አፐ ጌም አቴዳባይ አያይነ ባዋ። 3 ሳባ ካታታ ሶሎሞነ አዳ ኤራ፥ እ ኬጼዳ ካትያ ጎልያ፥ 4 አ ማዳን ሺቅያ ቁማ፥ አ ኦሳንቻቱ ኡትያ ኡተ፥ አ ካልያዋንቱ ኦያ ኦሱዋነ ማይያ ማዩዋ፥ አ ኤሳ ትግያዋንቱ ማይያ ማዩዋነ መና ጎዳ ጌሻ ጎልያን እ ጹግያ ያርሹዋ በኤዳ ዎደ፥ እ ዎዛናይ ጋገቴዳ።

5 ሄዋፐ ጉይያን፥ አ ካትያ፥ "ነዋነ ነ አዳ ኤራተባ ታን ታ ጋደን ደኣደ ስሴዳዌ ቱማ። 6 ሽን ታን ያደ ታ አይፍያ ብራናን በአና ጋካናዉ፥ ኡንቱንቱ ታዉ ኦዴዳዋ አማናበይከ። ነ አዳ ኤራ ግታተዉ ባካነ ታዉ ኦድበይክኖ፤ ታን ስሴዳዋፐ ኔን ሎይ ቃሳ። 7 ኡባ ዎደ ነ ስንን ኤቂደ፥ ነ አዳ ኤራ ስስያ ነ አሳቱነ ነ ኦሳንቻቱ አያ ቃደተድኖሻ! 8 ኔናን ናሸቲደ፥ ኔና ባረ ካዉተ አራታን ኡትሴዳ መና ጎዳይ ነ ጾሳይ ጋላተቶ! ነ መና ጎዳይ እስራኤልያ አሳ ሲቄዳ ድራዉነ መናዉ ሎይ ኤሳናዉ ኮዮዋ ድራዉ፥ ኔን ሱረ ፕርዳነ ጽሎተ ኦና ማላ፥ እ ኔና ኡንቱንቱ ቦላ ካተዬዳ" ያጋዱ።

9 ያጋደ ካታታ 4,000 ኪሎ ግራመ ዴጽያ ዎርቃ፥ ሎይ ዳሮ ሳዉዋነ አልኦ ሹቻ ካትያዉ እማዱ፤ ሳባ ካታታ ካትያ ሶሎሞናዉ እሜዳ ሳዉዋ ማላትያ ሳዉ ኡባካ ባዋ።

10 (ኦፊራፐ ዎርቃ አሄዳ፥ ኪራማ አሳቱነ ሶሎሞነ አሳቱ ያፐካ ሳንዳለ ግያ ምነ አልኦ ሹቻ አሄድኖ። 11 ካቲ ሶሎሞነ ሄ ሳንዳልያፐ መና ጎዳ ጌሻ ጎልያ፥ ካትያ ጎልያ ገልያ ሳአዉ ድቱዋነ ማዝሙርያ የጽያዋንቶ ማስንቁዋነ ዲ መሴዳ። ሄዋ ማላትያባይ ይሁዳ ቢታን ካሰ ቤት ኤረና።)

12 ካቲ ሶሎሞነ ሳባ ካታታ አሞታደ አ ኦቼዳዋ ኡባ እዝዉ እሜዳ። አ አዉ አሄዳዋፐ ዳሩዋ እ እዝዉ እሜዳ። ሄዋፐ ጉይያን፥ ሳባ ካታታ ባረ አጃባና ደንዳደ፥ ባረ ጋድያ ስማዱ።

ሶሎሞነ ዱረታ

13 ሶሎሞነ ላይን ላይን አክያ ዎርቃይ ላታማነ ሄዙ ሻአ ኪሎ ግራመ ዴጽያዋ። 14 ሄዌ ዛልአንቻቱዋፐ አኬዳ ቃራጻነ አራባ ጋድያ ካተቱዋ ኡባፐነ እስራኤልያ ጋድያ ሞድያዋንቱፐ አኬዳ ዎርቃነ ብራ ጉጀናና። 15 ካቲ ሶሎሞነ ላኡ ጼቱ ዎጋ ጎንዳለቱዋ ቆጼዳ ዎርቃፐ መሴዳ፤ እት እት ጎንዳልያን ላፑን ኪሎ ግራመ ግድያ ዎርቃይ ገሌዳ። 16 ቃይካ እ ሄዙ ጼቱ ቄር ጎንዳለቱዋ ቆጼዳ ዎርቃፐ መሴዳ፤ እት እት ቄር ጎንዳልያን ላኡ ኪሎ ግራመ ግድያ ዎርቃይ ገሌዳ። ካቲ ሄ ጎንዳለቱዋ ሊባኖሳ ዎራ ጎልያ ጌተትያ ጎለን ዎዳ።

