ካቲ አሳይ ይሁዳን ደእያ ኤቃ ምስለቱዋ ይሴዳ
1 ኦዴዳ ናኣ አዛርያሳ ቦላ ጾሳ አያናይ ዎዳ፤ 2 አሳና ጋከታናዉ ቢደ፥ ሀዋዳን ያጌዳ፤ "አሳ፥ ኔን፥ ይሁዳ አሳይነ ቢንያማ አሳይ ኡባይ ስስተ! ህንተንቱ መና ጎዳና እትፐ ደእያ ዎደ ኡባን እካ ህንተናና ደኤ። ህንተንቱ አ ኮዮፐ፥ እ ህንተንቶ ቤታና፤ ሽን ህንተንቱ አ አጎፐ፥ እካ ህንተንታ አጋና። 3 እስራኤልያ አሳይ ቱሙ ጾሳይ፥ ታማርስያ ቄሲነ ህጊ ባይናን ዳሮ ዎድያ ደኤዳ። 4 ሽን ባረንታ መቱ ጋኬዳ ዎደ፥ ኡንቱንቱ መና ጎዳኮ፥ እስራኤልያ ጾሳኮ ስሚደ፥ አ ኮዬድኖ፤ እ ኡንቱንቶ ቤቴዳ። 5 ሄ ዎድያን ካረ ከስያዎነ ሶ ገልያዎ ሳሮተይ ባዋ፤ አያዉ ጎፐ፥ ጋድያ ኡባ ቦላን ደእያ አሳይ ዳሮ ሻባረቴ። 6 ጾሳይ ኡንቱንታ ዱማ ዱማ መቱዋን የጌዳ ድራዉ፥ ደሪ ደርያ፥ ካታማይካ ካታማ ኡንኤ። 7 ሽን ህንተንቱ ምንተ፤ ላፎፕተ! አያዉ ጎፐ፥ ህንተንቱ ኦዳ ኦሶ ጋቲ ደኤ" ያጌዳ።
8 ኦዴዳ ናአይ ትምቢትያ ኦድያ አዛርያስ ኦዴዳ ቃላ ስሴዳ ዎደ፥ አሳይ ምኔዳ። አሳይ ይሁዳነ ቢንያማ ቢታቱዋ ኡባፐነ ኤፍሬማ ገዝያን እ ኦሞዲደ ኦይቄዳ ካታማቱዋፐ ሸነይያ ኤቃ ምስለቱዋ ይሴዳ። ሄዋፐ ጉይያን፥ መና ጎዳ ጌሻ ጎልያ ስንን ደእያ መና ጎዳዉ ያርሽያ ሳካ ኦራዳ።
9 መና ጎዳይ አ ጾሳይ አናና ደእያዋ በኤዳ ድራዉ፥ ዳሮ አሳይ እስራኤልያፐ አኮ ዬዳ፤ ይሁዳ አሳነ ቢንያማ አሳ ኡባ፥ ኡንቱንቱና ደእያ ኤፍሬማ ዘረ፥ ምናሰ ዛራቱዋነ ስሞና ዘረ አሳይ ሺሼዳ። 10 አሳይ ካተቴዳ ታማነ እቼሻን ላይን፥ ሄዘን አግናን ሄ አሳይ የሩሳላመን ሺቄዳ። 11 ሄ ጋላስ ኦሞድ አሄዳዋፐ ላፑን ጼቱ ኮሩማቱዋነ ላፑን ሻአ ዶርሳቱዋ መና ጎዳዉ ያርሼድኖ። 12 መና ጎዳ ባረንቱ አዎቱዋ ጾሳ ባረንቱ ኩመን ዎዛናንነ ባረንቱ ኩመን ሸምፑዋን ኮያናዉ ቃላ ገሌድኖ። 13 "መና ጎዳ እስራኤልያ ጾሳ ኮየና አሳይ፥ ጉ ግድና ዎልቃማ ግድና፥ አቱማ ግድና ማጫ ግድና፥ ሀይቆ" ጊደ ጫቀቴድኖ። 14 ሄዋ ቦላንካ ማላካታነ ጹሩምባ ፑኒደ፥ ባረንቱ ቃላ ቁ ኦደ፥ መና ጎዳዉ ጫቄድኖ። 15 ይሁዳ አሳይ ኡባይ ባረንቱ ኩመን ዎዛናን ሀ ጫቁዋ ጫቄዳ ድራዉ፥ ናሸቴድኖ። አያዉ ጎፐ፥ ጾሳ ኡንቱንቱ ላሞቲደ ኮይና፥ እ ኡንቱንቶ ቤቴዳ። መና ጎዳይ ኡንቱንቶ ኡባ ባጋናካ ዎፓ እሜዳ።
16 ካቲ አሳይ ባረ አዉዋ ዳያ ማእካ አሼሮ ግያ ጾሳትዉ ሸነይያ ኤቃ ምስልያ መዳ ድራዉ፥ ካትያ አቶ አ ጌተትያ ቦንቹዋፐ እዞ ድጌዳ። አሳይ ሄ ኤቃ ምስልያ ቃንጸሬ ሱፓዪደ፥ ቀድሮና ዛንጋራን ጹጌዳ። 17 ጎይንያ ቃ ሳኣ አሳይ እስራኤልያ ጋድያፐ ይሰናን አጎፐነ፥ እ ባረ ደኤዳ ላይ ኡባን መና ጎዳዉ ዎዛናፐ አማነትያ አሳ ግዲደ ደኤዳ። 18 እነ አ አዉ ጾሳዉ ዱማይ ዎዳ ብራነ ዎርቃ ሀራ ሚሻቱዋ አሂደ፥ ጾሳ ጌሻ ጎልያ ግዶን ዎዳ። 19 አሳይ ካተቴዳ ሀታማነ እቼሻን ላይይ ጋካናዉ ኦላይ ባዋ።