1 ሄዋፐ ጉይያን፥ ዮሳፌጸ ሀይቂደ፥ ባረ ማይዛን ጋከቴዳ። ዳዊታ ካታማን ባረ ማይዛ አዎቱዋና ሞገቴዳ። አ ኮታን አ ናአይ ዮራመ ካተቴዳ።
ይሁዳ ካትያ ዮራማ
(2 ካታ. 8:17-24)
2 ዮራማ እሻቱ አዛርያሳ፥ ይህኤላ፥ ዛካራሳ፥ አዛርያሳ፥ ምካኤላነ ሻፋጽያ፤ ሀዋንቱ ኡባይ ይሁዳ ካትያ ዮሳፌጻ ናና። 3 ኡንቱንቱ አዉ ዮሳፌጸ ኡንቱንቶ ዳሮ ብራ፥ ዎርቃነ አልኦ ሻሉዋ እሜዳ፤ ቃይ ግምበቴዳ ይሁዳ ካታማቱዋካ እሜዳ። ሽን ዮራመ ባረ አዎ ባይራ ናኣ ግድያ ድራዉ፥ ካዉተ አዉ እሜዳ። 4 ዮራመ ባረ አዉዋ ካዉተ አኪደ ምኔዳ ዎደ፥ ባረ እሻቱዋ ኡባቱዋነ እት እት እስራኤልያ ካፓቱዋ ማሻን ዎዳ።
5 ዮራመ ካተትያ ዎደ፥ ላይይ አዉ ሀታማነ ላኡዋ፤ እ የሩሳላመን ሆስፑን ላይ ካተቴዳ። 6 ዮራመ አካባ ናቶ አኬዳ ድራዉ፥ አካባ ሶይ አሳይ ሀመቴዳዋዳንካ ካሰ እስራኤልያ ካተቱዋ ኦግያን ሀመቴዳ፤ መና ጎዳ ስንንካ ኢታባ ኦዳ። 7 ግዶፐነ፥ መና ጎዳይ ካሰ ዳዊታና ጫቀቴዳ ጫቁዋ ድራዉ፥ ዳዊታ ዘረ ይሳናዉ ኮይቤና። ዳዊታ ዘረይ መናዉ ካተታናዉ መና ጎዳይ ሂዶታ እም ዎዳ።21:7 1 ካታ. 11:36
8 ዮራመ ካተቴዳ ዎደ፥ ኤዶማ አሳይ ይሁዳ ካትያ ቦላ ማካሊደ፥ ባረንቶ ካትያ ካተዬድኖ።21:8 ዶመ 27:40 9 ሄዋ ድራዉ፥ ዮራመ ባረ ኦላ ጋዳዋቱዋናነ ባረ ፓራ ጋረቱዋ ኡባና እትፐ ኤዶማ ጋድያ ኦላናዉ ቤዳ፤ ኤዶማ አሳይ አነ አ ፓራ ጋረቱዋ ካፓቱዋ ዶዴድኖ። ሽን ዮራምነ አ አሳይ ቃማ ደንዲደ፥ ዶዳ አደ ባቃቴድኖ። 10 ሄ ዎድያፐ ዶሚደ፥ ሀቼ ጋካናዉ፥ ኤዶማ አሳይ ይሁዳ አሳዉ ሞደትቤና። ዮራመ መና ጎዳ ባረ አዎቱዋ ጾሳ አጌዳ ድራዉ፥ ሊብና አሳይ ቃይ ሄ ዎደ ይሁዳ ካትያ ቦላ ማካሌዳ።
11 ዮራመ ቃይ ይሁዳ ገዝያን ጎይንያ ቃ ሳኣ ጊግሴዳ፤ የሩሳላመን ደእያ አሳይ ሻርሙጻናዳን ኦዳ፤ ይሁዳ አሳካ ባለዳ። 12 ሄዋፐ ጉይያን፥ ትምቢትያ ኦድያ ኤላስ ዮራማዉ ዳብዳቢያ ሀዋዳን ያጊደ ኪቴዳ፤ "መና ጎዳይ፥ ነ ማይዛ አዉዋ ዳዊታ ጾሳይ፥ ‘ኔን ነ አዉዋ ዮሳፌጻ ኦግያን ዎይ ይሁዳ ካትያ አሳ ኦግያን ሀመትያዋ አጋደ፥ 13 እስራኤልያ ካተቱዋ ኦግያን ሀመታዳ። አካባ ሶይ አሳይ ኦዳዋዳን፥ ይሁዳንነ የሩሳላመን ደእያዋንቱ ሻርሙጻናዳን ኦዳ። ቃይካ ኔፐ ኬክያ፥ ነ አዉዋ ጎለን ደእያ ነ እሻቱዋ ዎዳ። 14 ሄዋ ድራዉ፥ መና ጎዳይ ነ አሳ፥ ነ ናና፥ ነ ማቻቱዋነ ነዉ ደእያ ኡባባ ዎልቃማ ቦሻን ሾጫና። 15 ኔና ማራጭያ ሀርጊ ኦይቂና፥ ነዉ ሳኩ ያ ጎብ ጎቢደ ባና’ ያጌ" ያጌዳ።
16 ሄዋፐ ጉይያን፥ መና ጎዳይ ፕልስጼማቱዋነ ቶጵያ ማታን ደእያ አራባቱዋ ዮራማ ኦላናዳን ደንዳ። 17 ያትና፥ ኡንቱንቱ ይሁዳ ቦላ ማዬድኖ፤ ካትያ ጎለን ደእያ ሚሻ ኡባ፥ ካትያ አቱማ ናናነ አ ማጫዋንታ ኦሞዴድኖ። አ ናና ኡባፐ ቴፋ አካዝያሳፐ አትና፥ ሀራ እት ናአይነ አዉ አትቤና።
18 ሄ ኡባፐ ጉይያን፥ ፓጻናዉ ዳንዳየና ማራጭያ ሀርግያን ዮራማ መና ጎዳይ ሾጬዳ። 19 ላኡ ላይ ግዶን ሀርጊ አ ቦላ ጎቤዳ፤ አ ማራጪ ካረ ከሴዳ፤ ያትና፥ ሎይ ሳከቲደ ሀይቄዳ። አ ሞግያ ዎደ አሳይ ካሰ አ ማይዛ አዋቶ ኦዳዋዳን፥ አ ቦንቾ ም ዶሪደ፥ ታማ ኤቤና።
20 ዮራመ ካተትያ ዎደ፥ ላይይ አዉ ሀታማነ ላኣ፤ እ የሩሳላመን ሆስፑን ላይ ካተቴዳ። እ ሀይቂያ ዎደ ኦንነ ካዮትቤና። ዮራመ ዳዊታ ካታማን ሞገቴዳፐ አትና፥ ካተቱዋ ማካናን ሞገትቤና።