17 ቃይካ ካቲ ዳንጋርሳ ዛልያፐ እት ዎልቃማ ካዉተ አራታ መሴዳ፥ ጌሻ ዎርቃን ሼሼዳ። 18 ካዉታ አራታይ ደእያ ሳኣ ፑደ ከሳናዉ የያ ኡሱፑን ድቱ ደኢኖ። ገድያን የናዉ ካዉተ አራታና ጋደ፥ ዎርቃፐ ኦዳ ኦይዲ ደኤ። አራታዉ ላኡ ባጋናካ ቀስያ ዘምፕስያ ሳአቱ ደኢኖ፤ ሄ ላኡ ሳአቱ ላንቂያንካ ያ ባጋናነ ሀ ባጋና ኤቄዳ እት እት ጋሙዋ ምስሊ ደኤ። 19 ሄ አራታ ፑደ ከስያ ኡሱፑን ደቱዋን ያ ባጋናነ ሀ ባጋና እት እት ጋሙዋ ምስሊ፥ ኡባና ታማነ ላኡ ምስለቱ ደኢኖ። ሀዋ ማላ ካዉተ አራታይ ሀራ ካዉተን ሀቃንነ ኦሰትቤና።

20 ካቲ ሶሎሞነ ኡሻ ኡሽያ ሚሻ ኡባይ ዎርቃፐ ኦሰቴዳ፤ ሊባኖሳ ዎራ ጎለን ደእያ ሻሉዋ ኡባይካ ሙሩታ ዎርቃፐ ኦሰቴዳ። ሶሎሞነ ዎደ ብራይ ኡባካ ጎእያባዳን ፓይደት ኤረና። 21 ካትያዉ ኪራማ ማርካባቱዋና ዛልእያ ዎልቃማ ማርካባቱ አባን ደኢኖ። ሄ ማርካባቱ ዎርቃነ ብራ፥ ዳንጋርሳ አቻ፥ ቃረቱዋነ ገለሾቱዋ ጫን አኪደ፥ ሄዙ ላይፐ እት ገደ ስሚኖ።

22 ካቲ ሶሎሞነ ዱረተንነ አዳ ኤራተን ሳኣን ደእያ ካተቱዋ ኡባፐ ዳሬ። 23 ሳኣን ደእያ ካተቱ ኡባይ አ ስን አናዉነ ጾሳይ አ ዎዛናን ዎዳ አዳ ኤራ ስሳናዉ ኮይኖ። 24 ላይፐ ላይን ይያ ኡባይ አዉ እማናዉ ዎርቃነ ብራ ሚሻቱዋ፥ ማዮቱዋ፥ ኦላ ሚሻቱዋነ ሳዉዋ፥ ፓራቱዋነ ባቁሎቱዋ አኪደ ዬ።

25 ሶሎሞናዉ ፓራቶነ ጋረቶ 4,000 ጋጻታይ ደኤ፤ ቃይ 12,000 ፓራቱ አዉ ደኢኖ። ሶሎሞነ ሄዋንታ ፓራ ጋረቱዋ ካታማቱዋንነ ባረናና የሩሳላመን ዎዳ።✝9:25 1 ካታ. 4:26 26 ሶሎሞነ ኤፍራጺሳ ሻፋፐ ዶሚደ፥ ፕልስጼማ ጋድያነ ግብጼ ዛዋ ጋካናዉ ደእያ ካተቱዋ ኡባ ሞዴዳ።✝9:26 ዶመ 15:18፤ 1 ካታ. 4:21 27 ካቲ የሩሳላመን ብራይ ሹቻዳን ኬለታናዳን፥ ዝጋይካ ጋን ድጭያ ኤዳን ጮራታናዳን ኦዳ። 28 ሶሎሞናዉ ፓራቱዋ ግብጼፐነ ሀራ ቢታ ኡባፐ አሂኖ።✝9:28 ዛረ. 17:16

ሶሎሞነ ሀይቁዋ

29 ኮይሮፐ ዉርሰ ጋካናዉ ሶሎሞነ ሀኔዳ ሀራባይ ትምቢትያ ኦድያ ናታና ታርክያ ማጻፋን፥ ሴሎፐ ዬዳ አኪይ ትምቢትያ ኦዴዳ ማጻፋንነ ናባጻ ናኣ እዮርባማዋ ትምቢትያ ኦዴዳ እዱ በኤዳ ሳፃ ማጻፋን ጻፈት ኡቴዳ። 30 ሶሎሞነ እስራኤልያ ኡባ ቦላ የሩሳላመን ኦይታሙ ላይ ካተቴዳ። 31 ሄዋፐ ጉይያን፥ ሶሎሞነ ሀይቂደ፥ ባረ ማይዛን ጋከቴዳ፤ ባረ አዉዋ ዳዊታ ካታማን ሞገቴዳ። አ ናአይ ሮብኣመ አ ኮታን ካተቴዳ።