እስራኤልያ ፑደሃ ያራቱ ሮባኣማ ቦላ ማካሌድኖ
(1 ካታ. 12:1-20)
1 እስራኤልያ አሳይ ኡባይ ሮብኣማ ካተያናዉ ሰኬማ ካታማ ቤዳ ድራዉ፥ እካ ያ ቤዳ። 2 ናባጻ ናአይ እዮርባም፥ ካትያ ሶሎሞነፐ ባቃቲደ ግብጼን ደእያዌ ሀዋ ስሴዳ ዎደ፥ ግብጼፐ ስሚደ ዬዳ። 3 እስራኤልያ አሳይ ኡባይ እዮርባማዉ ኪቲደ ጼስስና፥ እነ እስራኤልያ ያአይ ኡባይ ሮብኣማኮ ቤዳ፤ 4 "ነ አዉ ኑና ዴጾ ሞርገ ም ቶሴዳ፤ ሽን ሀእ ኔን እ ኑና ኦስስያ ዎልቃማ ኦሱዋነ ዴጾ ሞርገ ም ኑዉ ካዉሽሳርኪ። ያቶፐ፥ ኑን ነዉ ኦና" ያጌድኖ።
5 ሮብኣመ ኡንቱንታ፥ "ቢተ፤ ሄዘን ጋላስ ስሚደ፥ ታኮ ዪተ" ያጌዳ። ሄዋፐ ጉየ አሳይ ስሚደ ቤዳ።
6 ሄዋፐ ጉይያን፥ ካቲ ሮብኣመ አ አዉ ሶሎሞነ ፓጻ ደእያ ዎደ፥ ሶሎሞነ ዞሬዳ ጭማቱዋ ዞረታ በሴዳ። እ ኡንቱንታ፥ "ሀ አሳዉ ዋጋደ ዛራ ጊቴ?" ያጊደ ኦቼዳ።
7 ሽን ጭማቱ ሮብኣማ፥ "ኔን ሀ አሳዉ ኬኮፐ፥ ኡንቱንታ ናሸቾፐነ ኡንቱንቶ ሎኦ ቃላ ዛሮፐ፥ ኡንቱንቱ ኡባ ገደ ነዉ ቆማ ግዳናዋንታ" ያጌድኖ።
8 ሽን ሮብኣመ ጭማቱ ዞሬዳ ዞርያ አጊደ፥ አናና ድጪደ፥ አዉ ኦያ ያላጋ አሳቱዋ ዞረታ በሴዳ። 9 እ ኡንቱንታ፥ "ህንተንቱ ታና ዞርያዌ አዬ? ‘ነ አዉ ኑና ቶሴዳ ዴጾ ሞርገ ም ኑዉ ካዉሽሳርኪ’ ያግያ ሀ አሳዉ ዋጋደ ዛሮ?" ያጊደ ኦቼዳ።
10 ሽን አናና ድጬዳ ያላጋቱ፥ " ‘ነ አዉ ኑና ዴጾ ሞርገ ም ቶሴዳ፤ ሽን ኔን ኑዉ ካዉሽሳርኪ’ ያግያ አሳዉ፥ ‘ታ ቄር ብራ ታ አዉዋ ጼሳፐ ኦርዴ። 11 ታ አዉ ህንተንቱ ሞርገ ም ዴጸዳ፤ ሽን ታን ሄዋፐካ አደ ዴጸና። ታ አዉ ህንተንታ ልሱዋን ዋዳ፤ ሽን ታን ህንተንታ ማስማሱዋዳን ዱክያ ልሱዋን ዋና’ ያጋደ ዛራ" ያጌድኖ።
12 ሄዋፐ ጉይያን፥ ካቲ ሮብኣመ፥ "ሄዛን ጋላስ ስሚደ፥ ታኮ ዪተ" ጌዳዋዳንካ፥ እዮርባምነ አሳይ ኡባይ ሄዘን ጋላስ ስሚደ ዬድኖ። 13 ካቲ ሮብኣመ ኡንቱንቶ ሀንቆ ዛሩዋ ዛሬዳ። ጭማቱዋ ዞርያ አግ ባሺደ፥ 14 ያላጋቱ ዞሬዳ ዞርያ ካሌዳ። ያቲደ ሀዋዳን ያጌዳ፤ "ታ አዉ ህንተንቱ ሞርገ ም ዴጸዳ፤ ሽን ታን ሄዋፐካ አደ ዴጸና። ታ አዉ ህንተንታ ልሱዋን ዋዳ፤ ሽን ታን ህንተንታ ማስማሱዋዳን ዱክያ ልሱዋን ዋና" ያጊደ ዛሬዳ። 15 ካቲ አሳይ ግያዋ ስሰናን እጼዳ፤ አያዉ ጎፐ፥ መና ጎዳይ ሴሎፐ ዬዳ አኪያ ባጋና ካሰ ናባጻ ናኣ እዮርባማዉ ኦዴዳ ቃላይ ፖለታናዳን ሀዌ ጾሳፐ ሀኔዳ።
16 እስራኤልያ አሳይ ኡባይ ካቲ ኡንቱንቱ ግያዋ ስሰናን እጼዳ። ያቲደ፥ ካትያ ሀዋዳን ያጌድኖ፦ "ዳዊተዋፐ ኑና ጋክያባይ አዬ? እሰያ ናኣፐ ኑን ላታናዌ ባዋ! እስራኤልያ አሳዉ፥ ህንተንቱ ሶ ህንተንቱ ሶ ቢተ! ስም ሮብኣመ ባረዉ ናገቶ!" ያጌድኖ። ሄዋ ድራዉ፥ እስራኤልያ አሳይ ኡባይ ባረንቱ ሶ ባረንቱ ሶ ቤድኖ።10:16 2 ሳሜላ 20:1 17 ሽን ሮብኣመ ይሁዳ ቢታን ደእያ እስራኤልያ አሳ ቦላ ካተቴዳ።
18 ሄዋፐ ጉይያን፥ ካቲ ሮብኣመ ባረ አይለቱዋ ካፑዋ አዶንራማ እስራኤልያ አሳኮ ኪቴዳ፤ ኡንቱንቱ አ ሹቻን ጫዲደ ዎድኖ። ያትና፥ ካቲ ሮብኣመ ባረ ፓራ ጋርያን ኤለካ ከስ ኡቲደ፥ የሩሳላመ ባቃቴዳ። 19 ሄደፐ ዶሚደ፥ ሀቼ ጋካናዉ፥ እስራኤልያ ዛራቱ ታማቱ ዳዊታ ዛርያፐ ካተቴዳ ካተቱዋ ቦላ ማካሌድኖ።